Moukerebai er a Kllourreng er a Jehovah

“A Rubak a diak lomekmeoud er chotutel a telbiil, . . . ngdi menglou ra rengul.”​—2 PETRUS 3:9.

1. Ngera el mengasireng el sengk a bla lebesterir a rechad a Jehovah?

 A JEHOVAH a mla meskid a klengeltengat el diak a ngii di el chad el sebechel el meskid. Ngkmal ungil e mekreos, engdi ngdiak el sebechel el mochar ma lechub e dekerekerengii. Ngmeskid a sengk er a diak a ullebengelel el klengar​—el ngar er tia el paradis el chutem el kirir a rebetok. (Johanes 3:16) Ngkol ua ngera el uchul a deurreng! Ngdikea lluut el mo er ngii aike el tekoi el uchul a klengiterreng, el ua uldikel ma kdekudel el omeruul ma chelebuul ma delengerenger ma secher ma kodall. A rechad a mo kiei el ngar er a cherrungel el budech ma kltarreng er a cheungel a omengederederel a Rengedel a Dios. Kede kmal oureng er a chouaise el Paradis!​—Isaia 9:6, 7; Chocholt 21:4, 5.

2. Ngera uchul ma Jehovah a dirkak bo lolekngemed er tia el mekngit el blekeradel er a Satan?

² A Jehovah a dirrek el omes el beduluchei el mo er sel taem el bo lrellii a chutem el mo Paradis. E le ngii el betik a rengul er a llemalt ma klikiid el omeruul. (Psalm 33:5) Ngmekngit a rengul el mesa beluulechad el diak lomekerreu e ouketui e oltngakl er a melemalt el llechul ma omerredelel a Dios e dirrek el oldechelakl er a rechedal. Me nguaisei, engdi ngar er ngii a betok el uchul e ngdirkak el bo lolekngemed er tia el mekngit el blekeradel er a Diabelong. Nguldimukl er aike el meklou el tekoi a sel llemeltel el mengedereder. Me ngoeak aikaikid el tekoi e ngmeketeklii el kmo a Jehovah a ochotii a kmal ungil el ileakl el blekerdelel el kllourreng, el ngii el blekeradel a diak lochotii a rebetok el chad er a chelecha el sils.

3. (a) Ngera belkul a “kllourreng” er a tekoi er a Griik ma Hebru el ngar er a Biblia? (b) Ngera el ker a bo dosaod er a chelechang?

³ Ngar er ngii a tekoi er a Griik el ede el taem el New World Translation a oliuid er ngii el kmo “kllourreng.” A mera el belkul a kmo “kemanget el reng” me ngblechoel el moiuid el kmo “imis el kllourreng” e mle ta el lemoiuid el kmo “killungii a rengul.” A belkul aikang el ngar er a tekoi er a Griik ma Hebru a kmo “kllourreng” el melutk er a ducherreng e meoud el ngmasech a rengul. Ngmekerang e a kllourreng er a Jehovah a mo uchul a klungioled? Ngera el suobel a desuub er a kllourreng ma ducherreng er a Jehovah ma dirrek a reblak a rengrir el mesiungel? Kede mekerang e medengei el kmo a kllourreng er a Jehovah a ngar er ngii a telkelel? Ka me bo desang.

Molatk er a Kllourreng er a Jehovah

4. A apostol el Petrus ngngerang lilechesii el kirel a kllourreng er a Jehovah?

⁴ A apostol el Petrus a milluches el kirel a kllourreng er a Jehovah el kmo: “Kemiu el betik ra renguk, kele mobes ku er tial tekoi el kmo, a tal sils er a Rubak choua tal telael rak, ma tal telael rak choua tal sils. A Rubak a diak lomekmeoud er chotutel a telbiil el ua lomdasu ar bebil rar chad el kmo ngmeoud, ngdi menglou ra rengul el kiriu, le ngchetil a lriid a tang, e bai soal cho bora bult el rokui.” (2 Petrus 3:8, 9) Moutekangel el omes aike el eru el tekoi el sebechel el ngosukid el mo medengelii a kllourreng er a Jehovah.

