Ngmai a Klengeltengat el Okiu a King el Ngii a Mukrael er a Oureor el Klisichel a Jehovah!

“A klisichel a [Jehovah] a mo msa llomeserreng.”​—ISAIA 11:2.

1. Ngerang a omesodir me a uldesuir a rebebil el chad el kirel a mondai er a beluulechad?

 NGAR er a chelsel a babier er a chais el Associated Press Newswires, Press Release, er a July 7, 2006, e a Stephen Hawking el ta er tirke el mesuub el kirel aike el klekedall el ngar er a eanged a mlo melechesuar el kmo: “Ngar er a chelsel a beluulechad el di ketokl e kakebosech a tekoi er a balatiks, me a buai, me a blekerdelel me a eltel a beluu, e ngmekerang e sebechel a klechad el melemolem el ngar el 100 el rak?” Ngdirrek el okiu a tekingel a ta el ngarbab el chad er a balatiks e ngmelekoi el kmo: “Ngdirkak a ta el bo el sebeched el kodebengii a klengerenger me a lechub e deteketekii a budech er a beluulechad. Kede bai mla remuul a tekoi el kmal mo mekngit. Tiang a diak el belkul a kmo ngdimlak dolasem el mesmechokl aika el tekoi. Kede bai millasem a rokui el tekoi el okiu a blekeradel er a kabelment el kiosanto me a dirrek el kabelment er a beluu el chederedall er a cheungel a League of Nations. Kede dirrek el mla oumekemad a betok el ‘mekemad el melasem el merrob a mekemad’ e le kede oumerang el kmo kede medengelii a rolel e ngsebeched el torob a mekemad.”

2. Ngoeak a ngera el rolel e a Jehovah a di mereched el ochotii a llemeltel el mengedereder er tia el beluulechad?

² A remesiungel a Jehovah a diak el mechas a rengrir er a chouaika el tekingir me a uldesuir a rechad. A Biblia a ouchais er kid el kmo a rechad a dimlak lobeob el di tir el mengedereder er tir. (Jeremia 10:23) Ngdi ta el Jehovah a rredemelel a Mengedereder. Me ngii a kmal ngar ngii a llemeltel el olterekokl a llach el kired el oltirakl, el mo meketeklii a moktek er a klengar el kired, e dirrek el omekrael er kid el mo churrengelii tia el moktek er ngii. Me a lmuut el tang, ngkmal di kmedung e ngmo ousbech er tia el llemeltel el mengedereder el mo okngemed aika el rokui el kabelment el chederedall er a redi chad. Osisiu el taem, e ngii el Jehovah a dirrek el mo okngemedeterir tirke el chad el loltngakl er a llemeltel el mengedereder me te melemolem el omekrael er a rechad el mo sibil a klengit, me a chelebirukel me a dirrek el ngike el “chelid er tial belulechad,” el Satan el Diabelong.​—2 Korinth 4:4.

3. A Isaia ngulemlaoch a ngera el tekoi el kirel a Messias?

³ Ngar er a chelsel a Paradis el beches el beluulechad, e a mui er a bltikerreng el omengederederel a Jehovah a mo obeketakl el mo er a klechad el okiu a Rengedel a Messias. (Daniel 7:13, 14) A Isaia a ulemlaoch el kirel ngika el King el kmo: “A uldidellel a kleking er a David a ua tal kerrekar el mla meuukel; ngdi di ua le dubech a beches el tiul er sel debsel, me ng ua isei el tal beches el king a mo tuobed er a delongelir a ruldidellel a rsechel a David. A klisichel a [Jehovah] a mo msa llomeserreng, ma klemedengei, ma duch el mo mengedereder er a re chedal. Ng mo medengelii a soal a [Jehovah] e mo meluu er ngii.” (Isaia 11:1, 2) Ngoeak a ngera el ileakl el rolel e a Dios a ousbech er a oureor el klisichel el melutk er ngike el rredemelel a mo ‘duubech er a beches el tiul,’ el ngii a Jesus Kristus el mo mengedereder er a klechad? Ngera el klengeltengat a mo er ngii er a cheungel sel omengederederel? E ngerang a kired el meruul me bo el sebeched el ngmai ngii el klengeltengat?

