Molisechakl er a Rengelekem

A Jeremia a Dimlak Lemeterob

NGMLA ta el mkora kmal mo mechitechut a rengum me ngsoam el stob er a omoruul er ngii el tekoi?​​— * Te betok el chad a uaisei. A ngeasek el buik el Jeremia me ngdirrek el mle uaisei. Engdi ngdimlak lebechei a lullekoi a rechad me a lurruul me leterebengii. Ka me bo dosaod el kmo ngmekerang a Jeremia e mle ileakl el chad er a osengel a Dios, engdi ngmo lmuut er ngii me ngmla er ngii a taem el soal el stob er a tekoi el lurruul er ngii.

A uchei er a lemechell a Jeremia, e a mera el Dios el Jehovah a ngileltii el mo profet el mo mengelechel er a rechad el kmo ngdimlak lomotech er a rengul a Dios. Ke medengei el kmo ngngerang dilung a Jeremia el mo er a Jehovah er a tela el rak er a uriul?​​— “Ak metitur el mengedecheduch; ak kmal dirk ngeasek.”

Omomdasu e a Jehovah ngmilekerang er a longer er a Jeremia?​​— Nguleak a blekokeuii, engdi ngmle mesisiich el rolel, e ngdilu el kmo: “Lak mdu el kmo ke kmal dirk ngeasek, bai bor tirkel chad el bo kuldurech er kau el mor tir, e mouchais er tir a ikel rokui el kdu er kau. Lak bo medakt er tir.” E ngera uchul? E le Jehovah a dilu el kmo: “Ele ngak a mo obengkem el mo mesebechakl er kau.”​—Jeremia 1:​4-8.

Engdi nguai aike el meldung er a uchei, a Jeremia a mlo mechitechut a rengul e le ngii el mildenguul el omesiungel el mo er a Dios a uchul. Ngmelekoi el kmo: “A re bek el chad a melenguul er ngak; tocherechur er ngak el chelliloil sils.” Me seikid e ngmelatk el stob er a omesiungel. Me ngdilu el kmo: “Ak mo obes er a [Jehovah] e mo diak kungedecheduch el oba ngklel.” Me ngmera el mle stob?

A Jeremia a melekoi el kmo: “Isei e a [klemechel a Jehovah] a kmard er a renguk el ua ngau; ng chelsimer er a chelsel a chiuesek. Ng mo mechitechut a bedengek a kurreked er ngii.” (Jeremia 20:​7-9) Me alta e a lebebil er a taem e a Jeremia a mlo medakt, engdi a bltikerreng er ngii el mo er a Jehovah a dimlak lebecherei me lemeterob er a omesiungel. Ka me bo desa el kmo ngmlekerang a Jeremia e mlukerreu e le ngii el dimlak lemeterob.

A Jehovah a dilu er a Jeremia me ngmo mengelechel er a rechad el kmo a Jerusalem a mo metemall a lak lolodech a omerellir. Sera louchais er tia el omengelechel a Jeremia, e a rechad a kmal mlo kesib a rengrir e melekoi el kmo: “Ngikal chad a kmal kirel mo mengai el mor a kodall.” Engdi a Jeremia a ullengit er tir me bo el “olengesenges a tekingel a RUBAK el Dios.” E dilu el kmo: “Ngdi bo modengei el kmo, a  lsekum kom mekodkak, e kemiu ma re chad er tial beluu a mo obals er a kodellel a diak a telemellel chad, ele ng RUBAK ngikel ulderchak el me melekoi a ikal rokui el tekoi el mer kemiu.” Ke medengei el kmo ngngera dilubech er a uriul?​​—

A Biblia a kmo: “Itia e a re chad ma re mengeteklir a dilu er a re prist ma re profet el kmo, ‘Ngikal chad a diak le kirel moterekokl el mor a kodall, ele ng mengedecheduch er kid el oba ngklel a RUBAK el Dios er kid.’ ” Me a Jeremia er sera lak lebecherei a dektel me leterebengii, e a Jehovah a ulemekerreu er ngii. Ka me bo desang er a chelechang el kmo ngngera dilubech el mo er a Uria, el ta er a profet er a Jehovah, el kuk mle ngodech el tekoi a lerirellii.

A Biblia a melekoi el kmo ‘ngmilengedecheduch el omtok er a Jerusalem el di ua Jeremia.’ Engdi King el Jehoiakim er a bo lekesib a rengul er a Uria, e ke medengei el kmo ngmilekerang a Uria?​​— Ngmlo medakt me ngmlo stob el meruul er a soal a Dios e chiliis el mlo er a Ekipten. Me a king a ulderecheterir a rechad el mo sikii e olutii el mo er a Jerusalem. Me sera lenguu el mong, e ke medengei el kmo ngika el mekngit el king ngmilekerang er ngii?​​— Ngmilekodir a Uria el loba saider!​—Jeremia 26:​8-24.

Ngera me ngsebechem el melekoi el kmo a Jeremia a lulemekerreu er ngii a Jehovah e a Uria a dimlak?​​— E le alta e a Jeremia a mle medakt el di ua Uria, engdi a Jeremia a dimlak el meterob el mesiou er a Jehovah e lechiis. Ngdimlak el stob. Me ngngera sebeched el suubii er a kerebil a Jeremia?​​— Kede suubii el kmo a lebebil e ngmo meringel el doruul aike el lolekoi a Dios, engdi ngkired el melemolem el ultuil a klaumerang er kid er ngii e olengesenges er ngii.

[Footnote]

Ker:

○ Ngera el ureor a lengileltii a Dios el kirel a Jeremia?

○ Ngera uchul me a Jeremia a mlo soal el stob er a omesiungel?

○ Ngera uchul me a Jeremia a mlukerreu engdi a Uria a dimlak?

○ Ngera ke silubii er a kerebil a Jeremia?