“Tirkel rokui el osiik osebechakl er kau bo ledeu a rengrir; bo le blechoel el mengitakl er a deurreng.”​—PSALM 5:11.

1, 2. (a) Ngerang a bebil er a tekoi el ngii a uchul a klengiterreng er a chelechang? (b) Me alta e a ringel me a chelebuul a mo er a rebek el chad, engdi a remera el Kristiano te dirrek el kirir el outekangel a ngerang?

 A RESIONING ER A JEHOVAH a dirrek el mo chelebangel a ringel me a chelebuul el di ua rebek el chad. A rebetok el chedal a Dios a dirrek el mla chobangel a delengerenger me a mekemad me a lmuut el bebil er a mekngit el omeruul. A telemellel a beluu me a chelebuul me a secher me a kodall a dirrek el uchul a klou el klengiterreng. Misei a uchul e a apostol el Paulus a milluches el kmo: “Kede medengei el kmo, a bleob el rokui a dul ongingd e ngara ringel ra cheroll el me lmuut er chelechang.” (Rom 8:22) Kede dirrek el mo chelebangel a betok el tekoi e le kid el diak demecherrungel. El ua lolekoi a King el David er a rechuodel el kmo: “A kngtik a mla elebak; ng ua chelungel el kmal oberaod el dikea le mechol.”​—Psalm 38:4.

² A remera el Kristiano a di ua rebek el chad el mo chobangel a ringel me a chelebuul, e dirrek el ua lechellungel er a okesiu el teluo el kerrekar. (Lukas 14:27) A redisaiplo er a Jesus a di uai ngii el muketui e mukcharm. (Matteus 10:22, 23; Johanes 15:20; 16:2) Me nguaisei, a doltirakl er a Kristus e kede ousbech er a blakerreng me a ducherreng el kiei el mengiil aike el klengeltengat el mo er ngii er a beches el beluulechad.​—Matteus 7:13, 14; Lukas 13:24.

3. Ngmekerang e mo ulterekokl a rengud el kmo a Dios a diak el soal a dekiei el di mekngit a rengud e chuarm?

 ³ Me tiang ngbelkul a kmo a remera el Kristiano a kiei el di mekngit a rengrir e diak a deurreng er a klengar er tir? Me a lechub a klengar er tir, ngkirel el di mui er a klengiterreng el mo lmuut er a ulebongel? Ngkmal diak leuaisei, ngbleketakl el kmo a Jehovah a soal a ledeu a rengud e dekiei el mengiil a otutel aike el telbilel. A Biblia a blechoel el di omelekl el mesaod er a remera el mengull er a Dios el kmo te dmeu a rengrir el chad. (Monguiu er a Isaia 65:13, 14.) A Psalm 5:11 a kmo: “Tirkel rokui el osiik osebechakl er kau bo ledeu a rengrir; bo le blechoel el mengitakl er a deurreng.” Me nguaisei, ngar er a chelsel a ringel me a chelebuul, e ngkmal sebeched el mo melechesuar a deurreng me a budech, e dirrek el kiei el ungilbesul a klengar er kid. Ka me bo desang el kmo ngmekerang a Biblia e sebechel el ngosukid el mo melechesuar a deurreng er sel taem el dechelebangel a omelsemai.

Jehovah​—A Dmeu a Rengul Dios

4. Ngmo ua ngerang a uldesuel a Dios sel lemotngakl a omengederederel?

⁴ Ka di molatk er a kerebai er a Jehovah, el Ngii a Kot el Mesisiich el Dios, el merreder er a eanged me a chutem. Ngar er ngii a rokui el tekoi er ngii e diak el lousbech er a ngii di el chad. Me alta e ngkot el mesisiich el Dios, engdi ngulterekokl el mlo mekngit a rengul er sel taem er a bo lomtok a ta er a ngelekel el anghel, el ngii a mlo Satan. Ngdirrek el kmal mle klou a letemellii er a rengul er sera bo lomtok er ngii a relmuut el bebil el anghel. Ka di molatk er a klengiterreng el blo lolechesuar er sel taem el Adam me a Eba, el tir a kot el klebokel el blebelel el ngar er tia el chutem, er a lotngeklii. Seikid el taem el me lmuut er a chelechang, e a rebetok el biliol el ruldidellel a rsechel a Adam me a Eba a melemolem el oltngakl er a omengederederel a Jehovah.​—Rom 3:23.

