“Misei e morael el mora rokuil renged el rulleterir ar chad el mo Obengkek.”​—MATTEUS 28:19.

1-3. (a) Ngua ngerang a osengir a rebetok el kirel a techall el mesuub a Biblia el obengterir a rechad? (b) Ngera el ker a bo dosaod?

 ATA el odos el ngar er a ongdibel el melekoi a tekoi er a Hindi er a beluu er a Merikel a kmo, “Ak mesuub el obengkel a telungalek el mla er a Pakistan el mei el mla mo bekord el eru el buil. Aki kmal mla mo kaodengei, me ak di lmangel sel kulatk er tir el merolung. A kngtil a renguk a diak di el kirel a omerolir, e ngdirrek el sel deurreng el kulechesuar e le ak ulsisecheklterir el mo medengelii a Jehovah.”

² Kau ke ua ngike el odos el melechesuar a deurreng e le ke mesuub a Biblia el obengkel a chad? A Jesus me a redisaiplo er ngii er a kot el dart el rak a dirrek el mle dmeu a rengrir el meruul er a remo disaiplo. Sera louchais a ungil el chisel a urerir tirke el 70 el mlosisechakl er a Jesus, e ngkmal “dileu a rengul loeak a Chedaol Reng.” (Lukas 10:17-21) Me ngosisiu er a chelechang, a rebetok a ngmai a deurreng el meruul er a remo disaiplo. El ua tiang, sera 2007 e a reblak a rengrir el pabliser a milsuub a Biblia el obengterir a rebetok er a elolem el milliol el chad er a bek el buil!

³ Engdi, a rebebil el pabliser a dirkak bo lolechesuar a deurreng el mesuub a Biblia el obengterir a rechad. A rebebil a dirkak losuub a Biblia el obengterir a rechad er aika el mereko el sesei el rak. Ngera el omelsemai a dechelebangel er ngii a dolasem el mesuub el obengterir a rechad? Kede mekerang e sebeched el outekangel aikang? Ngera el klungiaol a sebeched el ngmai a dolengesenges er a tekingel a Jesus el kmo: “Misei e morael el mora rokuil renged el rulleterir ar chad el mo Obengkek”?​—Matteus 28:19.

Omelsemai el Sebechel el Tomellii a Deurreng er Kid

4, 5. (a) Ngerang a osengir a rebetok el chad el kirel a berkel a klumech? (b) Ngera el omelsemai a lechelebangel a repabliser er a bebil el beluu?

⁴ Ngar er a bebil el beluu er a beluulechad, e a rechad a kmal semeriar el melai a babilenged  e sorir el mesuub a Biblia. A teru el obekel el mla er a Australia el milsiou er a beluu er a Zambia el telkib el taem a milluches el kmo: “A chais el kirel a ungil el ureor er a berkel a klumech er a Zambia a mera el tekoi. A berkel a klumech er a rael a kmal beot, e le rechad a mei el lolengit a babier!” A ta er aika el dirk mlo merek el rak, e a rudam me a rudos er a Zambia a milsuub el obengterir a rebetok er a 200,000 el chad​—el belkul a kmo a ta el pabliser a mesuub el obengkel a tang me a lechub e te teru el chad.

⁵ Ngar er a bebil el beluu, e a repabliser a meringel er tir el merous a babier e mesuub el obengterir a rechad. E ngera uchul? E le a rechad a blechoel el dibus er a rekeblirir me a lechub e ngdiak el semeriar er a tekoi er a klechelid. Te locha mlukeroul er a telungalek el diak a klechelid er ngii, me a lechub e ngmlo chetirir a chelebirukel el omerellir a remengeteklel a klsuul el klechelid. A rebetok er tir a mla metemall a rengrir e mecheblad er a omerellir a remengeteklir. (Matteus 9:36) Me a choua tirka el chad a kora bekikl el kongei el mo mesuub a Biblia.

