“Mosiik er a Deuil a Rengum el Obengkel a Ekebil el Blo Bechil”

“Mosiik er a deuil a rengum el obengkel a ekebil el blo bechil . . . Rungalek, ngera me koba bltkil a rengum el omsa ngodech el redil?”​—OSISECHAKL 5:18, 20.

1, 2. Ngera uchul me ngsebeched el melekoi el kmo a rolel a ultoir er a delongelel a sechal ma bechil a mera el klengeltengat?

 A BIBLIA a bleketakl el ouchais el kirel a tekoi er a durs er a chebechiil. El ngar er a Osisechakl 5:18, 19, kede menguiu el kmo: “Me bo le ungil a rengum er a bechim e mosiik er a deuil a rengum el obengkel a ekebil el blo bechil. Ng ungil e medemedemek el ua deer. A klungiolel bo lerellau el mo ungil a rengum ma bltkil a rengul bo le iliuekl er kau.”

² Tia el tekoi el “deuil a rengum” a melutk el kirel a uchul a deurreng er a durs er a chebechiil. Ma ika el tekoi er a ultoir ma deurreng er a durs er a chebechiil er a delongelir a rebechiil el chad a mera el klengeltengat el mla er a Dios el mei. Me tia el kmal kmes el deleuill a di kirel el ngar er ngii er a chelsel a chebechiil. Misei a uchul e a King el Salomon er a irechar a milluches el ngar er a Osisechakl el kmo: “Rungalek, ngera me koba bltkil a rengum el omsa ngodech el redil? Ngera me ng soam a klungiolel a bechil a ta er a chad?”​—Osisechakl 5:20.

3. (a) Ngerang a klengiterreng el kirel a betok el chebechiil? (b) Ngerang a osengel a Dios el kirel a laokreng?

³ Sel sils er a chebechiil, e a sechal ma redil a rullii a telbiil el mo kaubltikerreng e melemolem el bechiil el mo er a ulebongel. Me nguaisei engdi, a betok el chebechiil a medort el laokreng a uchul. E a ta el omesuub a mla metik el kmo “a bekord er a 25 el basent er a rebechiil el redil ma 44 el basent er a rebechiil el sechal a mla mo er a laokreng.” Ma apostol el Paulus a milluches el kmo: “Lako mecheuid; e ar ngara deleboes, mar mesiou a bleob el chelid, mar ngara laokerreng, mar saudil, mar menguchet a raod . . . a diak bo loudiukes ra rengedel a Dios.” (1 Korinth 6:9, 10) Tiang a kmal bleketakl el tekoi. A laokreng a kmal oberaod el klengit el ngar er a osengel a Dios, ma remera el mengull a kirir el mo kerekikl me lak el rebet er tia el mekngit el omeruul. Ngerang a sebechel el ngosukid el mo “longull a chebechiil, e lak longidokel a dusall?”​—Hebru 13:4.

 Bo Mkerekikl er a Reng el Cheblad

4. Ngerang a bebil el rolel e a rebechiil el Kristiano a diak lolechesuar e omak a klausechelei er tir el ngar er a ikrel a chebechiil?

⁴ Ma uaisei el mekngit el blekeradel er a chelecha el taem a meketeklii el kirir a rebetok el chad el kmo “a mederir a mui ra laokerreng, te mlora klengit e diak bo lturk a rengrir.” (2 Petrus 2:14) Te durengrir el omak a deleuill er tir er a ikrel a chebechiielir. El ngar er a bebil el beluu, e a rebetok el redil a oureor el teloi er a resechal el mlo uchul a betok el klausechelei er a delongelir. El mo lmuut er a usbechelel a Internet me ngdirrek el mlo uchul me tirke el sekemerur el chad a mla mo sebechir el omak a klausechelei er tir el ngar er a chelsel. Ma rebetok el bechiil el chad a diak lolechesuar e mla ruebet er choua ika el bedikl.

5, 6. Ngmilekerang a ta el redil el Kristiano e kilo ngruebet er a kdekudel el blekeradel, e ngera kede suubii er ngii?