A Jehovah Msang a Duch er a Jesus el Mengedereder

4-6. Ngera el klou el klemedengei er a Jesus a rirellii el mo sebechel el mesiou el ua mellomes a rengul e chubechubechad el King, e ngarbab el Prist, e dirrek el Chad er a kerrekeriil?

⁴ A Jehovah a kmal soal a rechedal a bo le nguu a cherrungel el klechad er tir el okiu a ulekrael er ngike el di tang el kot el mellomes a rengul e chubechubechad el King, e Ngarbab el Prist, e dirrek el Chad er a kerrekeriil. Seikid a uchul me a Dios a ngileltii a Jesus Kristus el mo mengedereder, me ngokiu a oureor el klisichel e ngolengeseu er ngii el mo kutmokl aike el kot el meklou a ultutelel el ngerachel. Ka me bo dosaod  a bebil el uchul me a Jesus a sebechel el mo cherrungel el otaut aike el ngerachel el bla loterekokl er ngii a Dios.

⁵ A Jesus a kot el mle kmes a deleuill er ngii me a Dios. Ngika el di ta el Ngalek a di ngii el tang a medengelii a Demal e le ngmla obengkel el betok el biliol el rak. Ngar er a chelsel aikeikid el betok el rak e ngmla ngmai a cherrungel el klemedengei er ngii el kirel a Demal el Jehovah, el uchul me ngsebeched el mesaod er ngii el kmo ngii a “chokesiul a diak le meues el Dios.” (Kolose 1:15) Ngii el Jesus a dilu el kmo: “Ngikel mla mesekak a mla mesa Chedam.”​—Johanes 14:9.

⁶ A Jesus a ngike el kot el kmeed er a Jehovah, e kmal klou a klemedengei er ngii el kirel a rokui el blebelel el uldimukl er a rechad. A Kolose 1:16, 17 a melekoi el kmo: “A rokuil tekoi el ikel ngara eanged ma ikel ngara chutem, ma ikel meues ma ikel diak le meues . . . a mlara Ngalek e merruul. . . . Me ngdimla ngaruchei ra rokuil tekoi, me ngulekedelad a rokuil tekoi el ngii a uchul.” Ka di molatk er tiang! A Jesus a uluureor el obengkel a Dios el mle “ua chad er omelib el blai,” me ngmla er ngii a ngerechelel el kirel a rokui el bleob. Me tiaikid a uchul me ngkmal ungil el medengei aike el meklou me a mekekerei el tekoi el mle ketmekill er a eanged me a chutem, el omuchel er a kot el kekerei el klekedellel a beluulechad el mo lmuut er a no er a bdelul a chad. Me ngkmal bleketakl el kmo a Kristus a mera el mle kot el ungil el kerebai el kirel a llomeserreng!​—Osisechakl 8:12, 22, 30, 31.

7, 8. A Dios ngmilekerang er a lousbech er a klisichel el lolengeseu er a Jesus el kirel a omesiungel?

⁷ A Jesus a mlengilt er a Dios el okiu sel oureor el klisichel. A Jesus a dilu el kmo: “A [oureor el klisichel a Jehovah] a kiei er ngak, ele ngchileltak el kirel omerk ra ungil klumech el morar mechebuul. Ngiil [Jehovah] a ulderchak el mo mesubed el kmo, ‘Ar blebaol a mengubet, mar meiko a mo omes, mar ulsarech a mor tir a ilmokl,’ e mesubed a rak ra grazia ra [Jehovah.]” (Lukas 4:18, 19) Sel taem er a lemetecholb a Jesus e sel oureor el klisichel a Jehovah a ngilsuir el mo medengei aike el tekoi el lurruul er a uchei er a lemei er a beluulechad, el uldimukl er aike el tekoi el Jehovah a mle soal a bo loruul er a chelsel aike el taem er a omesiungel el ngar er a chutem el Messias.​—Monguiu er a Isaia 42:1; Lukas 3:21, 22; Johanes 12:50.

