Onra boso tata ku boso mama, pa asina boso por biba largu riba e tera ku Yehova, a boso Dios, ta bai duna boso.—Éksodo 20:12, Tradukshon di Mundu Nobo.

 “Onra bo tata i bo mama, pa bo dianan wòrdu prolongá den e tera ku SEÑOR bo Dios ta duna bo.”—Éksodo 20:12, Beibel Santu.

 Dios a manda e israelitanan di antigwedat onra nan mayornan. E promesa ku el a mara na e mandamentu ei, esta, ku nan lo por biba largu, a duna nan mas motibu pa obedesé e mandamentu. Aunke hende kristian no tin ku obedesé Lei di Moises, esta, e leinan ku Dios a duna e israelitanan, Dios su normanan no a kambia. E bèrdatnan básiko riba kua e leinan ei ta basá te awe ta bálido ainda, i p’esei nan ta importante pa hende kristian.—Kolosensenan 3:20.

 Yunan—sin importá nan edat—ta onra nan mayornan ora nan ta respetá nan i obedesé nan. (Levítiko 19:3; Proverbionan 1:8) Despues, asta ora e yunan bira adulto i tin nan mes famia, nan ta sigui stima nan mayornan i yuda nan. Por ehèmpel, nan ta hasi sigur ku nan mayornan ta sigui haña bon kuido ora nan edat subi, i asta ta yuda nan finansieramente si ta nesesario.—Mateo 15:4-6; 1 Timoteo 5:4, 8.

 Tuma nota ku yu israelita mester a onra nan tata i tambe nan mama; asina nan a rekonosé e papel importante ku mama tin den famia. (Proverbionan 6:20; 19:26) Awe tambe, yu mester hasi meskos.

 Pero e mandamentu pa onra bo mayornan tabatin sierto eksepshon. Yu israelita no mester a obedesé nan mayornan—ni niun otro hende—si esei a nifiká desobedesé Dios. (Deuteronomio 13:6-8) Awe tambe, nos “tin ku obedesé Dios na promé lugá, i no hende.”—Echonan 5:29.

 Den e leinan ku Dios a duna Israel, el a primintí ku yu ku onra nan mayornan lo tin bida largu i ku lo bai bon ku nan den e tera ku Dios a duna nan. (Deuteronomio 5:16) Di e manera ei, nan lo a evitá di haña mesun kastigu ku yu adulto ku no a kumpli ku Dios su lei i ku a rebeldiá kontra nan mayornan. (Deuteronomio 21:18-21) Tempu a pasa, pero e bèrdatnan básiko tras di e leinan ei no a kambia. (Efesionan 6:1-3) Sin importá ki edat nos tin, nos mester duna kuenta i rason na nos Kreador. I Dios lo kumpli ku su promesa: Yu ku ta obedesé Dios i nan mayornan lo tin bida largu. Es mas, nan tin e speransa di biba pa semper.—1 Timoteo 4:8; 6:18, 19.

 E mandamentu na Éksodo 20:12 ta okupá un lugá klave riba e lista di Dies Mandamentu. Kon asina? (Éksodo 20:1-17) E mandamentunan promé kuné ta papia di e obligashonnan ku e israelitanan tabatin ku Dios, por ehèmpel, ku nan mester a adorá Dios so. E mandamentunan despues di dje ta papia di e obligashonnan ku e israelitanan tabatin ku otro hende, por ehèmpel, ku nan mester tabata fiel na nan kasá i no hòrta. P’esei, tin hende ta mira e mandamentu pa “onra bo tata i bo mama” manera un brùg, pasobra ora nos obedes’é, nos ta kumpli tantu ku nos obligashon ku Dios komo ku nos obligashon ku otro hende.