⁵ Ka molatk er a redil el Kristiano el sebeched el omekedong er ngii el kmo Mary el kileed e ngruebet er a deleboes el omeruul. A bechil, el diak el Sioning er a Jehovah, a kmal dimlak el sebechel el olecholt er a bltikerreng el bedul a telungalek er ngii. Ngika el Mary a melatk er a ta el taem er a mla me mong e ngmilengedecheduch er a ta el chad el uluureor el obengkel a bechil. Ngika el chad a kmal mle ungil a blekerdelel, e a uriul e ngkora kmal mle semeriar er a klaumerang er a Mary ma klechelid er ngii. A Mary a melekoi el kmo, “Ngkmal mle ungil a blekerdelel, el diak leua blekerdelel a bechik.” Ngdi mle mereched e tirka el terung a mlo er ngii a klausechelei er tir. Me nguaisei engdi, a Mary a millebedebek el kmo, “Ngdirkak kbo er a laokreng, ma lmuut el tang e ngika el chad a semeriar er a Biblia. Me ngbai locha sebechek el ngosuir.”

⁶ A Mary a mlo melechesuar a blekerdelel, er a uchei er a lerebet er a laokreng. (Galatia 5:19-21; Efesus 4:19) Ma ukltkel a mlo oureor me ngmlo uchul e ngmlo sumecheklii tia el blekeradel. Me tia el chisel a Mary a kmal ungil el okesiu el kirel a rengul a chad el kmo: “Ng diak a cheblad el ua ingii; ng kmal smecher me ng diak le mukar.” (Jeremia 17:9) Ma Biblia a omeklatk er kid el kmo: “Bo mkerekikl er a uldesuem, ele uldesuem a omtebechel er a klengar er kau.” (Osisechakl 4:23) Ngmekerang e mo sebeched el meruul el uaisei?

‘A Mellomes a Rengul, a Mertii’

7. Me sel dolengeseu er a chad el chelebangel a mondai er a chebechiielel, e ngera el uleklatk el mengai er Bades a sebechel el mo uchul a ulekerreu?

⁷ Ma apostol el Paulus a milluches el kmo: “Misei e ngikel omdasu el kmo ngdechor bo le kerekikl me lak bo lubuu.” (1 Korinth 10:12) Ma Osisechakl 22:3 a kmo: “A medengei a tekoi el chad a mo mesa tellemall a le mei e oibngii er ngii.” Ma leuaisei, e ngungil a lak domdasu el kmo, ‘Ngdiak el sebechel a ngii di el ngerang el me tomellak,’ e ngbai rolel a llomeserreng a dongeroid er kid er aike el blekeradel el sebechel el mo uchul a telemelled. El ua itiang, a lsekum e kau a redil e bo mkerekikl me lak mouchais a mondai er kau el di mo er a ta el sechal. (Osisechakl 11:14) Mouchais er ngike el chad el kmo a mondai er a chebechiil a kmal ungil a losaod er ngii el obengkel a bechil,  ma lechub a klou el chad er a klereng ma lechub e ngta er a remechuodel. (Titus 2:3, 4) A remechuodel er a ongdibel er a Resioning er a Jehovah a mecherei a ungil el kerebai el kirel choua itia el tekoi. Ma lsekum a elder a mocha kirel el mengedecheduch er a odos el Kristiano, e ngkirel el ngar er a basio er a buai, el ua Kingdom Hall.

8. Ngerang a kired el mo kerekikl er ngii sel dengar er a urered?

⁸ Ngar er a basio er a ureor, ma lechub a ngii di el ker, e ngkired el mo kerekikl er aike el blekeradel el sebechel el mo uchul a telemelled. El ua itiang, a lsekum e kau a redil e blechoel el mengoit er a klou el taem el oureor el obengkel a sechal e tiang a sebechel el mo uchul a ongetikaik el mo er a deleboes. Ma lsekum e kau a bechiil el sechal ma lechub e ke redil, e ngkmal kirem el meketeklii a deruchellem, el bechiil el chad, el oeak a cheldechedecham ma blekerdelem. Me kau el meluu er a Dios a uchul, me ngdiak el soam el kora olengamech ma lechub el olechau a rengrir a rechad el oeak a omengetmeklel a bedengem ma dirrek el bilem. (1 Timoteus 4:8; 6:11; 1 Petrus 3:3, 4) Ma lengar er ngii a siasing er a telungalek er kau el ngar er a urerem a dirrek el olecholt el mo er a rechad me kau el dirrek el kmo kau a bechiil el chad. Ngkmal kirel el mo ulterekokl a rengum el diak bo molisiich​—ma lechub e ke mo kongei​—a tekoi el mengetikaik el mo er a deleboes el omeruul.​—Job 31:1.