⁸ A Jesus a mle cherrungel a bedengel me a uldesuel el dirrek el ngiluu a klou el klisiich el uleak sel oureor el klisichel a Jehovah a uchul me ngdimlak di el kot el mesisiich e merael a chisel el chad el kiliei er a beluulechad, e ngdirrek el mle kot el klou el Sensei. Tirke el chad el ullerrenges er ngii el mengedecheduch a “kmal kilebetiekl er chosisecheklel.” (Matteus 7:28) Me a lmuut el tang, a Jesus a mle sebechel el bekeu el mengedecheduch el ouchais aike el tekoi el uchul a mondai er a klechad, el klengit me a diak el cherrungel el klechad, me a diak a ungil el klemedengei er a rechad el kirel a Dios. Ngdirrek el mle sebechel el mes aike el ngar er a rengrir a rechad me ngolengeseu er tir el oltirakl er a melemalt el rolel.​—Matteus 9:4; Johanes 1:47.

9. Ngmo uangerang a klungel a klaumerang er kau el kirel a Jesus el ngii a Mengedereder, sel mosuub el kirel aike el tekoi el dilubech er a klengar er ngii er a lengar tia el chutem?

⁹ A Jesus a kiliei el ua redi chad. A tekoi el dilubech er a klengar er ngii el ua redi chad me a kmeed el klausechelei er ngii lobengterir a rediak el mecherrungel el chad a milsang a duch er ngii el mo rredemelel a King. A apostol Paulus a milluches el kmo: “A Jesus a mle kirel mo chubechub el blak a rengul ngarbab el priist er medal a Dios, e mlo osisiu ngii mar udam er ngii ra bek el tekoi; el kirel me le ngubet a kngterir ar chad. Ele ngmlukringel e mlor ngii chomengarm, me ngsebechel ngosuterir ar ngara chelsel chomengarm.” (Hebru 2:17, 18) Me sel omeruul el Jesus a mlo melechesuar a “chomengarm” a uchul me ngsebechel el melechesuar a ringelir tirke el mo chelebangel a ongarm er a klengar er tir. Sel  klechubechub er a Jesus a mera el chilolt er a omesiungel el ngar tia el chutem. Tirke el smecher me a rechitechut me a rechelam a rengrir me a dirrek el rengalek a kmal mle beot er tir el mo er ngii el kirel a ngeso. (Markus 5:22-24, 38-42; 10:14-16) Tirke el mle songerenger el kirel a Tekingel a Dios a dirrek el kmal mle beot er tir el mo er ngii. Me nguaisei, engdi tirke el di tir el chemat er tir, e mekedidai a rengrir, me tirke el dimlak a “bltikerreng el mora Dios” er a chelsir a ultngeklii, e uluuketui er ngii e dirrek el ulemtok er ngii.​—Johanes 5:40-42; 11:47-53.

10. Nguleak a ngera el klou el rolel e a Jesus a ulechotii a bltkil a rengul el mei er kid?

¹⁰ A Jesus a tilengetengii a klengar er ngii el kired. Sel kot el klou el olechotel a kmo a Jesus a rredemelel a Mengedereder, a sel blekerdelel el kilengei el mo mad el kired el rokui. (Monguiu er a Psalm 40:6-10.) A Kristus a millekoi el kmo: “Ngdiak a chad el oba guk kloul bltikerreng er tial le bengkengkii a klengar er ngii a chad el bedul ar sechelil.” (Johanes 15:13) Nguaisei, me ngii a dimlak el ua rediak el mecherrungel el chad el mengedereder el blechoel el omulak e ousbech a bderrir er a rechad el di meruul a mo uchul a klungiolir, ngbai ngii el Jesus a tilengetengii a klengar er ngii el kirel a klechad.​—Matteus 20:28.