6. Ngera el tekoi a lechelebangel a rebebil?

⁶ A rebebil el blak a rengrir el pabliser a chelebangel a kakerous el omelsemai el ngii a sebechel el tomellii a deurreng er tir. Alta e te mle blak a rengrir er a ngar er a mong, engdi chelechang e te mechudelang me a lechub e te socherang. E dirrek el ngar er ngii a bebil el tekoi el sebechel el mo mengitechut er kid. El ua tiang, kau ke omdasu el kmo ke metitur el olsisechakl er a Biblia? Ngsebechem el mo omdasu el ua Moses er sera loderchii a Jehovah el mo mengedecheduch er a Farao. A Moses a dilu el kmo: “Mousubes e RUBAK, ele ngak a diak kungil el mengedecheduch er a seked.” (Exodus 4:10) Ngdirrek el sebeched el mo medakt e le kede omdasu el kmo kede metitur el olsisechakl, me ngdiak el sebeched el osisecheklii a chad el mo disaiplo, el uchul me ngdiak dolasem el mesuub a Biblia el obengkel a chad er a bek el techall. Kede mekerang e sumechokl aika el mla medung el omelsemai?

Moterekeklii a Rengum

7. Ngera millisiich er a Jesus el mo meruul er a urerel?

⁷ A kot e ngkirem el oterekeklii a rengum. A Jesus a dilu el kmo: “A ikel omeriokl ra reng el me tuobed a longedecheduch a ngor.” (Lukas 6:45) A Jesus a lilemelemii a omesiungel e le ngmillatk a mo klungiolir a rebebil. El ua tiang, sera lesterir a Rechijudea el mechitechetong er a klereng, e “ngkmal mlo chuub. Me ngdula rar Ubengkel el kmo, ‘A sim a klou, e ar chad el oureor a mekesai; misei e molengit era Rubak ra sim me [lodureklterir] ar chad ra ureor el kirel a sim er ngii.’”​—Matteus 9:36-38.

8. (a) Ngera el tekoi a ungil a bo dolatk er ngii? (b) Ngera sebeched el suubii er a tekingel a chad el mesuub a Biblia?

⁸ Sel deteloi er tia el ureor el meruul er a remo disaiplo, e ngungil a bo dolatk aike el klungiaol el dengilai e le a chad a milsuub el obengked. Ka di molatk er a rechad el debetik er tir sel doldingel a obliil el tir a mo sebechir el ngmai a klungiolir er tia el klumech el domerk er ngii. A ta el redil a milluches el mo er a obis er a branch el ngar er a belual el kmo: “Ngkmal soak el mereng a sulir tirke el Sioning el mesuub el obengkek. Ak medengei el kmo a lebebil er a taem e ngmo seselk a rengrir e le ngkmal betok a kerik me ngmo uchul e te blechoel el meoud el merael. Engdi te kmal klou a rengrir e semeriar el lolisechakl er ngak er aike el bla lesuub. Ak mereng a sulel a Jehovah me a Jesus el ulemekrael er tir el mei e metik er ngak.”

9. A Jesus ngulemes el bedul a ngerang, e kede mekerang a doltirakl er ngii?

⁹ Ngdiak el rokui chad el mlo oumerang a osisecheklel a Jesus a kilengei el mo oltirakl er ngii. (Matteus 23:37) A rebebil a uleltirakl er ngii el di mle telkib el taem e sola e mlo omtok a osisecheklel e “dimlekea lluut lobengkel el merael.” (Johanes 6:66) Me nguaisei, engdi a Jesus a dimlak lebechei a blekerdelir me bo lerellii  el mo omes er a berkel a klumech el ua lak a belkul. Alta e a betok el tane el lullalem a dimlak bo lourodech, engdi a Jesus a di ulemes a ungil el ureor el lurruul. Ngmilsa sers el medechang el mengiil er a omeridm me ngkmal mlo klou a deurreng er ngii. (Monguiu er a Johanes 4:35, 36.) Ngkired el mo blak a rengud el meruul er tia el ureor er a omeridm er a bai di domes er a beluad el ua ulekoad el beluu. Me bo dorriter el kmo ngmekerang e sebeched el lomelemii tia el ungil el uldasu.