5. Ngmekera e a osengel a Jehovah el kirel a taem a ngar er ngii a lerellii er a urerel?

⁵ A kot el tekoi a kmo a Jehovah diak lomes a taem el ua ikid a rechad. Ngii a kiei el mo cherechar ma ta el telael el rak a di ua ta el sils. A taem a diak lorremelii ma ka lorekedii, engdi ngdiak lomekmeoud er ngii a loruul a tekoi. A llomeserreng er a Jehovah a diak a telkelel me ngmedengelii a ungil el taem el bo loureor me bo luchul a klungiolir a rokui me ngklou a rengul el mengiil er seikid el taem. Nguaisei, engdi  ngdiak el kired el melatk el kmo a Jehovah a diak lomekerreu aike el ringel el lechelebangel a remesiungel er a chelechang. Ngii a Dios er a “dmolech el klechubechub” el kmal olechotel a bltikerreng. (Lukas 1:78; 1 Johanes 4:8) Me ngsebechel el sumechokl a rokui el tekoi, el ua itia el tekoi el kmo, ngkongei a ngii di el ongarm me lengar er ngii el di tedeb.​—Psalm 37:10.

6. Ngera el tekoi a diak el kired el omdasu er ngii el bedul a Dios, e ngera uchul?

⁶ Ngulterekokl el diak lebeot a omengiil el kirel aike el desal oureng el tekoi. (Osisechakl 13:12) Ma rechad sel lemeoud el loltaut a telbilir e a rebebil a mo omdasu el kmo ngdiak er a rengrir el meruul. Ngkol ua ngera el mekngit a bo domdasu el kmo a Dios a uaisei a blekerdelel! A lsekum e ngmekngit a uldesued el kirel a kllourreng er a Dios el melatk el kmo ngmeoud, e a cherengel a taem e ngsebechel el rullid el mo oumededenger e mo moalech a rengud ma klereng er kid a mo mechitechut. Ma lmuut e kung, e ngsebeched el mo mechetikaik er a remelenguul el Petrus a melekoi el kirir el kmo te diak a klaumerang er tir. Te mededenguul e melekoi el kmo:“Ngmekera telbilel a demiel a Rubak? Sera le iit a mederir ar mla mad el demad, e a rokuil tekoi a dirrek, el dirkak le mengodech er sera uchelel er a lobeob a belulechad el mei.”​—2 Petrus 3:4.

7. Ngmekerang e a kllourreng er a Jehovah a dmak ngii ma rengul el soal a rechad a obult er a mekngit el omerellir?

⁷ A ongeru el tekoi el denguu er a tekingel a Petrus a kmo a Jehovah a klou a rengul e le ngsoal a rokui el chad a bo lobult. Tirke el melemolem el diak lobult er a mekngit el omerellir a mo mukerrekeriil er a chimal a Jehovah. Engdi, a Jehovah a diak el deu a rengul er a kodellel a mekngit el chad. Ngbai soal el omes er a rechad el obult er a mekngit el omerellir me lolemolem el di ngar. (Esekiel 33:11) Sei a uchul, e ngolecholt a kllourreng ma uchul e a ungil el chais a oberkang er a beluulechad el rokir ma rechad bo lengar er ngii a techellir el mo suobel.

8. Ngmekerang a kllourreng er a Dios a mocholt er a omerellel el mo er a renged er a Israel?

⁸ A kllourreng er a Jehovah a mocholt er a omerellel el mo er a renged er a Israel er a irechar. Ngmilechititerir me te ulerrengesmengoit er a chelsel a betok el dart el rak. Ngoeak a reprofet er ngii e ngmle blechoel el mengelechel er tir el kmo: “Mobult er a mekngit el omerelliu e moltirakl a llechuk el ikel llach el kbilsterir a re demmiu e uleak a re mesiungek el profet el mer kemiu.” Me ngera mlo rsel? Ngmekngit a rengud e le a rechad “a dimlak lorrenges.”​—2 King 17:13, 14.

9. Ngmekerang e a kllourreng er a Jesus a uleltirakl er a kllourreng er Demal?

 ⁹ E uriul, e a Jehovah a ulderchii a Ngelekel, el mle blak a rengul el olengit er a Rechijudea me lobult el mo er a Dios. A kllourreng er a Jesus a mle cherrungel el oltirakl er a kllourreng er a Demal. Ngmle medengei el kmo ngdi kmedu el mo mad, ma Jesus a lilangel el kmo: “O Jerusalem, Jerusalem, kau el omekoad rar profet, me tirkel mlodurch lekor kau cho mometech er tir ra bad lomekoad er tir! Ak mle mekudem el leko kmengudel rar ngelekem el ua dechuu el malk el mengudel rar ngelekel er cheungel chosobekel, me nguaiusei e kau a mle chetim!” (Matteus 23:37) Aika el mesisiich el tekoi a diak el tekingel a chad er a kerrekeriil el soal el omals er a chad, ngbai tekingel a ungil el chad el klou a rengul el mo er a rechad. A Jesus, el di ua Demal el ngar er a eanged, a soal a lobult a rechad me lechiis er a kerrekeriil. A rebebil a uleltirakl er a uleklatk er a Jesus me te chiliis er sel meringel el kerrekeriil el mlo er a Jerusalem er a 70 C.E.​—Lukas 21:20-22.

