Ngmla Mo Diak Lemedakt er a Ulebongel

SERA ulebengelel aike el rak er a 1970, e a Gary me a Karen a mlo oumerang el kmo a ulebongel er tia el beluulechad a kmedang. Me a leuaisei, e te millukl el mo er a basio el cheroid er a mats e mlo sorir el di tir el osiik aike el rokui el ousbech el diak lultuil er a ngii di el chad me a ngii di el tekoi. Ngmle sorir el mo suobel.

Ngmle kirir el mechar a babier, e melai a klas e mo er a miting, e mengedecheduch er a rebetok el chad me bo el sebechir el ngmai aike el duch el bo lousbech. Te millalem a iasai me a 50 el mekedeb el kerrekar el lourodech. Te chiludel a betok el tane me a dongu el bo lousbech. Te milsuub el omekeroul e mengetmokl a kall. A ta er a sechelirir a ulsisecheklterir el meluk a techel a charm e meruul el mo ulekar. A Karen a milsuub el mo meduch el melangch a dellomel me a dirrek el risel er a chelsel a oreomel me bo el sebechir el mengang a bo lak a kelir. A Gary a milsuub el mo meruul a cheluchul a mesil el ousbech a mais, e meruul a stob el rruul er a deel el ousbech a idungel, e omekedechor er a blai el diak lousbech a dengki.

A Karen a dilu el kmo: “Ak mlo omdasu el kmo a klengar a di kmedung e ngmo nguemed e le ngkmal mle betok a mekngit el blekeradel el dilubech er sel taem.” A Gary a mesaod el kmo: “El uai a rebebil er a rengeasek, e ak mle blechoel el melasem el merrob a omengetukel er a delongelir a rechad, me a Mekemad er a Vietnam, me a chelebirukel el omeruul. Engdi ngdi mle mereched el mo mekurt a renguk. Ngmle sebechek el mesa klechad el kmo ngdi merael el bedul a tellemall.”

A Gary a dilu el kmo: “Ngmla er ngii a temek, me ak ngiluu a  Biblia el mei me ak menguiu er a Matteus el mo er a Chocholt. Aike el ongingil el eua el klebesei, e ak liluut el menguiu er ngii. Sel mong me ongeim el sils, e ak dilu er a Karen el kmo: ‘Kid a kiei er a uriul el sils. A Dios a kmal di kmedung e ngmo mengikiid er tia el chutem. Me ngkired el osiik er tirke el mo suobel.’ ” A Gary me a Karen a ulemuchel el merael a klechelid el osiik er tirke el sorir el mengetmokl er tir el kirel a ulebongel.

Ngdi mle mereched, e a ta er a Sioning er a Jehovah a mlo er a blirir, e ulemuchel a omesubel a Biblia el obengterir. A Karen a dirk melatk el kmo: “Ngmera el mle dmeu a renguk e le ngkmal mlo ungil a omesodel a Bades el mei er ngak. A klemerang el kirel a taem er a ulebongel a tekoi el kulsiik er ngii, e kol mocha metik er ngii. Ngmla er ngii a ulterekokl el omelatk el kirel a ngar er a medad el taem. E a lmuut el ngaruchei er aika el rokui, ngmlo sebechek el mechelii a klausechelei er ngak el obengkel a Demak el ngar er a eanged, el ngii a Ulemeob e Dios er a uldekial a eanged me a chutem.”

A Gary a dilu el kmo: “A klengar er ngak a mlo er ngii a belkul. Sera kumuchel el mesuub a Biblia, e ngdimlak el sebechek el meterob. Ak milenguiu a ulaoch er a Biblia, e mlerriter a olechotel el kmo ngmo tmaut, e mlo oumerang el kmo a Dios a di kmedung e ngmo sumechokl a rokui el tekoi. Ak ulemdasu el kmo, ‘A rechad a kirir el mengetmokl er tir el kirel sel klengar el mle soal a Dios el kired, el diak el longetmokl er tir el kirel a tellemall.’ ” A Gary me a Karen a mlo oba melemalt el uldasu el kirel a ngar er a mederir el klebesei. Te mlo ulterekokl a rengrir el kmo a Dios a mo choroid a rokui el mondai el omekringel er a klechad e mo olutii tia el chutem el lmuut el mo paradis er a bai lebekikl el kirel a ulebengelel tia el beluulechad.

Me ngerang meruul er ngii a Gary me a Karen er chelechang, el betok er a 25 el rak er a uriul? A Karen a kmo: “Ak melemolem el omekeroul er a bltkil a renguk me a klaumerang er ngak el mo er a Jehovah el Dios, e melasem el olengeseu er a rebebil el mo meruul el uaisei. Ngak me a Gary a kaingeseu me di lolemolem a telungalek er kemam el mesisiich e lengar er a kltarreng el ngar er a omengull er kemam er a Dios. Aki melasem el meruul a tekoi er a klengar er kemam me di el ungil el kltmokl e beot a rokui er ngii me bo el sebecham el otaut a osengam er a rebebil me aike el lousbech.”

A Gary a dochelii el kmo: “Ak blechoel el meluluuch el kirel a Rengedel a Dios me lemei e lebesterir a ongelaod a rebetok el miliol el chad. A bek el taem el kumerk er a ungil el chais el kirel a Rengedel a Dios el mo er a rebebil, e ak meluluuch me bo el sebechek el msang a lekesengil e ngta el chad a bebil er a omelatk el ngar er a Biblia. Ngar er aika el mereko el 25 el rak, e a Jehovah a mla onger er tia el nglunguuch. Ngak me a Karen a oumerang el kmo a Jehovah a di kmedung e ngmo remuul a meklou el omelodech er tia el beluulechad, engdi ngdikea ki medakt er a ulebongel.”​​—Matteus 6:​9, 10; 2 Petrus 3:​11, 12.

[Siasing el ngar er a 9 el llel]

A Gary me a Karen er chelechang a oldeu a rengrir el olengeseu er a rebebil el mo nguu a omelatk el ngar er a Biblia