5. Ngera el tekoi a kmal kilengtir a rengul a Jehovah?

⁵ A ultekengel a Satan a dirk melemolem. Ngmla mo bekord el 6,000 el rak el Jehovah a omes a blekerdelir a rechad el mengull a bleob, e meruul a uldikel, e omekoad, e dirrek el meruul a deleboes. (Genesis 6:5, 6, 11, 12) Ngdirrek el orrenges a betok el blulak me a otuub el kirel a ngklel. Ngmo lmuut er a remengull er ngii me te dirrek el tomellii a rengul a lebebil er a taem. A Biblia a ouchais el kirel a taem el rechedal a kilengtir a rengul a Dios el kmo: “Ng mle telal lomtok er ngii er a le ngar a ked e rullii el mo mekngit a rengul! Ng mle betok el lolasem er ngii e ulemekringel er ngiil Chedaol Dios er a Israel.” (Psalm 78:40, 41) Ngkmal mo klou a kngtil a rengul a Jehovah a lsekum a rechedal a otngeklii. (Jeremia 3:1-10) Me ngbleketakl el kmo sel leduubech a mekngit el tekoi e ngmo uchul a kngtil a rengul a Jehovah.​—Monguiu er a Isaia 63:9, 10.

6. Ngerang mo meruul a Dios sel leduubech a mekngit el tekoi?

 ⁶ Me nguaisei, a klengiterreng me a otuub a diak el terebengii a Jehovah el mo meruul aike el soal. Sel leduubech a mekngit el tekoi, e a Jehovah a di mereched el oureor el mesmechokl er ngii. Ngdirrek el mla meruul a tekoi el kemanget el taem me bo el sebechel el mo motaut a moktek er ngii. Me ngoeak a ungil el osengel er a tekoi, e a Jehovah a dmeu a rengul el omes el bedul uchei el kirel a taem el bo lemoterekokl a omengederederel, e lemukngeltengat tirke el blak a rengrir el mesiungel. (Psalm 104:31) Me nguaisei, ngbetok a tekoi el mla meketmokl el oltuub er a ngklel a Jehovah, engdi Ngii a dirk melemolem el dmeu a rengul Dios.​—1 Timoteus 1:11; Psalm 16:11.

7, 8. Kede mekerang e oukerebai er a Jehovah sel leduubech a mondai er kid?

⁷ Ngdiak el sebeched el omekesiu er kid er a Jehovah el kirel sel dosmechokl a tekoi. Engdi ngsebeched el oukerebai er Ngii sel bo dechelebangel a ringel. Alta e ngmo mekngit a rengud sel leduubech a mondai, engdi ngdiak el kired el mechei aika el mondai me luchul e dolemolem el mekngit a rengud. E le kid a ulebeob el okesiul a Jehovah a uchul me ngsebeched el omdasu, e dirrek el ngar er ngii a llemesel a rengud el sebechel el ngosukid el mo meruul a tekoi me lemesmechokl a mondai er kid.

⁸ A ta er a klou el tekoi el sebechel el ngosukid el mo outekangel a mondai er a klengar er kid a sel dekerekikl el mes aike el tekoi el ngii a dodengei el kmo ngdiak el sebechel el di klisiched e sumechokl. E le lsekum kede di melemolem el melatk aika el tekoi, e ngsebechel el mo uchul e kede choridii sel deurreng er kid el denguu el oeak a mera el omengull. Me a uriul er a bla dolasem el mesmechokl er a mondai, e ngungil a dobes er ngii, e bai bo dekerekikl el meruul aike el sebeched el melisiich er a klereng er kid. Me a ongingil el cheldecheduch er a Biblia a sebechel el ngosukid el mo medengelii a belkul tia el tekoi.

