Ke Medengei el Kmo Ngerang?
Ngmilekera chad e melib er a omerollel el ngar er a diall er a ngar er a mong?
A OUMESINGD el taem, e ngdimlak a diall el oltak er a rechad er sel taem er a Paulus. Me a chad a mle kirel el oker er a rebebil el kmo ngmla er ngii a diall el mo er sel basio el lebo er ngii e dirrek el kongei el oltak er a rechad. (Rel. 21:2, 3) Ngmo lmuut me a lsekum a diall a diak lebo er sel basio el soal ngika el chad el mo er ngii, e ngmo er a bdelulachang er sel beluu e kuk osiik er a lmuut el ta er a diall el mo kmeed er sel beluu el soal el mo er ngii.—Rel. 27:1-6.
A temel a omerollel a diall a ngar ngii er a bek el rak, e diak a kmal ulterekokl el temel aika el omerael. A rechad er a diall a sebechir el torebengii a omerollel a diall e le ngkngtil a eanged me a dirrek el olangch el lomes e omlaoch, el ua charm el reborb er a tkul a diall, me a lechub e te mesa diall el mla meteruud. Me a rechad er a diall a omes er a klungiolel a eanged e mo sebechir el merael. Me a lsekum a chad a metik er a diall el sebechel el otekir, e ngmo er a bdelulachang el olab a kloklel e mengiil el mo er sel taem el tuobed a subed el kmo ngmla mo temel a omerael.
A chad er a reksi el Lionel Casson a melekoi el kmo: “A beluu er a Rom a mla er ngii a beot el rolel e a rechad a metik er a diall el sebechir el mo ngmasech er ngii me ngdiak di lorael el osiik er a diall. A bdelulachang a mlara Omoachel Tiber. Ngar er a mats er a Ostia e ngmla er ngii a oberberk el basio el mla er ngii a betok el obis er ngii. A betok er aika el obis a mle obis er a rechad el oudiall el mlara betok el bdelulachang, el rechad er a diall er a Narbonne [beluu er a France er chelechang] a mla er ngii a obis er tir, me a rechad er a diall er a Carthage [beluu er a Tunisia er chelechang] a mla er ngii a obis er tir, me a lmuut el bebil. Me a ngii di el chad el osiik a diall el bo lengasech er ngii a sebechel el mora ta er aika el obis e sikii a diall el mo er sel basio el soal mo er ngii.”
A omerael el ngar er a diall a dimlak lousbech er a klou el taem engdi ngmla er ngii a telemellel. A lebebil er a taem el ngar er a omerollel a Paulus el missionari e ngmlara diall el milteruud.—2 Ko. 11:25.