Melalem e Omes el Beduluchei el kirel a Omeridm

10, 11. Ngera sebechem el rullii me lolemolem a deurreng er kau?

¹⁰ A chad er a sers a melalem a tane e omes el bedul a taem er a omeridm. Me kid a kired el omerk er a klumech el soad el omuchel a omesubel a Biblia. Ngmekerang a lsekum e ke blechoel el oldingel a obliil e meringel er kau el metik er a rechad er a blai me a lechub e ngdiak ke betik er tirke el mle semeriar? Tiang a sebechel el mo mengitechut a rengud. A leuaisei, e ngdi ungil a demeterob el oldingel a obliil? Ngkmal diak! Ngdirk sebeched el metik er a rebetok el chad el oeak tia el ureor er a odingel a obliil.

¹¹ Kau ngsebechem el lomelemii a deurreng er kau e kilungii a rolel a omomerk er a klumech el ousbech a kakerous el rolel e ke osiik er a rechad? El ua tiang, ke mla melasem el mengedecheduch er a rechad el ngar er a rael me a lechub el ngar er a urerir? Kau ngsebechem el oudengua el mo er a rechad e ouchais er a klumech er a Renged el mo er tir? Sel moutekangel el ousbech a kakerous el rolel el ngar er a omesiungem e ke mo melechesuar a deurreng sel bo betik er a rechad el semeriar er a klumech er a Renged.

 Moutekangel Sel Lak el Semeriar a Rechad

12. Ngera sebeched el rullii a lsekum a rechad er a beluad a diak el semeriar?

¹² Ngmekerang a lsekum a rechad er a beluam a diak el semeriar er a tekoi er a klechelid? Kau ngsebechem el ngodechii a rolel e ke omeksemeriar er tir? A apostol el Paulus a milluches el mo er a rekldemel er a klaumerang el ngar er a Korinth el kmo: “Ak mlo ua chad ra Judea el bedul ar Chijudea . . . E ar ngara ikrel a llach a kbedul tir el ua kngara ikrel a llach.” Ngera mle uldesuel a Paulus? Ngdilu el kmo: “E mlo uar bek el chad el bedul ar bek el chad, el leko di le ngera kung me kusobelterir ar bebil.” (1 Korinth 9:20-22) Kid ngsebeched el osiik a suobel el bo el semeriar er ngii a rechad er a beluad? A rebetok el diak a klechelid er tir a sorir a ungil el klengar er a telungalek er tir e dirrek el losiik er a moktek er a klengar. Kid ngsebeched el omerk er a klumech er a Renged er a rolel el omeksemeriar er tir?

13, 14. Ngmekerang e sebeched el meleketek a deurreng er kid er tia el ureor el meruul er a redisaiplo?

¹³ A rebetok el pabliser a mla meleketek a deurreng er tir er a ureor el meruul er a redisaiplo el mo lmuut er aike el basio el oumesingd el chad a diak el semeriar. Te milekerang? Te mlo mesuub a ngodech el omelekoi. A teru el obekel el 60 me a derengel a rekrir a mlo medengei el kmo a rebetok el telael el ngalek er a skuul el chad er a Sina me a telungalek er tir a kiei er a belurir. Ngike el sechal a kmo, “Misei a uchul me aki mlo mesuub a tekoi er a Sina. Ngmle kiram el mesuub er tia el omelekoi er a bek el sils, e tiang a mlo uchul a klou el deurreng e le aki mlo metik er a betok el chad er a Sina el mesuub er a Biblia.”

