Ngerang a mo nguemed?

A redisaiplo er a Jesus a uleker er ngii el kmo: “Ngeral olangch a morngii kau sel mei, ma ullebongel ra taem ra belulechad?” (Matteus 24:3) Me a Jesus er a longer e ngdimlak el du el kmo tia el beluulechad a mo nguemed. A uchei e ngmilsaod el kirel a “ullebongel ra belulechad” el uluusbech a tekoi el mesaod a rokui el klechelid me a blekeradel er tia el beluulechad el chederedall er a Satan. (Matteus 13:22, 40, 49) Me tiaikid a mle belkul a tekingel er a ledu el kmo: “Ngmochu ullebongel.”​—Matteus 24:14.

Ngmilekerang a Jesus er a losaod er a ulebongel?

A ungil el chais a mo er ngii er a ulebengelel tia el chebirukel el beluulechad. A Jesus a dilu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” Ngmilsaod er a ulebongel er tia el mekngit el beluulechad el kmo: “Le isei e ngduubech a kloul ringel, el direkak le borngii ra uchelel a belulechad el me lmuut er chelechang, ma ka le borngii er chelechal mong. Chomko ngdiak le mekedeb a ikel sils, e ngdiak a tal chad el mo suobel.”​—Matteus 24:14, 21, 22.

Te rua techang a mo nguemed?

Ngdi tirke el diak el betik a rengrir e diak losiou er a Jehovah me a Jesus a mo nguemed. Tirka tirke el chad el diak lolengesenges er a Dios. A Jesus a kmo: “Le be ldum a Ngelekel a chad e ngua sel taem ra Noah. Er ser uche ra le me eeleb, . . . e dimlak lolechesiu el mo lmuut er sera le me eeleb el okngemedeterir el rokui.” (Matteus 24:36-39) A Jesus a dilu el kmo te betok a merael er a rael el mo er a telemall. Engdi ngdirrek el ulterekeklii el kmo ngar er ngii “a siseball el  mora klengar . . . ma rael er ngii a kekerei.”​—Matteus 7:13, 14.

Ngoingerang a ulebengelel tia el mekngit el blekeradel?

A Jesus a ulenger er a ker el kirel a olengchelel a demiel “ma ullebongel ra taem ra belulechad,” el kmo: “Ele ngmo kautok ar beluu mar beluu, ma renged ma renged, e morngii a bosech ma desiu er ker me ker. . . . Ma chelebirukel chomerk er ngii, misei e ngmo mekelekolt a bltikerreng rar betok.” (Matteus 24:3-12) Me a leuaisei, e aika el rokui el mekngit el chais a ngar er ngii a belkul​—el melisiich el kmo ngdi kmedung e a Rengdel a Dios a mo toketekii a budech er a delongelir a rebekongesenges el chad. A Jesus a dilu el kmo: “Me cho mesengei a ikal tekoi el mo uaisei, e bo modengei el kmo a rengedel a Dios a kmedang.”​—Lukas 21:31.

Ngera kirem el meruul?

A Jesus a dilu el kmo a Dios a “milsa dital Ngelekel, me tirkel rokui loumera er ngii a diak bo lriid, e bai mo oba diak a ullebengelel klengar.” (Johanes 3:16) Ngsebeched el mo mui el oumerang er a Jehovah me a Ngelekel sel bo dungil el medengelterir. A Jesus a dilu el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.”​—Johanes 17:3.

Bo mkerekikl me lak bechei a sebekreng me a mondai me leterebengii a ungil el blekerdelem el olecholt er a bltkil a rengum el mo er a Dios. A Jesus a kmo: “Mkekerengemiu ma rengmiu lak bo loberaod . . . [er a] ulekerreu er tial klengar, me lak dilemereched el mer kemiu sel sils el ua bedikl el omdechem er kemiu; ngmei.” A lsekum e ke oltirakl a uleklatk er a Jesus e ngmo sebechem “el chemiis era ikal mochu er ngii el tekoi.”​—Lukas 21:34-36.

A lsoam a lmuut el betok el omesodel tia el suobel e momes er a 9 el bliongel, el dai er ngii a kmo, “Kid Kede Kiei er a Chelsel a ‘Uriul Sils’?,” er a babier el What Does the Bible Really Teach? (Ngerang a Mera el Osisecheklel a Biblia?)

[Footnote]

Mirruul er a Resioning er a Jehovah.