“Moldeu er a Rengum er a Klengar er Kau ma Bechim”

9. Ngera el blechebechel a tekoi a sebechel el olekes er a deleuill er a reteru el chad?

⁹ Ma domekerreu er a rengud a lmuut el klou er a di dongeroid er kid er a kdekudel el blekeradel e lemerekong. A klausechelei el moak er a ikrel a chebechiil a olecholt el kmo a chad ma bechil a diak el kerekikl er aike el ousbech a ta ma tang. Alta e a bechiil el sechal a diak longedecheduch er a bechil ma lechub a bechiil el redil a blechoel el melekoi a mekngit el mo er a bechil. Me nguaisei, a chad el ngar er a urerem ma lechub el ngar er a ongdibel er a Rekristiano a olecholt aike el blekeradel el ngii a diak el sebechem el mes er a bechim. Me tia el deleuill a kmal sebechel el di mereched el meteketek e mo meringel el meterob. Aika el blechebechel a tekoi a mla oterekeklii a klemera el tekoi er a Biblia el kmo: “Ele chad el mechitikaik a mekurs ra ikel di ngelbesel a rengul e mekesuseu.”​—Jakobus 1:14.

10. Ngmekerang a rebechiil el sechal ma rebechiil el redil a sebechir el melisiich er a deleongel er tir?

¹⁰ A rebechiil el sechal ma rebechiil el redil a kirir el oureor el olekes er a delongelir tir ma rebecherir​—el mo sebechir el chachelim ma kirel a klausechelei ma klaingeseu er a taem er a meringel el blekeradel​—er a bai losiik el mo omotech a rengrir el ngar er a ikrel a chebechiielir. Ma leuaisei, e mchoit a taem kemiu el terung el melisiich er a deleongel er kemiu. E molatk er a uchul e ko mlo kaiuetoir, e molasem el blechoel el mo melechesuar sel mekeald el bltikerreng el mulebang el bedul ngika el chad el blo bechil. Bo molebedebek er aike el ungil el taem el ble mdak el oldeu er a rengmiu. Moluluuch el mo er a Dios el kirel tia el tekoi. A David a ullengit er a Jehovah el kmo: “Momeob er a beches el chaidireng er a chelsek e Dios, e mlia beches e blak a rengul reng er a chelsek.” (Psalm 51:10) Bo moterekeklii el “moldeu er a rengum er a klengar er kau ma bechim er a bek el sils er tial . . . klengar er kau el bla le beskau a Dios.”​—Olisechakl 9:9.

11. Ngmekerang a klemedengei ma llomeserreng ma sekutaberreng a sebechel el melisiich er a chebechiil?

¹¹ Ngdiak el kired el obes er a klungel a ultutelel a klemedengei ma llomeserreng ma sekutaberreng el sebechel el melisiich er a chebechiil. A Osisechakl 24:3, 4 a kmo: “A blil a delengchokl a meteketek el ngar bebul omekedecheraol el llomeserreng ma sekutaberreng. Sel le ngar ngii a klemedengei, e a delemerab a belsiochel er a ngar ngii a ultutelel e klebokel klalo.” E aike el belsiochel el klalo el mo uchul a deurreng el ngar er a chelsel a blai a uldimukl er ngii a bltikerreng ma blakerreng ma dakt el mo er a Dios ma klaumerang. A klemedengei er a Dios a ngosukid el mo ngmai aikang. Sei a  uchul ma rubekel el bechiil a kirir el mo blak a rengrir el mesuub er a Biblia. E ua ngerang a ultutelel a llomeserreng ma sekutaberreng? A bo lsebeched el outekangel a mondai er a bek el sils a ousbech er a llomeserreng, el ngii a duch el oltaut a klemedengei er a Bades. A sekutab el chad a sebechel el medengelii a uldesuel ma ngar er a rengul a bechil. (Osisechakl 20:5) A Jehovah, el okiu a Salomon, a melekoi el kmo: “Rungalek, bo le blak a rengum el orrenges er a llemesel a renguk ma sekutaberreng er ngak.”​—Osisechakl 5:1.

