Te betok el melemalt a rengrir el chad a sorir a rebetik er a rengrir a bo lsuubii a moktek er a Dios me lebo er ngii a deurreng er a klengar er tir. A chad sel lebo er a telbilel a reng el mo mesiou er a Dios, e a rebebil, el mekekerei me a remeklou, a dul ngar er ngii a lurruul el olengeseu er sel mellomes el omelilt el meketmokl el loeak a ungil el omerellir. Choua isei el tekoi a dilubech el mo er a Jearim, el ngeasek el redil er a Mexico, el liluches aika el tekoi er a ta el sils el ileakl el ongdibel er a Resioning er a Jehovah el kmo:

“Ngkmal soak el louchais er kemiu a deuil a renguk. Hall e kumuchel el louchais er kemiu el kmo ngngera uchul. Teruich me a eai el rak er a uchei er a kmechell, e a demak me a delak a silubii a klemerang. A delak a ulengeriakl, e a uriul e ngak me a ochedak a dirrek el ulengeriakl. Aki dilak el meluluuch el mo er a Jehovah me bo el sebechel a demak el dirrek el mo merael er tia el rael el mo er a klengar. Ngmla mo chuib a teruich me a eai el rak, e chelecha el sils a kmal tokubets el sils el kiram. A demak a mo metecholb. Me ak kmal loureng a sulel a Jehovah el dimlak el nguu a ulebongel el mei er a uchei er a lduubech tia el ki msal milengiil er ngii el tekoi. Ke kmal mesaul e Jehovah!”

Aika el klemengetel a rak, e a telungalek er ngika el ekebil a ulterekokl el di millatk er a omellach el ngar er a chelsel a mlukreng el tekoi el ngar er a 1 Petrus 3:1, 2 el melekoi el kmo: “Kemiul redil, bo mchederdall rar bechemiu, ma le ngarngii er tir a diak lolengesenges a tikingel a Dios, e bo lsebechir lobult ra blekerdeliu ar becherir el cheklmuk, sel lomes a blekerdeliu el meluu e klikiid.” Me a Jearim a ulterekokl el uleltaut a tekoi el lolekoi a Duteronomi 5:16 el kmo: “Mongull er a demam ma delam, el ua ikel bla kdu er kau, ngak el RUBAK el Dios er kau.” Me a loltirakl aika el omellach e loba kllourreng el mengiil er a Jehovah a mlo uchul a klengeltengat el kirel a Jearim me a telungalek er ngii.