¹⁴ Me a lsekum e ngdiak el sebechem el subii a ta er a omelekoi, e ngsebechem el ousbech er sel babier el Good News for People of All Nations (Ungil el Chais el kirir a Rechad er a Bek el Renged) sel bo betik er a rechad er a ngodech el beluu. Ngdirrek el sebechem el omuus a babier el ngar er a kakerous el omelekoi. Me nguaisei, kede ousbech er a klou el taem el mo mengedecheduch er tirke el chad er a ngodech el beluu, engdi lak mobes er sel omellach el ngar er a Tekingel a Dios el kmo: “Ngikel omriid el obdois a mo meridm lobdois.”​—2 Korinth 9:6.

Ngngerechelel a Ongdibel el Rokir

15, 16. (a) Ngera uchul me a omeruul el disaiplo a ngerechelel a ongdibel el rokir? (b) Ngerang a ngerechelir a remechudela el chad?

¹⁵ A omeruul er a remo disaiplo a diak el ultuil er a urerel a di ta el chad, e ngbai ngerechelel a ongdibel el rokir. E ngera uchul? A Jesus a dilu el kmo: “Cho bo mkaubltikerreng, e te mo medengelkemiu a rokuil chad el kmo kom Obengkek.” (Johanes 13:35) A remesuub er a Biblia sel lemei er a miting, e te blechoel el mechas a rengrir er a bltikerreng er a delongelir a rudam me a rudos. A ta el mesuub er a Biblia a meluches el kmo: “Ngkmal soak el mo er aike el miting e le a rechad a kmal outkeu e mengedecheduch er ngak!” A Jesus a dilu el kmo tirke el mo oltirakl er ngii a mo muketui er a rechad er a blirir. (Monguiu er a Matteus 10:35-​37.) Me nguaisei, engdi ngtilbir el kmo ngar er a chelsel a ongdibel e ngmo er ngii a “derdart el chachisois er tial taem el blai, mar ubekul, mar uchellel, mar uchedal, ma malechub ar udos, malechub ar delal, malechub ar ngalek.”​—Markus 10:30.

¹⁶ A remechudelang el rudam me a rudos a dirrek el ngar er ngii a ngerechelir el lolengeseu er a remesuub a Biblia el lolengeriakl. Ngoeak a ngera el rolel? Alta e ngdikea el sebechir el lolisechakl er a Biblia, engdi a nger er tir er a ongdibel a sebechel el melisiich a klaumerang er tirke el lorrenges. “A kemanget el klengar a omeksullel a melemalt el chad, ma cheball el chui a krone er a klebkall” a dochelii a klebekelel a ongdibel e olechau er a remelemalt a rengrir el chad el me soiseb er a cheldebechelel a Dios.​—Osisechakl 16:31.

Mo Mesisiich er a Dakt

17. Ngera sebeched el rullii me bo lak domdasu el kmo kede metitur?

¹⁷ Ngmekerang a lsekum e ke omdasu el  kmo ke metitur el olisechakl er a Biblia? Molatk er a Jehovah el ngilsuir a Moses er a lebsang a chedaol el reng me a obekul el Aron el mlo kldemel. (Exodus 4:10-17) A Jesus a tilbir el kmo a chedaol el reng er a Dios a mo melemolem el lomekrael er a ureor er a berkel a klumech. (Rellir 1:8) E dirrek el uldercheterir a remo oureor el mle derterung. (Lukas 10:1) Me nguaisei, a lsekum e ngmeringel er kau el olisechakl er a Biblia, e moluluuch me a chedaol el reng bo lebeskau a llomeserreng e sola e bo moldingel el obengkel a chad el sebechel el ngosukau. Ngkmal melisiich a klaumerang er kid a dolatk el kmo a Jehovah a melilt er a redi chad​—“ar mechitechut ra belulechad”​—el mo churengelii tia el ileakl el ureor.​—1 Korinth 1:26-29.