El “Chuarm ra Klechad”

12. Ngera me ngdiak lemechas a rengud a domes er a rebechiil el chad el chelebangel a mondai?

¹² Ngdiak a ta el chebechiil el cherrungel. A Biblia a dirrek el melekoi el kirir a rebechiil el sechal ma redil el kmo te mo “chuarm ra klechad.” (1 Korinth 7:28) A sebekreng ma secher ma odechelakl ma kuk bebil el tekoi a sebechel el melemall a chebechiil. Sel leduubech a mondai, e ngkiriu el mo dmak el terung el ta rengmiu el osiik a rolel el mesaod er a mondai, e le tia odeuir a rengul a Jehovah.

13. Ngera el blekeradel er a klengar a kirel a bechiil el sechal ma bechiil el redil el di tir el merritel er tir?

¹³ E kuk mekerang a lsekum a chebechiil a soal el metemall e le omerellel a chad el mo er a bechil a uchul? A lsekum e ngsoad el osiik a rolel el mo sumecheklii a mondai e ngkired el mo outekangel. El ua tiang, ngsebechel a chad el mla mo smau el di meterekakl a omelekingel el mo er a bechil. (Osisechakl 12:18) El ua bla desodii er a suobel er a uchei, tiang a sebechel el mo uchul a mekngit. A osisechakl er a Biblia a kmo: “Ng bai ungil a de kiei er a ked er a de kiei el obengkel a betok a tekingel e becheremermangel a ngerel el redil.” (Osisechakl 21:19) A lsekum e kau a redil el uaisei a chebechiielem, e di lekau el oker er kau el kmo, ‘A blekerdelek nguchul e ngmeringel er a bechik el me kmeed er ngak?’ A Biblia a melekoi er a rebechiil el sechal el kmo: “Bo le betik a rengmiu rar bechemiu, e lak le mekngit a ngeriu er tir.” (Kolose 3:19) Ma lsekum e kau a bechiil el sechal, e di lekau el oker er kau el kmo, ‘A blekerdelek ngua lak a bltikerreng er ngii ma uchul e a bechik a mocha osiik a ongelaod er a kmung ker?’ Ngmera el tekoi, a deleboes a diak lemelemalt el omeruul, engdi choua ika el tekoi a sebechel el duubech ma uchul e ngkired el mesaod aika el mondai.

14, 15. Ngera uchul ma tekoi el ngar er a ikrel a chebechiil a diak el sebechel el sumechokl a mondai?

¹⁴ Ma dosiik a ongelaod er a ikrel a chebechiil a diak el sebechel el sumechokl a mondai er a chebechiil. Ma choua itia el deleuill ngsebechel el mo uchul a ngerang? Ngmo uchul a ungil el chebechiil? A rebebil a omdasu el uaisei. Te melekoi el kmo: ‘Ngika el chad a kmal soak e le ngkmal ungil a blekerdelel.’ Engdi choua itia el uldasu a di klsuul, e le a chad el mengoit er a bechil​—ma lechub el melisiich er kau el mo choitii a bechim​—a kmal diak el omekerreu er a cheledolel a chebechiil. Ngdiak el sebechel a uaisei el blekeradel el mo uchul a ungil el chebechiil.

¹⁵ A Mary, el dulsaod er ngii er a uchei, a mlo ungil el lolebedebek a tekoi el sebechel el duubech a lolemolem er tia el rael, el ngii ma lechub a kuk ta er a chad a mo tomir a kengei  er a Dios. (Galatia 6:7) Ngmelekoi el kmo: “Sera bo kungil el merritel er a uldesuek el kirel ngika el chad, e ak mlo melechesuar el kmo a lsekum e ngar er ngii a techellel ngika el chad el mo medengelii a klemerang e ngak a bai mocha melenget er ngii. A chelebirukel el omeruul a mo tomelleterir a rebetok el chad e dirrek el melibas er a rebebil!”​—2 Korinth 6:3.

A Kot el Mesisiich el Tekoi

16. Ngera bebil el tekoi el sebechel el mo duubech el oeak a diak leklikiid el omeruul?

¹⁶ A Biblia a omeklatk el kmo: “A berdel a ngerel a chelsengsang el redil a olechars el honey, ma cheldechedechal a kuk meaiu er a cheluch. Ngdi uriul e ng mechuached e kedorm el ua erebita medal el saider.” (Osisechakl 5:3, 4) Ma diak el klikiid el omeruul a sebechel el mo uchul a ringel ma kodall er a uriul. E aikang a uldimukl er ngii a meringel el ukltked ma rimbio ma rengelel a uldasu e le bechil el mla rullii a mekngit. Me tia uchul me ungil a lak dolasem er a ngii di el tekoi el sebechel el mo uchul a telemellel a chebechiieled.