10. Ngoeak a ngera el rolel e a kllourreng er a Dios a sebechel el mo uchul a klungioled?

¹⁰ Ngdiak el sal mengasireng el tekoi a kllourreng er a Dios? Malta a rechad a di orrengesmengoit er a Jehovah, engdi ngii a mla mechikid ma relmuut el betok el milliol el chad a techall el mo medengelii e mo nguu a omelatk er a osobel. A Petrus a milluches el mo er a rekldemel el Kristiano el kmo:“Momdasu ra kllourreng ra Rubak er kid el kmo ngkirel chosobeliu.” (2 Petrus 3:15) Kid ngdiak doba omereng el saul el kirel a kllourreng er a Jehovah el mla meskid a rael el mo uchul a osebeled? Me bo deblechoel el meluluuch el mo er a Jehovah me lolemolem el olecholt er a kllourreng el kired sel dosiou er ngii er a bek el sils.​—Matteus 6:12.

11. A klaodengei el kirel a kllourreng er a Jehovah ngotbechid el mo meruul er a ngerang?

¹¹ Sel bo dodengelii a uchul ma Jehovah a klou a rengul, e ngosukid el mo klou a rengud el mengiil el kirel a osobel el bo lebeskid me ngmo diak dolatk el kmo ngmeoud el oltaut a telbilel. (Klengiterreng 3:26) Ma dolemolem el meluluuch me lemei a Rengedel a Dios e kede oumerang el kmo a Dios a medengelii sel ungil el taem el bo longer er a nglunguched. Kede dirrek el modubech el mo oltirakl er a Jehovah el olecholt er a kllourreng el bedul a rudam er kid me tirke el domerk er a klumech el mo er tir. Ngdiak el soad a ngii di el chad a lemetemall e ngbai soad a lobult e bo loba tia el omelatk er a diak a ullebengelel el klengar el obengked.​—1 Timoteus 2:3, 4.

Molatk er a Kllourreng er a Reprofet

12, 13. Ngmlekerang a profet el Isaia e mle sebechel el ochotii a kllourreng?

¹² Sel dolebedebek er a kllourreng er a Jehovah e ngosukid el mo olecholt a omereng el saul el kirel e mo omekeroul er ngii. Ngmeringel er a rediak lemecherrungel el chad el mo omekeroul er a kllourreng engdi ngsebechel el meketmokl. Kede mesuub er a blekerdelir a remesiungel a Dios er a irechar. A disciplo el Jakobus a milluches el kmo: “Rudam, a ltekoi ra telekangel el kirel a ringel ma ducherreng e moukerebai er tirikel profet el mlengedecheduch loba ngklel a Rubak.” (Jakobus 5:10) Ngsmisiich e cholaod a rengud sel dodengei el kmo a rebebil a mle sebechir el outekangel a tekoi el ngii a dechelebangel er a chelechang.

 ¹³ El ua tiang, a profet el Isaia a kmal luluusbech er a kllourreng el meruul er a urerel. A Jehovah a dilu er ngii el kmo: “Morael el mo mesterir a rechad tial klumech el kmo: ‘A lesal mo betok el morrenges, me kemiu a di diak bo momtab. Ma cho msal mo betok el momes, me ngdi diak bo modengei el kmo ng ngera ngar ngii.’ E sola e dilu er ngak el kmo, ‘Mruul a uldesuir tirkal chad el mo mekebelung, ma dingerir el mo mechad, ma mederir el mo meiko, me bo lak el sebechir el omes ma lechub e lorrenges ma lechub e lomtab. Ele lsekum te mo ua isei, e te mol obult el mer ngak me te mo ungil.’ ” (Isaia 6:9, 10) Malta e a rechad a dimlak lerengesii engdi nguluutekangel el omerk er a klemechel a Jehovah er a chelsel a kuk betok er a 46 el rak! Me ngdi osisiu, a kllourreng a ngosukid el mo outekangel er a urered el omerk er a ungil el chais alta e a rebetok el chad a diak lorrenges.

14, 15. Ngera ngilsuir a Jeremia el mo outekangel a ringel ma chelitechetul a reng?