A Jesus a Ngike el Mlengilt el Mo Oltaut er a Klungiolel a Olubet

11. Ngera uchul me ngkmal ulterekokl a rengud e le Jesus el Ngike el Olubet el kirel a kngtid?

¹¹ A Jesus el Ngarbab el Prist a kmal rredemelel a omekrael er kid el mo melai a klungioled er a olubet el tengetengel el lekiltmeklii! El uaitiang, sera lengar tia el chutem e ngulechotii a telkib el olechotel a tekoi el bo loruul er ngii el ua Olubet el Tenget el kired er a chelsel a Ta el Telael el Rak el Omengederederel, el kid el blak a rengud a sebeched el mo oldeu a rengud el kirel. Ngulemekungil er a resmecher, e ullekiis er a rulekoad, e ulemekang er a rebetok, e dirrek el mle sebechel el mengellakl a ses el eolt. (Matteus 8:26; 14:14-21; Lukas 7:14, 15) Me a lmuut el tang, ngmirruul aika el tekoi el dimlak el di kirel a ues el kmo ngngar ngii a klisichel me a llemeltel, ngbai mirruul el olechotel a klechubechub me a bltkil a rengul el mo er a rechad. Ngii el Jesus a dilu er ngike el kemkom er a uchei er a lomekungil er ngii el kmo: “Ngsoak; me bo mklikiid.” (Markus 1:40, 41) Me ngii el Jesus a mo olecholt er a osisiu el rolel a klechubechub er a chelsel sel Ta el Telael el Rak el Omengederederel el meliuekl er a beluulechad.

12. Ngmekerang e mo mutaut sel ulaoch el ngar er a Isaia 11:9?

¹² A Kristus Jesus me tirke el mo mengedereder el obengkel a mo melemolem el olisechakl a tekingel a Dios, el ngii a miluchelii er a 2,000 el rak er a mla me mong. Misei e ngmo tmaut a tekoi el medung er a Isaia 11:9 el kmo: “A beluu a mo mui er a klemedengei er a [Jehovah] el di ua ngouaol el mui er a daob.” Tiaikid el rolel a osisechakl a ulterekokl el dirrek el mo osisecheklid el kirel a rolel a domekerreu er tia el beluulechad me aika el betok el bleob el ngar er a chelsel, el ngii a ureor el mloterekokl er a Adam er a uchelel. Me ngngar sel ulebongel er a 1,000 el rak, e sel di mla moktek er a Dios el medung er a Genesis 1:28 a mera el mo mutaut me a dirrek el sel olubet el tenget el mileketmokl a mera el mo kokedir a blals el mlo er ngii.

 Miltutk el Kirel Loukerrekeriil

13. A Jesus ngmilekerang er a lolecholt er a bltkil a rengul el kirel a llemalt?

¹³ A Kristus a “ngikel meltutk ra Dios el mo oukerrekeriil rar dingar mar mlad.” (Rellir 10:42) Ngkmal mengelaod a rengud sel dodengei el kmo a Jesus a kmal diak el sebechel el mechitikaik a uldesuel el mo meruul a mekngit, e le a llemalt me a blakerreng a di ua kmes el olekesongel el bellebel er a chelechedal! (Isaia 11:5) Ngmle bleketakl el ulechotii el kmo ngkmal chetil el tekoi a cheleblad me a ngii di el rolel a klengit, ngdirrek el uluuketui er tirke el dimlak a klechubechub er tir el mo er tirke el chormang er a chelebuul. (Matteus 23:1-8, 25-28; Markus 3:5) Me a lmuut el tang, ngii el Jesus a ulechotii el kmo ngkmal diak el sebechel el mecheblad er a blekerdelir a rechad e le ngdirrek “el mle medengelii a rengul a chad.”​—Johanes 2:25.

14. Ngoeak a ngera el rolel e a Jesus a ochotii a bltkil a rengul el kirel a melemalt el omeruul me a llemalt er chelechang, e ngera el ker a kired el di kid el oker?

