“A kllungel a bltkil a rengul a Dios era belulechad a uchul me ngmilsa dital Ngelekel, me tirkel rokui loumera er ngii a diak bo lriid, e bai mo oba diak a ullebengelel klengar.”​—Johanes 3:16.

NGERANG A CHETITUOKL EL TEKOI? A rebebil a melekoi el kmo a Jesus a dimlak lemera el chad. Me a rebebil a kmo ngmle chad engdi ngmeketeketang er a lemad.

KE MEKERANG E SMODII SEL CHETITUOKL EL TEKOI? Moukerebai er a disaiplo el Nathanael. a A sechelil el Filipus a dilu er ngii el kmo nglocha mla metik er a Messias​​—“el Jesus ra Nazareth, el ngelekel a Josef.” Engdi a Nathanael a dimlak loumerang a tekingel a Filipus, e ngbai dilu el kmo: “Ngarngii a ngeral ungil el sebechel tuobed ra Nazareth?” Me nguaisei, engdi a Nathanael a kilengei el obengkel a Filipus el mo “mesang.” (Johanes 1:43-51) Kau a dirrek el sebechem el ngmai a klungiolem sel morriter a tekoi el kirel a Jesus. Ngera ke mo meruul?

Morriter er a ocholt er a reksi el kmo a Jesus a mera el chad. A Josephus me a Tacitus el ungil a chisir el chad er a omeluches el reksi er a kot el dart el rak a dimlak el Kristiano. Te milsaod el kirel a Jesus el kmo ngii a mle mera el chad er a irechar. A Tacitus a milluches el kirel a Emperor el Nero er a Rom el uleltelechakl er a Rekristiano er a seseb el mlo er ngii er a Rom er a 64 C.E. el kmo: “A Nero a ultelecheklterir e mlo meringel el oldechelakl er tirka el okedongall el Kristiano el kirel a blekerdelir el mle ngodech er a rebek el chad. A Kristus el uchelel a Klekristiano, a chilarm er a meringel el blals er a Pontius Pilatus, el ta er a ofiser er a omengederederel a Tiberius.”

A Encyclopædia Britannica, el 2002 Edition a mesaod er a kot me a ongerung el dart el rak el kirel a reksi er a Jesus me a rekot el Kristiano el kmo: “Aika el tekoi a olechotel a kmo a irechar e tirke el ulemtok er a Klekristiano a uluumerang el kmo a Jesus a mle mera el chad, engdi ngar er a ulebengelel aike el rak er a 1700 el mo er a 1900 e ngdilubech a klaititekangel el kirel tia el tekoi.” A babier el The Wall Street Journal er a 2002 a kmo: “A rebetok el mellomes a rengrir el chad a mla kongei el kmo a Jesus er a Nazareth a mera el mle chad er a irechar. Engdi te ngar er ngii a redi mekesai el chad el diak loumerang er a Dios, e dirrek el diak loumerang er a Jesus.”

Mosaod er a olechotel el kmo a Jesus a milekiis er a kodall. Sel taem er a lebdechemii a Jesus tirke el ulemtok, e a resechelil a chilitii e chemiis me a sechelil el Petrus a mlo medakt e uluumededenger er ngii. (Matteus 26:55, 56,  69-75) A uriul er a lebdechemii a Jesus e a rulebengkel a ulebriid. (Matteus 26:31) E di mle mereched e a redisaiplo a liluut el mo blak a rengrir er a urerir. A Petrus me a Johanes a mle bekeu el dechor er a mederir tirke el milekodir a Jesus. A redisaiplo er a Jesus a kmal mlo blak a rengrir me ngmlo sebechir el merkii tia el osisechakl er a chelsel a Renged er a Rom, e kilengei el mo mad er a bai lechitii a klaumerang er tir.

Ngerang a ta er a uchul tia el klou el ngeldechel a blekerdelir? A apostol el Paulus a milsaod er a Jesus el kmo ngmilekiis er a kodall, e “mlo duum ra Kefas, e mo duum rar truich ma terung.” E dilechelii el kmo: “E uriul er isei e ngmlo duum rar eim el dart el mor bab el odam el di dilak.” A ruumesingd er tirke el milsa okisel a Jesus a dirk kiliei er sel taem er a loluches aika el tekoi a Paulus. (1 Korinth 15:3-7) A ruumtok a sebechir el diak loumerang a tekingel a tang me a lechub e te terung el sioning. (Lukas 24:1-11) Engdi a tekingir a rebetok er a eim el dart el sioning a ochotii el kmo a Jesus a mera el milekiis er a kodall.

NGERA KEDE NGUU ER NGII? Tirke el oumerang er a Jesus e olengesenges er ngii a sebechel el musubes a kngterir e sebechel el mo klikiid a ukltkir. (Markus 2:5-12; 1 Timoteus 1:19; 1 Petrus 3:16-22) A lsekum te mad, e a Jesus a tibir el mo olekiis er tir “er sel uriul sils.”​—Johanes 6:40.

A lsoam a lmuut el omesodel, e momes er a 4 el bliongel el dai er ngii a kmo, “Ngtechang a Jesus Kristus?” me a 5 el bliongel el “A Olubet​—a Klou el Sengk er a Dios,” el ngar er a babier el What Does the Bible Really Teach? b (Ngerang a Mera el Osisecheklel a Biblia?)

[Footnote]

[Siasing er a 7 el llel]

Bo mua Nathanael el merriter a ocholt el kirel a Jesus