¹⁴ Nguaisei a reprofet er a loruul a omesiungir e te uluutekangel e le rechad a dimlak lorrenges ma dirrek el mekngit el odechelakl a uchul. A Jeremia a mle rrengodel er a bombatel, e mlekelebus, e ulebidokl er a chelsel a chido. (Jeremia 20:2; 37:15; 38:6) Tirke el chad el lullengeseu er tir a bai mle meringel el oldechelakl er ngii. Me nguaisei, engdi a Jeremia a dimlak bo lemoalech a rengul ma ka lulemtechei a mekngit el omerellir. Ngmle klou a rengul el outekangel er a chelsel a betok el rak.

¹⁵ A odechelakl ma omelenguul a dimlak lerellii a Jeremia me di lluk, me ngdirrek el diak lerellid el mo lmuk er a chelechang. Me nguaisei, engdi ngsebechel el mo mechitechut a rengud er a chelechang. A Jeremia a mlo mechitechut a rengul me ngmilluches el kmo: “Sel bek el kungedecheduch, e ak lmangel e oldiu el kmo, Mekngit el bekeu el omeruul! Telemall! RUBAK, ak di blechoel el motuub e medenguul, ele uchul e a kumerk er a klmechem. Ngdi sel bo kdu el kmo, ‘Ak mo obes er a RUBAK e mo diak kungedecheduch el oba ngklel.’ ” Me ngera dilubech? A Jeremia ngmlo diak lomerk er a klumech? Ngdilu el kmo: “Isei e a klmechem a kmard er a renguk el ua ngau; ng chelsimer er a chelsel a chiuesek. Ng mo mechitechut a bedengek a kurreked er ngii, ele ng dikea le sebechel moreked.” (Jeremia 20:8, 9) Kede mesa el kmo sera lolatk a tekingir a remelenguul, e ngmlo diak a deurreng er ngii. Engdi sera lolatk er a klebekelel ma ultutelel sel klumech, e a deurreng er ngii a liluut el mo mesisiich. Ma dirrek a Jehovah a ulebengkel a Jeremia “el mesisiich e smiich,”el melisiich er ngii el mo omerk er a tekingel a Dios el oba blakerreng ma blekeurreng.​—Jeremia 20:11.

16. Ngmekera durrekodel er a deurreng el ngar er a ureor er a berkel a ungil el chais?

¹⁶ A profet el Jeremia ngmiltik a deurreng el ngar er a urerel? Chochoi! Ngdilu er a Jehovah el kmo: “Ke milengedecheduch er ngak mak ulerrenges a bek el tekoi. Ngak a kloklem e RUBAK el Dios el Olab a Bek el Klisiich, isei a uchul ma tekingem a milekekii a renguk er a deurreng ma klengeltengat.” (Jeremia 15:16) A Jeremia a mle dmeu a rengul er a techellel el omtechei er a mera el Dios e omerk er a tekingel. Kid me ngdirrek el sebeched el mo dmeu a rengud. Ma lmuut el tang, ngdmeu a rengud el teloi er a rechanghel el meruul er tia el ureor el mo uchul ma rebetok el chad el ngar er a beluulechad el rokir a mla kongei er a klumech er a Renged e mla obult e mocha merael er a rael el mo er a diak a ullebengelel el klengar.​—Lukas 15:10.

 “A Dechal a Rengul a Hiob”

17, 18. Ngoeak a ngera el rolel e a Job a uluutekangel e ngera dilubech?

¹⁷ Uriul er a losaod er a reprofet er a irechar, e a disciplo el Jakobus a milluches el kmo: “Ko mla rongesii a dechal a rengul a Hiob, e dirrek el mo medenge cho momes a ulisul a ikel le riruul a Rubak el mor ngii el kmo, nguangera iltetel a Rubak ra delechel a klechubechub er ngii.” (Jakobus 5:11) A tekoi er a Griik el mloiuid el kmo “dechal a rengul” a osisiu a belkul er sel tekoi el luluusbech er ngii a Jakobus er a bades. Ma losaod er a klekakerous er aika el eru el tekoi e a ta el chellimosk el chad a melluches el kmo: “Sel kot el kllourreng a mocholt sel loldechelakl er kid a rechad, e sel uriul a telekangel el ngar er a cheungel a meringel el odechelakl.”