18. Ngmekerang e mo diak demedakt el olisechakl er a Biblia?

¹⁸ Ngmekerang e mo diak demedakt el olisechakl er a Biblia? Ngungil a bo dodengei el kmo a omeruul er a redisaiplo a diak el ultuil er a di ta el chad, e le a Jehovah a ngike el mengurs er a rechad el mo er ngii. (Johanes 6:44) Me kid el rokui el ngar er a ongdibel a kired el mo er aike el sebeched el oleisech a tekoi er a klemerang el ngosuir ngike el mesuub el lolengeriakl. (Monguiu er a 2 Timoteus 2:15.) E ngike el mesuub a dirrek el kirel el mo oltaut aike el lesuub. (Matteus 7:24-27) Me a leuaisei engdi a lsekum a chad a mo diak losuub a Biblia el obengked e ngulterekokl el mo mekngit a rengud. Kede oureng el kmo tirke el mesuub a Biblia a mo ungil el melilt, engdi “ar derta er kid a kirir el mo mesaod er tir ra Dios.”​—Rom 14:12.

Ngerang Aika el Klengeltengat?

19-21. (a) Ngera el klengeltengat a bo dengai sel dosuub a Biblia el obengterir a rechad? (b) Ngua ngerang a osengel a Jehovah el kirir tirke el teloi er a ureor er a berkel a klumech?

¹⁹ A dolisechakl er a Biblia e ngrullid el blechoel el osiik er a Renged el kot, e dirrek el lmuut el smisiich a klemerang er a Tekingel a Dios er a chelsel a rengud me a uldesued. E ngera uchul? A ta er a mui el taem el mesiou, el Barak a ngklel, a kmo: “A dosuub a Biblia el obengkel a chad e ngrullid el lmuut el mo ungil el mesuub a Tekingel a Dios. Ak metik er ngii el kmo ngkmal kirek el melisiich er a klaumerang er ngak me bo el sebechek el mo ungil el olisechakl.”

²⁰ A lsekum e ngdiak a chad el molisechakl er ngii e ngbelkul a kmo a omesiungem a diak a ultutelel er a osengel a Dios? Ngkmal diak! A Jehovah a kmal ungil a rengul er a urered el mengebkall er ngii. Tirke el rokui el teloi er a ureor er a berkel a klumech a “kldemel a Dios.” Me a dolisechakl er a Biblia e ngmo uchul a deurreng sel desa Dios el lomekeroul er a tane el dullalem er ngii. (1 Korinth 3:6, 9) A ta el mui el taem el mesiou, el Amy a ngklel, a kmo, “Sel desa ngike el mesuub a Biblia el lolengeriakl e ngkmal mo dmeu a rengud er a techall el Jehovah a ousbech er kid el mo msang a chad tia el mekreos el sengk​—el mo medengelii a Jehovah e nguu a sengk er a diak a ulebengelel el klengar.”

²¹ Sel debo er a tkul er a bab el klisiched el olisechakl er a Biblia e ngngosukid el lomelemii a omesiunged el mo er a Dios er a chelechang e mo smisichii a omeltked er a merael el mei el beches el beluulechad. Ngoeak a ngelsuil a Jehovah, e ngmo sebeched el ngosuterir tirke el lorrenges el mo suobel. (Monguiu er a 1 Timoteus 4:16.) Ngmera el mo uchul a klou el deurreng!

Ke Dirk Melatk?

• Ngera el omelsemai a mo uchul e a rebebil a mo diak lolisechakl er a Biblia?

• Ngera sebeched el remuul a lsekum a rebetok el ngar er a beluad a diak el semeriar?

• Ngera el klengeltengat a bo dengai sel dosuub er a Biblia el obengterir a rechad?

[Aike el Ker er a Suobel]

[Siasing er a 13 el llel]

Kau ke meleketek er a rolel a omolisechakl me bo el sebechem el metik er a remelemalt a rengrir el chad?