Te Cheloit, e Chormang, e Dirrek el Chudelang

A MENGKAR a meliuekl el meruul er a urerel er a klebesei, e diak lolechesuar a klou el tekoi el lebochu lesang. Ngar er a ikrel tia el blai el longkar er ngii, e ngmlo metik er a rubak ma bechil el ulekoad, e le te riredekekl er a mado er a blirir el ngar er a ongeai el chellibel er tia el apartment. Alta e a kodellir a kora klou el tekoi, engdi sel uchul a kodellir a lmuut el kmal mechas a rengud er ngii. A babier el mla er a bokket er ngika el rubak a kmo: “Aki mo kodebengii a klengar er kemam e le ngelekam el sechal ma bechil a di blechoel el omekcharm er kemam.”

Aike el komakai el omesodel tia el cheldecheduch a kora ngodech, engdi sel uchul a rokui el dilubech a kmal di osisiu. Nguaisei, a mekngit el omeruul el mo er a remechuodel a ngar er ngii er a beluulechad el rokir. Ka molatk er tiang:

• A ta el omesuub a kmo, a 4 el basent er a remechuodel el ngar er a beluu er a Canada a ouchais el kmo te mla chuarm a mekngit el omeruul ma cheleblad el tekoi​—el oumesingd el taem e ngngar er a rechederir el mei. Engdi, ngbetok er tirka el mechuodel a merur ma lechub e te medakt el ouchais el kirel aika el blekeradel. Me tiang a bai sebeched el kmo ngbekord el ngar er a 10 el basent e merael el mo betok er a remechuodel a chuarm aika el omeruul, el ua losaod a rechellimosk el chad.

• A babier el India Today a ouchais el kmo, “A beluu er a India a ua lekora mesisiich a delongelir a rechad er a telungalek er tir, engdi ngdiak leklemerang, e le a rebetok el ngalek a diak lomekerreu er a remechuodel el chederir er a chelechang.”

• El ua losaod a National Center on Elder Abuse el kmo, “a bekord el 1 el mo er a 2 el milliol el chad er a Merikel el 65 a rekrir el mo er a bab a mla chobangel a tellemall ma cheleblad ma mekngit el omeruul el mla er a rechad el tir a mle kirir el omekerreu er tir. A chad er a llach er a San Diego er a California, a millekoi el kirel a omengeterochel er a remechuodel el kmo “ngta er a klou el mondai er a rebulis er a chelechang.” Ngmelemolem el melekoi el kmo: “A kumes, e tia el omeruul a lmuut el mla mengal el mo klou er aika el merael el mei el rak.”

• Ngar er a Canterbury, el beluu er a New Zealand, e ngklou a sebekreng el kirir a remechuodel el tir a chormang er a rechederir el lousbech a mekngit el kar ma rrom ma ruubakutsi. A ildisel a mondai er a rak er a 2002 a di mle 65 e ngilasech el mo 107 er a rak er a 2003. A merreder er a cheldebechel el mleketmokl el olekebai er a choua itia el mondai  a melekoi el kmo tia el chais “a di kekerei el olechotel a klou el mondai.”

• A simbung er a Siabal a ouchais er a uleklatk el mla er a Japan Federation of Bar Associations el kmo, “a remechuodel a ousbech er a ulekerreu el kuk lmuut el klou er a ulekerreu el mocholt el mo er a recheterochel el ngalek ma rebecherir.” E ngera uchul? Sel simbung a kmo, e le a “omengeterochel er a remechuodel a meoud el me chemolt er a omengeterochel er a rengalek, e le a remechuodel a omdasu el kmo tir a uchul a odechelakl er a ngelekir, e dirrek a kabelment ma remerreder a dirkak lebetik er a ungil el rolel e bo lsemecheklii tia el mondai.”

Tia el kedeb el omesodel a tekoi el dubechang el ngar er a beluulechad a rullid el mo oker el kmo: Ngera uchul ma rebetok el mechuodel a di cheloit e kmal chormang? Ngar er ngii a omelatk el kmo ngmo er ngii a ungil el blekeradel? Ngera el ongelaod a ngar er ngii el kirir a remechuodel?