A Jesus er a lebo er a Bethania el ngar bita er a Jerusalem, e a sechelil er a Lasarus a mla mo eua el klebesei er a lemad. Me ngulebengkel a Martha me a Maria el tir a ruchedal ngika el mlad el mo er a debull. Ngar seikid el taem e a rechad a mocha kldibel. Ngsebechem el melechesuar a deurreng el lulebang a Martha me a Maria er sel taem el Jesus a ulekisii a Lasarus?​—Monguiu er a Johanes 11:21-24, 38-44.

A Martha a mle medengelii a ungil chais el kirir a rulekoad. Ngmle medengei el kmo a Jehovah a mo olekiis er a rulekoad el lmuut el mo kiei er tia el chutem.​—Monguiu er a Job 14:14, 15.

A rechad a ulebeob er a chutem. (Genesis 2:7; 3:19) Me sel demad e ngdiak a kmung ngerang el ngar er a chelsed el tuobed e melemolem el ngar. A no er a bdelud a mo diak loureor me ngmo diak el sebeched el omdasu. Sei a uchul me a Lasarus a dimlak a omesodel el kirel a kodall e le rulekoad a diak a ngera el lolechesuar.​—Monguiu er a Psalm 146:4; Olisechakl 9:5, 6, 10.

A Dios ngomekcharm er a rechad er a beluu er a ngau er a uriul er a kodall? A Biblia a olecholt el kmo a rulekoad a diak lolechesuar a ngii di el ngerang, me tiang a belkul a kmo a beluu er a ngau a klsuul el osisechakl el oltuub er a Dios. A chouaitia el osisechakl a kmal mekngit er a osengel.​—Monguiu er a Jeremia 7:31.

A rulekoad a diak el sebechir el mengedecheduch me a ka lorrenges. (Psalm 115:17) Engdi te ngar er ngii a remekngit el anghel el meruul er tir el ua tirke el mla mad el chad e mengedecheduch er a rechad. (Jude 6) Me a leuaisei, e a Jehovah a kmal chetil a dolasem el mengedecheduch er a rulekoad.​—Monguiu er a Duteronomi 18:10, 11.

A rebetok el miliol el chad el tir a mla mad a mo mekiis el mo kiei er tia el chutem. Ngmo lmuut er tirke el dimlak lodengelii a Dios e mirruul a mekngit el tekoi me te dirrek el mo mekiis.​—Monguiu er a Psalm 37:29; Rellir 24:15.

Tirke el mo mekiis er a kodall a mo sebechir el mesuub er a klemerang el kirel a Dios e mo olecholt a klaumerang er tir er a Jesus el oeak sel lolengesenges er ngii. (Ocholt 20:11-13) E tirke el mekiis e meruul a ungil el tekoi a mo sebechir el oldeu a rengrir er a diak a ulebengelel el klengar el ngar tia el chutem.​—Monguiu er a Johanes 5:28, 29.

A Dios er a lodureklii a Ngelekel el me mad el kired e ngmlo uchul a omelatk el kirir a rulekoad. Me a okiis a olechotel a bltkil a rengul a Jehovah me a krasia er ngii. Me sel lebekiis a rulekoad, e ngtecha ngike el kmal soam el mo mesang?​—Monguiu er a Johanes 3:16; Rom 6:23.