Aki meruul a babier el ngar er a kuk betok er a 750 el omelekoi, me bo el sebecham el omerk er a ungil chais el mo er a “bek el bedengir a re chad, ma kebliil, ma omelekoi, ma beluu.” (Ocholt 14:6) Aki mekerang e kutmeklii tia el meringel el ureor? Aki meruul er tiang el oeak a ngeso er tirke el meluches a babier me a reblak a rengrir el chad el oliuid a babier, el tir a rokui el Sioning er a Jehovah.

A kot el omelechesel a meketmokl el tekoi er a Merikel. A Chelechad er a Ruungerachel a oungerachel er a urerel a Writing Department el ngar er sel klou el obis er kemam. Tia el department a omekrael a urerir tirke el meluches el mesiou el ngar er tia el obis me a kuk bebil er a obis er a Resioning er a Jehovah. Te kakerous el chad a meluches aika el babier a uchul me ngsebecham el mesaod el kirel a tekoi el lesemeriar er ngii a rebek el chad.

A omelechesel a modurokl el mo er a ruliuid a babier. A uriul er a bla bo lungil tia el babier, e ngmodurokl el okiu a computer el mo er tirke el oliuid el ngar er a beluulechad el rokir, me bo el sebechir el oidii. Te melasem el ousbech a tekoi el sebechel smodii a belkul a tekoi er a Merikel el ngar er a omelekingir.​—Olisechakl 12:10.

Ngmereched el meketmokl el okiu a computer. A computer a diak el sebechel el kutmokl a ureor el loruul a rechad er a omeluches me a ruliuid a babier. Nguaisei, engdi ngoeak sel lousbech a computer e ngsebechel el mereched el meketmokl a urerir. A Resioning er a Jehovah a rirellii a Multilanguage Electronic Publishing System (MEPS). Ngoeak tiang, e ngsebechir el otuu a betok el bedengel a omelekoi, e odak a siasing er ngii, e remuul me bo el sebechel el kltmokl el mo print.

Ngera uchul me aki melemolem el meruul er tia el ureor alta e a bebil er a omelekoi a di kesai el telael el chad a ousbech er ngii? E le a Jehovah a soal “a rokui el chad a bo le sobel e bo lodengelii a klemerang.”​—1 Timothy 2:3, 4.

• Ngua ngerang a teletelel a omelechesel a babilengam?

• Ngera uchul me aki oliuid a babilengam el ngar er a betok el omelekoi?