Sel Bo Ltaut a Uldesuel a Rengul a Dios er Tia el Chutem

A JESUS er sera losisecheklterir a redisciplo er ngii el mo meluluuch el kmo, “A uldesuel a rengum le meruul ra belulechad el ua chomerellel ra eanged,” e ngmilengedecheduch el ua chad el mla kiei er a eanged el obengkel a Chedam. (Matteus 6:10; Johanes 1:​18; 3:​13; 8:42) Uchei er a lemei er tia el chutem a Jesus, e ngmle medengelii sel taem el rokui el tekoi el dilubech er a eanged ma chutem a uleltirakl er sel soal a Dios. Aikei a mle temel a cherrengelel a ureor ma deurreng.​—⁠Osisechakl 8:​27-31.

Tirke el mle kot el blebelel a Dios a mle bleob el reng, el mesisiich el anghel. A redersta er tir ngmle sebechir el melekoi a tekingir e melilt a sorir? Chochoi, e le sera lomeob er tia el beluulechad, e tirka el “ngelekel a Dios a ulemuchel el oldiu el ngar er a deurreng.”​—⁠Job 38:⁠7.

Uruil er a lomeob er a beluulechad, e a Dios a kiltmeklii me bo lsebechir a rechad el kiei er ngii e sola e milebii a kot el sechal ma redil. Ngera mle soal a Dios el kirel a kot el demad ma delad ma rengelekir? A doltirakl er a Genesis 1:28: “E ulemekngeltengat er tir e dilu el kmo, ‘Bo le betok ar ngelekiu, mar uldidellel a resechiu bo le kiei er ker me ker er a belulechad e bo lorreder er ngii. Ak meskemiu a klisiich er omerreder ra ngikl, ma suebek el charm, ma rokuil meklou ma mekekerel tebelik el charm.”

Tia mle sel taem el mle soal a Dios a ledu el mleketmokl er a eanged ma chutem el dirrek. Engdi a ngabtechelid el omelsemai el kirel a soal a Dios a dilubech. Ngmilechelii a kemanget el taem er a klengiterreng el mlo uchul a klou el rraurreng el kirel sel soal a Dios el mo er a klechad. Me tiaikid a uchul e kid el rokui a kmal chormang. Ngera sel mle ultok?

A Uldesuel a Rengul a Dios er a Taem er a Ultok

A ta er tirke el mesisiich el anghel er a Dios a milsa techellel el mo mengesang er sel soal a Dios el kirel a klechad, e a moktek er ngii a kmo bo lsebechel el ngmai a betok el klungiaol el di kirel. Nglocha millatk el kmo a lsekum e ngmlo sebechel el rulleterir a rekot el obekel el mo orrenges er ngii er a bai lorrenges er a Dios, e seikid e a Dios a mo orrimel el mo kongei er a kuk ta er a omengedereder. Ngkmal bleketakl, ngii el ulemtok a mlokedongall er a uriul el Satan, el belkul a kmo, “Chad el Omtok.”​—⁠Job 1:⁠6.

Ma loltirakl er a ngelbesel a rengul, e a Satan a mlo er ngike el redil. Ngmilengelechel er ngii el mo obes er a soal a Dios e mo meleakl er ngii er a lolekoi el kmo: “Ngdiak bo mad . . . Ko mo mellomes a rengmiu, e mo ua ingii [el Dios] el mo medengei a ungil ma mekngit.” (Genesis 3:​1-5) El mo er ngike el redil, e tia ko er a milsa ilmokl, me ngkilengei er ngii el ua lsebechel el mo uchul a kuk ungil el blekerdelel a klengar. A uriul, e ngmilengetikaik er a bechil el mo obengkel.​—⁠Genesis 3:⁠6.

Tiang a dimlak el sel soal a Dios el kirir tirka el obekel. E mle sebechel el mo uchul a betok el mekngit el tekoi. A Dios a dimla ouchais er tir el kmo a uaisei el omeruul a sebechel el mo uchul a kodellir. (Genesis 3:⁠3) Ma lmuut el tang, e te mlo diak lemecherrungel, e a diak el cherrungel el blekeradel ma kodall a mlo er a ruldidellel a resechir. (Rom 5:12) A Satan a dimlak el sebechel el oluut aika el tekoi.

Aika el dilubech el tekoi a mlo uchul a betok el ker el mle kirel monger. Ngsebechel a klechad el mo “uai a Dios, el medengei a ungil ma mekngit,” el ua lolekoi a Satan? El ua tiang, a lsekum ngmo er ngii a ungil el ildisel a temed, ngsebeched el di kid  el mo medengei a melemalt ma diak el melemalt, a klungiaol ma diak leklungiaol, er a rokui el telengtengil a klengar er kid? A Dios ngrredemelel a cherrungel el blekongesenges er kid, e le teletelel a longedereder a kot el ungil? Ngmekera omonger aika el ker?