¹⁴ A Jesus a dirrek el dirk melemolem el olecholt er a bltkil a rengul el kirel a melemalt el omeruul me a llemalt el oeak sel omekrael er a klou el ureor er a berkel a klumech me a osisecheklel a tekingel a Demal el meliuekl er a beluulechad er a chelecha el taem. Ngdiak a chad me a lechub e ngchelechad er a kabelment me a dirrek el diak a ngii di el mekngit el anghel el sebechel el torebengii tia el ureor me lak el meketmokl el mecherrungel el mo er sel kot el tkurrebab el soal a Dios. Me ngkmal sebeched el mo ulterekokl a rengud el kmo sel uriul er a Armageddon, e sel bliochel el llemeltel a Dios a melemolem. (Monguiu er a Isaia 11:4; Matteus 16:27.) Ka di lekau el oker el kmo: ‘Ngak, a kultirakl er a kerebil a Jesus el kirir a rechad er a chelsel a omesiungek? Ak msang a Jehovah aike el kot el ungil er ngak el mo lmuut er a klisichel a bedengek me a lmuut el betok?’

15. Ngera el tekoi a kired el melemolem el melatk er ngii me bo el sebeched el msang a Jehovah aike el kot el ungil er kid?

¹⁵ Ngkmal sebeched el mongeseu el mo mesiou er a Dios loba rengud el rokir, a lsekum e kede melemolem el omes er a ureor er a berkel a klumech el kmo ngurerel el doruul er ngii. Ngii el Jehovah a milengelechel er kid el kirel tia el ureor, ngdirrek el okiu a Ngelekel e ngomekrael er tia el ureor, e dirrek el okiu sel oureor el klisichel e ngomesterir a klisichir tirke el teloi er ngii el ureor. Me kau, ke dirrek el omes er tia el techellem el mesiou el ureor el kldemel a Dios el lobengkel a Ngelekel el kmo kmal mekreos? Me ngkmal diak a ngii di el chad el ua Jehovah el sebechel el oldurech er a rebetok er a euid el miliol el chad, el oumesingd er tir a “diak a skulir, el uar di chad,” el mo omerk er a klumech er a Renged el mo er a rechad er a chelsel a 236 el beluu.—Rellir 4:13.

Bo Mukngeltengat el Okiu a Kristus!

16. A Genesis 22:18 ngmesaod a ngerang el kirel a klengeltengat er a Jehovah?

¹⁶ A Jehovah a dilu er a Abraham el kmo: “Ma bek el beluu er a beluulchad a mo olengit er ngak el mo omekngeltengat er tir el ua kulemekngeltengat er a ruldidellel a rsechem, ele uchul e kullengesenges a tekingek.” (Genesis 22:18) Tia el belkul a tekingel a melekoi el kirir tirke el melilt el mo mesiou, e dirrek el mengebkall er a Jehovah me a Ngelekel. Me chelecha el taem e te mechesang el mesiou er Ngii e oba omelatk el kirel tiaikid el klengeltengat el le dillii a Jehovah el mo er a Abraham.

17, 18. Ngerang a telbilel a Jehovah el medung er a Duteronomi 28:2, e tiang ngera belkul el kired?

¹⁷ A Jehovah a mle ta el lolekoi er a ruldidellel a rsechel a Abraham el renged er a Israel el kmo: “Morrenges [a Llach er a telbiil er a Jehovah] el Dios er kemiu me lekor kemiu a ikal rokui el klengeltengat.” (Duteronomi 28:2) Me tia el tekoi a kmal sebechel el omeklatk er a remesiungel a Dios er a chelecha el taem. Me a lsekum e ngsoam el melai a klengeltengat er a Jehovah e ngkmal kirem el melemolem el ‘orrenges’ er Ngii, me bo el sebechel “lekor kemiu a ikal rokui el klengeltengat.” Me a leuaisei, e ngngera el tekoi a uldimukl er a ‘dorrenges’ er a Jehovah?