Ngklou a Ultutelel a Delemedemek el Reng

9. A Hana ngmilekerang er a lolecholt er a delemedemek el reng?

⁹ Ka molatk er a omerellel a Hana, el ngii a mlo delal a Samuel el profet. Ngkmal mle mekngit a rengul e le ngdimlak el sebechel el mo oungalek. Ngmildenguul e le ngii el mle kebai el dil. Ngmlo er ngii a taem el kmal mlo mekngit a rengul me ngdi lmangel e chetil el omengur. (1 Samuel 1:2-7) A ta el taem er a lebo er a templo er a Jehovah, e a “Hana a kmal mle mekngit a rengul, me ng kmal lilangel er a loluluuch el mor a RUBAK.” (1 Samuel 1:10) A uriul er a louchais er a Jehovah aike el kngtil a rengul, e a ngar er a bab el prist el Eli a mlo er ngii e dilu el kmo: “Mada morael el ngar a budech, e a Dios er a Israel le beskau cho mullengit er ngii.” (1 Samuel 1:17) E le Hana el kebai el dil a uchul me ngmlo melechesuar el kmo ngmla remuul aike el sebechel. Me ngoeak tia el omerellel e ngmera el ulechotii a delemedemek el reng. Me ngmlo sebechel el “telkib el omengur el dikea le mekngit a rengul.”​—1 Samuel 1:18.

10. A Paulus ngmilleketek er a ngera el omeruul er sera lechebengelii a mondai el dimlak el sebechel el di ngii el sumecheklii?

¹⁰ A apostol el Paulus a dirrek el milleketek er a osisiu el omeruul er sera bo lolechesuar a ringel er a bedengel, el ngii a mle uchul a mondai er ngii. Ngmillekoi el kmo “ngmlera bedengek a teluol toched.” (2 Korinth 12:7) Ngdiak dodengei el kmo ngmle ngerang a rektel a Paulus, engdi ngii a riruul aike el sebechel el olengit er a Jehovah me lomekungil er ngii. A Paulus ngmle tela el taem el lolengit er a Jehovah el kirel tia el tekoi? Ngmle edei el taem. A uriul er a ongedei el taem el loluluuch, e a Dios a mileketeklii er ngii el kmo a “teluol toched” a diak el sebechel el mengai el oeak a ongasireng. Me a Paulus a kilengei er tia el tekoi e millemolem el blak a rengul el mesiou er a Jehovah.​—Monguiu er a 2 Korinth 12:8-10.

11. Ngmekerang e sebechel a nglunguuch me a ongit el ngosukid el mo outekangel a mondai er kid?

¹¹ Aika el omeruul a diak el belkul a kmo, ngmo diak doluluuch el mo er a Jehovah el kirel a mondai er kid. (Psalm 86:7) A Tekingel a Dios a bai mengelechel er kid el kmo: “Lak el sebek a rengmiu ra ngiidi le ngerang, e di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit.” Ngmekerang a Jehovah a longer a nglunguuch me a ongit? A Biblia a kmo: “Ma diak le metuk ra klemedengei rar chad el budech ra Dios a mo kokar a rengmiu ma chomelebedebekiu el ngara Kristus Jesus.” (Filipi 4:6, 7) Me nguaisei, a Jehovah a diak lengai a mondai er kid el choroid, engdi ngbai onger a nglunguched el loeak sel lebeskid a budech el mo omekerreu a  rengud me a omelebedebeked. Me a nglunguuch a sebechel el sumechokl a uldesued me kede mo kerekikl me lak debechei aika el mondai er kid me bo luchul e longesang a uldesued.

Metik a Deurreng Sel Doruul a Soal a Dios

12. Ngera uchul me ngkdekudel el tekoi a dolemolem el mekngit a rengud?

¹² A Osisechakl 24:10 a kmo: “A lsekum ke mo mechitechut sel bo le chetituokel a tekoi, e kau a mechitechut.” E a Osisechakl 15:13 a kmo: “A ungilreng a mekebekii a mad, e a klengiterreng a mengam a reng.” A rebebil el Kristiano a mlo mechitechut a rengrir e mlo diak losuub e lolebedebek er a Tekingel a Dios, el Biblia. Me a nglunguchir a ua lekea belkul, misei e te mocha meleakl er tir er a rekldemir el Kristiano. Me ngkmal bleketakl el kmo ngkdekudel el tekoi a lsekum e kede melemolem el mekngit a rengud.​—Osisechakl 18:1, 14.

