Ungil me a Mekngit: Biblia Kmal Sebeched el Ultuil er Ngii
Ngdiak el sebechel mo ulterekokl a rengud el kmo a omelilt er kid a mo ungil kired a lsekum e ngdi ultuil er aike el domelechesiu me aike el lomelechesiu a rechad. A Biblia ouchais er a uchul me ngdiak el sebeched el di ultuil er aikang. Engdi ngmeskid a lmuut el betok. Ngngosukid el mo medengelii a ungil me a mekngit, e tia ngosukid el mo er ngii a deurreng er a klengar er kid.
ULEKRAEL EL DOUSBECH ER NGII
Ngar er a Biblia e a Jehovah a el Dios ouchais el kmo a rechad ulebeob el kirir el ultuil er ngii el kirel a ulekrael, el dimlak lobeob el di tir el omekrael er tir. (Jeremia 10:23) Sei a uchul me ngmla meskid a ulekrael er a Biblia el kirel a ungil me a mekngit. Ngkmal betik a rengul er a rechad e diak el soal a deruul a mekngit el omelilt el ngii a mo ochau a ringel me a tellemall el mei er kid. (Duteronomi 5:29; 1 Johanes 4:8) A ngaruchei er ngii, ngii oba llomeserreng me a klemedengei el dousbech er ngii el mo ungil melilt. (Psalm 100:3; 104:24) Me nguaisei engdi kmal diak bo lorrimel er kid el mo kiei el oltirakl a llechul.
A Jehovah milsa kot el sechal me a redil el Adam me a Eva aike el rokui el lousbech me bo lsebechir el mera el mo dmeu a rengrir. (Genesis 1:28, 29; 2:8, 15) Ngdirrek el milsterir a tekoi el kirir el oltirakl. Me nguaisei engdi ngmilechititerir me te di tir el melilt el kmo te mo olengesenges me a lechub e ngdiak. (Genesis 2:9, 16, 17) Ngklengiterreng e le Adam me a Eva ngileltii el mo di tir el oltirakl aike el sorir er a bai llechul a Dios. (Genesis 3:6) Me ngngera mla duubech? A rechad nglmuut el ungil a klengar er tir le te di tir el melilt el kmo ngngera ungil me a mekngit? Ngdiak, a reksi meketeklii el kmo sel doltngakl a llechul a Dios e ngdiak el beskid a budech me a deurreng.—Olisechakl 8:9.
A Biblia meskid a ulekrael el dousbech el mo ungil melilt el diak el ior er a basio el dekiei er ngii me a lechub e ngtelungalek er kid. (2 Timothy 3:16, 17; momes er a baks el “ Babier el Mora Rokui el Chad.”) Molatk er a rolel e a Biblia meruul er tiang.
Msuub a lmuut el betok el kirel a uchul me a Biblia a melemalt a dolekoi el kmo ng “tekingel a Dios.”—1 Thesalonika 2:13. Momes er a video el Who Is the Author of the Bible? el ngar er a jw.org.
ROLEL E A BIBLIA OLECHOLT A ULEKRAEL ER A DIOS
A Biblia ouchais er kid omerellel a Jehovah el mora rechad er a uchelel el mei. Aike el llechukl er ngii a ngosukid el mo mtab aike el lomes a Dios el kmo ngungil me a mekngit, aike el mo uchul a klungioled me a telemelled. (Psalm 19:7, 11) Kede suub omellach er ngii el ngosukid el mo ungil melilt er a klengar er kid er a bek el sils.
El ua tiang, molatk er a ulekrael el debetik er ngii er a Osisechakl 13:20: “Mosuub er a re mellomes a rengrir el chad me bo le mellomes a rengum. Cho mousechelei er a re mekebelung el chad e ke mo metemall.” Tia el omellach a klemerang el kired er chelechang e klemerang er a irechar. A Biblia mui er a omellach el kmal ngosukid.—Momes er a baks el “ Ulekrael er a Biblia Dirk Oureor.”
Engdi ke locha melatk, ‘Ngmekera mo ulterekokl a renguk el kmo a ulekrael er a Biblia dirk oureor er chelecha el taem?’ Ongingil suobel a mo mesaod a bebil lolechotel a kmo ngkmal dirk oureor er chelecha el taem er kid.
a A Jehovah a ngklel a Dios.—Exodus 3:14, footnote.