Ngmla er ngii a di ta el rolel a osemecheklel aika el ker er a mederir a rokui el mellomes a rengrir el bleob: A bo lebechititerir er tirke el osiik a ilmokl el di tir el mo melasem el rullii el mo ungil. A di bo lomekoad er tir e ngdiak lsebechel el sumechokl aika el ker el dilubech. A lebecherei a klechad me lolemolem el kirel a ungilbesul el taem e ngsebechel el sumechokl aika el tekoi e mo obeketakl ma rsel a mo chemolt.

Ngmlo obeketakl a rsel er sera di lekid el melilt a soad er a reksi er a klechad. Ngbekord el 1,500 el rak el ngar er a reksi er a klechad, “ngdi rokui el chad a mle mekngit el ngar medal a Dios ma kngterir a uleberk er ker me ker.” (Genesis 6:11) A melemalt el omeruul a mle usbechall me bo lsebeched el mengeluolu er tia el beluulechad er a ngemed. A Dios a rirellii a tekoi er a lodureklii a ieleb el me er a beluulechad el rokir e lolsobel er a ta el melemalt el telungalek el dirk mle ngar​—⁠el Noa, ma bechil, ma rengelekel el sechal, ma rebecherir. (Genesis 7:⁠1) Kid el rokui a uldidellel a resechir.

Ngar er a reksi er a klechad er sel taem el mei, e a Dios a mesterir a ulekrael tirke el medemedemek a rengrir el sorir el mo medengelii a soal a Dios. Aika el cheldecheduch a lluches er a chelsel a Biblia. (2 Timoteus 3:16) Ngar er a bltikerreng e ngkilengei er a reblak a rengrir el chad el mo omak a deleongel tir me ngii, e dirrek el mo sechelil. (Isaia 41:⁠8) Kede mera el oba klou el omereng el saul el kirel aika el rokui!

“A Uldesuel a Rengum Le Meruul”​—⁠el Cherrungel

Aike el bla lruul a Dios el me lmuut er a chelechang a diak el ngii a uldekial a rokui el soal el kirel a klechad. El ousbech er a bleketakl el omelekoi, e a profet el Daniel a milluches el kmo: “Me sel taem el lorreder tirke el king, e a Dios el ngar er a eanged a mo toketekii a rengedel el mo diak a ullebengelel. Misei el renged a diak a sebechel el mo mesisiich er ngii, e ng bai mo okngemed a ike el bebil er a renged el rokui e sola e ngii a mo medechel el mo cherechar.” (Daniel 2:44) Tia el ulaoch a ouchais er a ullebengelel tia el diak loureor el blekerdelel a tekoi er a chelecha el sils me sel mo mtechir el ngii a Renged ma lechub e ngkabelment er a Dios. Ngkol ua ngera el ungil el chais tiang! A mondai ma rechorecherreng el mekekii tia el beluulechad er a chelecha el sils el obengkel a uldikel el ngii a dirrek el sebechel el rullii tia el beluulechad el mo nguemed a ta er a klebesei e ngmo tekoi er a ngar er a mong.

Ngoingerang e ngmo duubech aika el tekoi? A redisciplo er a Jesus a uleker el kmo: “A ikal tekoi ngmorngii er choingerang, e ngeral olangch a morngii kau sel mei, ma ullebongel ra taem ra belulechad?” A telengtengil a nger er ngii, e a Jesus a dilu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.”​—⁠Matteus 24:​3, 14.

Ngbleketakl er a buai el kmo tia el ureor er a berkel a klumech a loruul er ngii er a beluulechad el rokir. Sel Renged el ledilu Jesus el kmo ngkired el omerk er ngii a tiaikid el osisiu el Renged el lullisechakl er kid el mo meluluuch el kirel el ngar er sel kerebai el nglunguchel el kmo: “A rengedem le mei, ma uldesuel a rengum le meruul re belulechad el ua chomerellel ra eanged.” (Matteus 6:⁠10) Chochoi, tiaikid el Renged a di chimo el tekoi el bo lousbech er ngii a Dios el mo merekui aike el moktek er ngii, ma ike el soal el kirel a klechad me tia el beluulechad.

Tiang ngera belkul? Becherei Chocholt 21:​3, 4 me longer el kmo: “E rirengesii a kloul ngor el mlara kingall el melekoi el kmo, ‘Mesang, a blil a Dios chobenterir ar chad. Me ngii me ngmo obenterir el kiei, me te mo chad er ngii, ma Dios a di ngii el mo obenterir; e mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.’ ” Seikid e a soal a Dios a ulterekokl el mo meketmokl er a chutem ma eanged el cherrungel. * Ngdiak el soam el mo teloi er tia el tekoi?

[Footnote]