A blil ongdibel, ngmlengai er ker?

A TEKOI el “blil ongdibel” a mengai er a tekoi er a Grik el belkul a kmo “kldibel” me a lechub a “rechad el mo dmak.” Tia el ngakl a uaisei e le blil ongdibel a mle blechoel el basio er a osisechakl me a omengull er a rechad er a Judea er a irechar el mei. Aike el Bades el tekoi er a Hebru a diak a kmal bleketakl el omesodel a blil ongdibel er ngii, engdi ngsebeched el mesa er aike el Bades el tekoi er a Grik el kmo a chouaika el basio a mla er ngii er a taem er a rekot el Kristiano.

A ruumesingd el chellimosk a oumerang el kmo aika el blil ongdibel a ulemuchel el mo er ngii er sel taem er a leblebaol a rechad er a Judea er a Babilon. A Encyclopaedia Judaica a mesaod el kmo: “Tirka el Blebaol, a dimlak a Templo er tir, e mlara ngodech el beluu, e uluusbech a ongelaod el kirel a ringel el lechilebangel, me a lebebil er a taem e te mo dmak, el locha sel temel a Ulengull el Sils, e menguiu a Bades.” Me sera bo lemimokl er a klsibai, e tirka el chad er a Judea a millemolem el mo dmak el meluluuch e menguiu a Bades e milleketek a blil ongdibel er aike el basio el lebo er ngii.

Me sera taem er a rekot el Kristiano, e aika el blil ongdibel a mlo basio el lebo er ngii a rechad er a Judea el kirel a tekoi er a klechelid me a tekoi er a buai el meliuekl er a Mediteranea, me a Middle East, me a dirrek el chelsel a beluu er a Israel. A Professor Lee Levine er a The Hebrew University of Jerusalem a melekoi el kmo: “[A blil a ongdibel] a mle basio el lebo er ngii el kirel a omesuub, me a blengur er a chedaol sils, me a tekoi er a kerrekeriil, me a omengudel el udoud el olengeseu, me a miting el kirel a tekoi er a balatiks me a tekoi er a buai.” Ngdirrek el dilu el kmo: “E sel kot el ngaruchei er ngii a mle kirel a tekoi er a klechelid.” Sei a uchul me ngdiak lemechas a rengud el kmo a Jesus a mle blechoel el mora blil ongdibel. (Markus 1:21; 6:2; Lukas 4:16) Ngar isei, e ngullisechakl e millisiich er tirke el mla er ngii. Me a uriul er a lebo er ngii a ongdibel er a Rekristiano, e a apostol el Paulus a dirrek el mirruul el uaisei el ulemerk er a klumech el ngar er a blil ongdibel. Me tirke el mle semeriar er a tekoi er a klereng a mlora blil ongdibel, me a Paulus sel bo el siseb er a mats, e ngomuchel el mora blil ongdibel e omerk er a klumech er isei.​—Rellir 17:1, 2; 18:4.