¹⁸ A dorrenges er a Jehovah e nguldimukl er a desichedekl er a rengud a Tekingel, me a dirrek aike el uleklatk me a ulekrael el lomeskid er a bek el blsechel. (Matteus 24:45) Ngdirrek el belkul a kmo ngkmal kired el olengesenges er a Dios me a Ngelekel. A Jesus a dilu el kmo: “Ngdiak el tirikel rokui el dmu er ngak el kmo ‘Rubak, Rubak,’ a mo soiseb ra rengedel a eanged, ngdi tirikel meruul a soal a Demak el ngara eanged a mo soiseb.” (Matteus 7:21) A dorrenges er a  Jehovah e ngbelkul a kmo a chad a kirel el kongei el mo chedal a ongdibel er a Rekristiano, el ngii el Jehovah a mla toketekii, e mla ‘mesterir a rechad a ngat,’ el tir a remechuodel er a ongdibel er ngii.—Efesus 4:8.

19. Kede mekerang e dirrek el mo sebeched el mukngeltengat?

¹⁹ Ngar er a delongelir tirka el ‘chad a ngat’ e te ngar ngii a rechedal a Chelechad er a Ruungerachel, el tir a oureor el omtechei er aike el rokui el ongdibel er a Rekristiano. (Rellir 15:2, 6) Me nguaisei, a ngii di el uldesued el kirir tirka el odam er a Kristus a kmal klou a bo loterekeklii el kirel a rolel a bo de mukerrekeriil er a chelsel tia el merael el mei el klou el ringel. (Matteus 25:34-40) Me a ta er a rolel e ngmo sebeched el ngmai a klengeltengat a oeak a bo leblak a rengud el mo er a tkurrebab el sebeched el oureor el olengeseu er tirka el ngellitel er a Jehovah.

20. (a) Ngerang a kot el klou a ultutelel el ngerechelir tirka el ‘chad el ngat’? (b) Kede mekerang e ochotii el kmo kede kmal oba omereng el saul el kirir tirka el rudam er kid?

²⁰ Tirka el ‘chad el ngat’ a dirrek el uldimukl er tir tirke el chedal a Branch Committees, me tirke el oldingel a ongdibel, me a dirrek el remechuodel er a bek el ongdibel, el tir a meltutk el mo ngmai aika el ngerachel el okiu sel oureor el klisichel a Jehovah. (Rellir 20:28) Tirka el odam a mla moterekokl er tir a kot el klou el ngerachel el mo meleketek el melisiich er a rechedal Dios “el kirel dimerkmo de rokui el mo ngara kltang ra kloumerang ma klemedengei el oumerang e medengelii a Ngelekel a Dios, el mo cherrungel chad, el mora telkelel a cherrengelel a iul a Kristus.” (Efesus 4:13) Ngkmal klemerang, tirkang a di uai kid el rokui el diak el mecherrungel, engdi kede ulterekokl el mo mukngeltengat a lsekum e kede mo oba blekongesenges el bedul tirka el mengkerengel a delebechel.​—Hebru 13:7, 17.

21. Ngera uchul me ngkmal orechudel el taem el kired el mo olengesenges er a Ngelekel a Dios?

²¹ Ngkmal di kmedung e a Kristus a mo okngemedii tia el mekngit el beluulechad er a Satan. Me ngngar seikid el taem e a klengar er kid a di mo ultuil er a kerrekerilel a Jesus, e le Jehovah a mla msang a llemeltel el mo omekrael er a “kloul seked” el mo er sel “madedok el ralm ra klengar.” (Chocholt 7:9, 16, 17) Me bo leblak a rengud el mo er a tkurrebab el sebeched el kongei el mo chederedall, e dirrek el bo doba klou el omereng el saul el mo er ngika el King, el ngii a mukrael el okiu sel oureor el klisichel a Jehovah.

Ngera Ke Siluubii er a . . .

• Isaia 11:1-5?

• Markus 1:40, 41?

• Rellir 10:42?

• Genesis 22:18?

[Aike el Ker er a Suobel]

[Siasing el ngar er a 25 el llel]

Sel omerellel a Jesus el kmal mle chubechubechad a ulebeketakl er sel taem er a lokisii a ngelekel a Jairus er a kodall

[Siasing el ngar er a 26 el llel]

A Jesus Kristus a omekrael er a kot el klou el ureor er a berkel a klumech el mla ngar ngii er a chelsel a reksi er a klechad