13. Ngerang a bebil er a tekoi el sebechel el smisichid e dirrek el meskid a deurreng?

¹³ Engdi a lsekum e kede omes a ungil er a tekoi e ngsebechel el ngosukid el mo melelem aike el tekoi er a klengar er kid, el ngii a sebechel el mo uchul a deurreng. A David a milluches el kmo: “Dios er ngak, ng kmal soak el meruul a tekingem.” (Psalm 40:8) Me a lebo er ngii a cheleuid el tekoi er a klengar er kid, e ngdiak el kired el torebengii a mla meketmokl el temel a omengull er kid. Nguaisei, a kot el ungil el rolel e kede melemolem el dmeu a rengud a sel bo demechesang el kirel aike el tekoi el ngii a sebechel el mo uchul a deurreng. A Jehovah a ouchais er kid el kmo, ngsebeched el metik a deurreng sel deblechoel el menguiu er a Tekingel, el Biblia. (Psalm 1:1, 2; Jakobus 1:25) Me ngoeak a Chedaol el Llechukl me a miting er a Rekristiano, e ngsebeched el ngmai a “ungil tekoi” el ngii a melisiich er kid, e dirrek el mo uchul a deuil a rengud.​—Osisechakl 12:25; 16:24.

14. Ngera el tekingel a Jehovah a meskid a deurreng er a chelechang?

¹⁴ A Dios a meskid a betok el ungil el uchul e ngdmeu a rengud. A telbilel el kirel a osobel a uchul a kot el klou el deurreng. (Psalm 13:5) Kede medengei el kmo ngsebechel a ngii di el tekoi el mo duubech el me er kid er a chelechang, engdi tirke el osiik er a Dios a bo lebesterir a omeksullir er a uriul. (Monguiu er a Olisechakl 8:12.) A profet el Habakuk a lilechesii a kot el ungil el tekoi el kmo: “Ng mo lmuut ma bo lak lourodech a kerrekar el fig, ma lak a rodech el tuobed er a dellomel bilong;  e dirrek a di bo le mekngit a dellomel el olib; ma ikel sers lak lukdubech a redechel a wheat; e dirrek a di le mad a rokui el sib ma ikel blil a kerbou di bo le bechachau; me ngak a di mo mui er a deurreng e blekebek a medak, ele RUBAK el Dios a Osebelek.”​—Habakuk 3:17, 18.

‘Te Ngeltengat a Rechad el Dios er Tir a Jehovah!’

15, 16. Momasech a bebil er a sengk er a Dios el uchul a deurreng er kid er a chelechang el dekiei el mengiil aike el klengeltengat er a ngar er a medad el klebesei.

¹⁵ Me chelecha el dongiil er a merael mei el ungil el klengar, e a Jehovah a soal a dekiei el dmeu a rengud er a betok el ungil el tekoi el lomeskid. A Biblia a kmo: “Misei e ak mo medengei el kmo a di tal sebechel a chad el rullii a bo lungil a rengul e loruul er sel tkul er bab el sebechel rullii sel dirk le chad. Kede rokui el kired el mengang e melim, e oldeu a rengud er a ikel bla doureor el kirel. Ng sengk er a Dios.” (Olisechakl 3:12, 13) A doruul a ungil e ngkired el meruul a ungil el mo er a rebebil. A Jesus a dilu el kmo, ngklou a deurreng sel dorous er a bai dolai. A doruul a ungil el mo er a rengeleked me a rechad er a blid me a rechedad me a dirrek el bechid, e ngmo uchul a klou el deurreng er kid. (Osisechakl 3:27) Me a dolecholt er a bltikerreng, e doltuchakl er a remerael, e dousubes a cheleuid el omerellir a rudam me a rudos er kid, e ngmo uchul a klou el deurreng er kid, e dirrek el odeuir a rengul a Jehovah. (Galatia 6:10; Kolose 3:12-14; 1 Petrus 4:8, 9) Me sel decherrengelii a omesiunged el oba reng er a omelenget, e ngmera el mo uchul a klou el omeksaul.