¹⁸ A Job a uluutekangel er a klou el ringel. Ngurriid a rokui el kloklel ma rengelekel a mlad e mlo smecher er a meringel el rakt. Ngdirrek el uluutekangel a klsuul el ultelechakl el kmo a Jehovah a ulemals er ngii. A Job a dimlak el di lluk el kirel a rengelel ngbai lilangel el kirel a blekerdelel e mellekoi el kmo ngkuk lmuut el melemalt er a Dios. (Job 35:2) Nguaisei, engdi ngdimlak loridii a klaumerang ma blakerreng er ngii. Ngdimlak lolius er a Dios el di ua ledilu Satan el kmo ngmo uaisei. (Job 1:11, 21) Ngera dilubech? A Jehovah “a ulemekngeltengat er a Job er a ikel uriul el rak er a klengar er ngii el kuk ngar uchei er ser a . . . ngar a mong” (Job 42:12) A Jehovah a ullutii a klisichel a bedengel a Job e chillisois a kerruul e ulemekngeltengat er ngii er a ungil el klengar el obengterir a rebetik er a rengul. A dechal a rengul a Job a ngilsuir el mo klou a klemedengei er ngii el kirel a Jehovah.

19. Ngera kede suubii er a dechal a rengul a Job?

¹⁹ Ngera kede suubii er a dechal a rengul a Job? El uai a Job, e kede mo smecher ma lechub e kede mo chuarm a ringel. Ngdiak dungil el medengelii a uchul ma Jehovah a mechikid me kede mo chelebangel er a ringel. Engdi ngulterekokl a rengud el kmo: A lsekum kede melemolem el blak a rengud e kede mo ngmai a klengeltengat. E a Jehovah a mo mesterir a omeksullir tirke el osiik er ngii. (Hebru 11:6) A Jesus a dilu el kmo: “Ngdi ngikel outekangel el mo tmurk ra ullebongel a mo suobel.”​—Matteus 10:22; 24:13.

“Ngdi Sils ra Rubak a Mei”

20. Ngera uchul me ngulterekokl a rengud el kmo a sils er a Jehovah a mei?

²⁰ A Jehovah altang klou a rengul engdi ngdirrek el melemalt me ngdiak lebechei a chelebirukel me di lengar er ngii el mo cherechar. Ngar er ngii a telkelel a kllourreng er ngii. A Petrus a milluches el kmo: “[A Dios a] dirrek el dimlak le ngebetii sel dimla belulechad.” A Noah ma telungalek er ngii a silobel er sel beluulechad el dimlak lodengelii a Dios e mleeleb er a ralm. A Jehovah a dirrek el uluukerrekeriil er a Sodom ma Gomorra, me ngdi mlo chebechab. Aika el kerrekeriil a mlo uaisei e le ng “riruul el mo osengelir tirikel mo diak loluu ra Dios er uriul.” E tia el tekoi a kmal bleketakl er a rengud el kmo: “Ngdi sils ra Rubak a mei.”​—2 Petrus 2:5, 6; 3:10.

21. Kede mekerang a dolecholt er a kllourreng er kid ma dechal a rengud, e ngera el tekoi a bo dosaod er a ongingil el suobel?

²¹ Ma leuaisei, e me doukerebai er a kllourreng er a Jehovah e bo dolengeseu er a rebebil el mo obult me bo lesobel. Me dilerrek el bo doukerebai er a reprofet el loutekangel el omerk er a ungil el chais a bo lorrenges a rechad ma lak. Ma lmuut e kung, a lsekum kede mo ua Job el outekangel a ringel, e a Jehovah a ulterekokl el mo omekngeltengat er kid a lsekum e ngmelemolem el blak a rengud. Ngar er ngii a betok el uchul e ngdmeu a rengud er a omesiunged sel dolatk el kirel a Jehovah a lomekngeltengat er a rechedal sel loureor el omerk er a ungil el chais er a beluulechad el rokir. E tia bo desang el ngar er a ongingil el suobel.

Ke Dirk Melatk?

• Ngera ma Jehovah a olecholt er a kllourreng?

• Ngera kede suubii er a kllourreng er a reprofet?

• Ngmlekera Job er a lochotii a ducherreng, e ngera dilubech?

• Kede mekerang e medengei el kmo a kllourreng er a Jehovah a ngar er ngii a telkelel?

[Aike el Ker er a Suobel]

[Siasing er a 5 el llel]

A kllourreng er a Jesus a mle cherrungel el oltirakl er a kllourreng er a Demal

[Siasing er a 6 el llel]

A Jehovah ngmilekerang er a lomekngeltengat er a kllourreng er a Jeremia?

[Siasing er a 7 el llel]

A Jehovah ngmilekerang er a lomekngeltengat er a dechal a rengul a Job?