17. Ngera sel kot el mesisiich el uchul me ngkired el lomelemii a blakerreng er a chebechiieled?

¹⁷ Sel kot el ngar er a bab el uchul ma laokreng a mekngit e le Jehovah, el ngii a Uchul a chebechiil e Milskid a durs er a chebechiil, a diak el kengei er ngii. Me ngoeak a profet el Malaki, e ngdmu el kmo: “Ak mer kemiu el me oukerrekeriil, e di mereched el mo chemolt el kmo ak umtok er a . . . re melaok a rengrir.” (Malaki 3:5) Ma osengel a Jehovah a medung er a Osisechakl 5:21 el kmo: “A RUBAK [el Jehovah] a mes a bek el moruul, e mes a bek el bor ngii.” Chochoi, “ma rokuil tekoi a di diak le delekedokel el ulecholt er medal, me ngkired el mesaod er kid er ngii.” (Hebru 4:13) Me sel kot el mesisiich el uchul a blakerreng el kirel a chebechiil a sel bo dodengei el kmo ngdiak a ngii di el mekngit el berrotel el tekoi ma ka leua ngera klungel a telemellel el mlo er a chad ma mlo er a rebebil, e le a diak leklikiid el rolel a durs a tomellii a deleongel er kid ma Jehovah.

18, 19. Ngera kede suubii er a Josef ma bechil a Potifar?

¹⁸ Sel kerebil a Josef, el ngelekel a rubak el Jakob, a olecholt el kmo a urunguled el soad el melemolem el budech kid ma Dios a klou a ultutelel. A ungil el blekerdelel a uchul e a Josef a ngiluu a ngar er a bab el deruchall er a blil a Potifar, el ofiser er a Farao. A Josef a dirrek el “mle ungil a teletelel e ungil a medal chad,” misei e a bechil a Potifar a kmal ngilanged er ngii. Me ngbek el sils e ngmengeluch er ngii engdi ngdimlak el sebechel. Ngera rirellii a Josef me ngmlo sebechel el otngeklii? A Biblia a ouchais er kid el kmo: “Ngdi Josef a dimlak le kengei e dilu er ngiil redil el kmo, ‘A mastang er ngak . . . me ng dirkak a ngeral diak loterekeklii er ngak e ng di kau, ele ke bechil. Ng mekera e sebechek el mo meruul er cho ua tial mekngit el tekoi e mor a klengit el omtok er a Dios?’”​—Genesis 39:1-12.

¹⁹ Me ngika el mesobil el Josef a millemolem el klikiid e le ngdimlak lekengei el mo obengkel a bechil a ta er a chad. A Osisechakl 5:15 a dmu er a rebechiil el chad el kmo: “Bo le blak a rengum er a bechim, e di le ngii el tang a le betik a rengum er ngii.” Bo mkerekikl me lak momak a rolel a klaiuetoir er a ikrel a chebechiil. Bo er sel tkurrebab el klisichem el melisiich er a bltikerreng er a chelsel a chebechiielem, e bo leblak a rengum el sumechokl a ngii di el mondai er a chebechiielem. E a ngar er a uchei er ngii el rokui “e mosiik er a deuil a rengum el obengkel a ekebil el blo bechil.”​—Osisechakl 5:18.

Ngera Ke Siluub?

• Ngmekera e a Kristiano a sebechel el obedikl er a tekoi er a ultoir?

• Ngera el uleklatk a sebechel el ngosuir a chad me ngdiak el omuchel a deleuill er a ultoir er a ikrel a chebechiielel?

• A rekaubuch el chad ngera te mo meruul sel leduubech a mondai er a chebechiil?

• Ngera sel kot el mesisiich el uchul e kede melemolem el blak a rengud er a chebechiieled?

[Aike el Ker er a Suobel]

[Siasing er a 4 el llel]

Ngklengiterreng, e le a diak lungil el rolel a klaiuetoir a sebechel el duubech er a basio er a ureor

[Siasing er a 6 el llel]

“Sel le ngar ngii a klemedengei, e a delemerab a belsiochel er a ngar ngii a ultutelel e klebokel klalo”