NGKMAL betok a kakerous el uldasu el kirel a klengar me a kodall. A rebebil a omdasu el kmo sel lemad a chad engdi melemolem el ngar el oeak a kuk ta er a rolel me a blekeradel me a lechub e ngkuk mo kiei er a ta er a basio. E a rekuk bebil a omdasu el kmo te mad e kuk lmuut el mo ngar engdi ngkuk ngodech a blekerdelel a klengar er tir. E a rekuk bebil a omdasu el kmo a kodall a ulebengelel a rokui el tekoi.

Engdi nglocha kuk ngodech a klaumerang er kau el kirel tiang, e le ngoltirakl er a rolel a klengar me a lechub a siukang el kau a mlukeroul er ngii. Me a leuaisei el kmal betok a kakerous el uldasu el kirel a kmo ngera duubech el mo er a chad sel lemad, e ngmo duubech a ker el kmo, ngar er ngii a chad me a lechub e kede mo er ker e metik er a mera el nger er tia el ker el kmal omekerrau a rengrir a rechad?

Ngkmal mla mo betok el rak el remengeteklel a klechelid a olisechakl el kmo a klengar er a chad a di melemolem er a uriul er a lemad. Me a rechedal a oumesingd el meklou el klechelid el leko te Kristiano me a Hindu me a Judea me a Moslem me a lmuut el bebil a oumerang er tia el tekoi el kmo a chad sel lemad engdi melemolem el kiei el kuk ngar er a ta er a basio. Me a rechad er a Buddhist a kuk omdasu el kmo a chad sel lemad e ngkuk mechell el ta er a bedengel a bleob me a lechub e ngklisiich me a lechub e ngklisiich el di ngar a uldesuel a chad el okedongall el Nirvana.

Me ngoeak a chouaika el osisechakl, e a klou el ildois er a rechad el meliuekl er a beluulechad a oumerang el kmo, a kodall a msa techellel a chad el mad e mo soiseb er a kuk ta er a rolel a klengar er a chelsel a ta er a beluulechad. Me ngar er a uldesuir a rebetok el chad e te omdasu el kmo, a kodall a kmal klou a ultutelel el bakes er a klengar er kid a rechad, e dirrek el rulleterir el mo omdasu el kmo a Dios a kongei er a kodall. Engdi ngera omesodel a Biblia el kirel tia el tekoi? Moutekangel el menguiu er tia el ongingil el suobel. Ke ulterekokl el kmal mo mechas a rengum er a nger er tia el tekoi.