¹⁶ A mla medung el tekoi el ngar er a Olisechakl a mesaod a bebil er a tekoi el uchul a deurreng er a klengar, el ua omengang me a omelim. Me nguaisei, sel bo dechelebangel a omelsemai, e ngsebeched el mo melechesuar a deurreng er aike el betok el sengk el bla lebeskid a Jehovah. El ua klebokel el ngeltel a sils, me a klebokel el beluu, me a blekerdelel a bek el bedengel a mekekerei el charm, me a lmuut el bebil er a mengasireng el blebelel, el ngii a sebeched el omes el mo uchul a deurreng er kid, el diak locheraol. Me sel domes e dolebedebek aikang, e ngsebeched el omekeroul er a bltikerreng er kid el mo er a Jehovah, e le ngii a Ngike el Omeskid a rokui el ungil el tekoi.

17. Ngera el tekoi a sebechel el mo ngubetid er a blekeradel er a diak el cherrungel el klechad? E ngera el tekoi a meskid a ongelaod er a chelechang?

¹⁷ A bltkil a rengud el mo er a Dios, me a blekongesenges er kid er a llechul, me a klaumerang er kid er a tenget el olubet a mo ngubetid er a blekeradel er a diak el cherrungel el klechad, e mekrolid el mo er a diak a ulebengelel el deurreng. (1 Johanes 5:3) Engdi chelechang, e ngsebeched el mo mechelaod sel dodengei el kmo, a Jehovah a ungil el medengei aike el tekoi el uchul a ringel me a chelebuul el me er kid. A David a milluches el kmo: “Ak mo oldeu er a renguk e mo ungil a renguk er a diak le mengodech el bltkil a rengum, ele ke milsekak er a chelebulek, e dimlak mchitak er a kerior el kmlar a chelsel.” (Psalm 31:7) Me ngoeak a bltkil a rengul el me er kid, e a Jehovah a mo osebelid er a tellemall.​—Psalm 34:19.

18. Ngera uchul me a deurreng a klou a ultutelel er a rengrir a rechedal a Dios?

¹⁸ Me a dekiei el mengiil er a otutel aike el telbilel a Jehovah, e ngkired el mo oukerebai er ngii el dmeu a rengul el Dios. Me lak debechei a mekngit el uldasu me leterebengid el melemolem er a omesiunged el mo er a Jehovah. Me sel leduubech a mondai, e bo dobang a sekutaberreng me a llomeserreng el omekrael er kid. A Jehovah a mo ngosukid el omtebechel a uldesued, e meskid a ulekrael el mo uchul e ngdiak debechei a ngii di el mekngit el tekoi me longesang a uldesued. Mada, me bo doldeu a rengud er aike el betok el ungil el tekoi el kirel a klechad me a klereng er kid el bla lebeskid a Jehovah. Me a dolemolem el olekeed er kid er Ngii, e ngmo sebeched el dmeu a rengud e le te ‘ngeltengat a rechad el Dios er tir a Jehovah!’​—Psalm 144:15.

Ngera Ke Siluub?

• Ngmekerang a doukerebai er a Jehovah sel bo dechelebangel a ringel me a chelebuul?

• Ngmekerang a delemedemek el reng e ngosukid el mo outekangel a ringel me a chelebuul?

• Kede mekerang e mo dmeu a rengud el meruul a soal a Dios er a chelsel a taem er a chelebuul?

[Aike el Ker er a Suobel]

[Siasing er a 18 el llel]

A Jehovah a kmal mekngit a rengul el omes aika el mekngit el blekeradel el dubechang

[Credit Line]

© G.M.B. Akash/​Panos Pictures

[Siasing er a 20 el llel]

A Jehovah a mla meskid a betok el ungil el uchul e ngsebeched el melemolem el dmeu a rengud