Barbulètè tin mester di e kalor di solo pa keinta su múskulonan promé ku e por kuminsá bula. Pero, riba un dia ku ta nublá, e barbulètè blanku di kolo por kuminsá bula promé ku tur otro barbulètè. Kon bini?

 Pensa riba esaki: Hopi sorto di barbulètè ta para tuma solo ku nan alanan será òf kompletamente habrí promé ku nan por kuminsá bula. Pero, e barbulètè blanku di kolo ta tuma solo ku su alanan habrí den forma di “V,” na un ángulo di mas o ménos 17 grado. Investigashon a mustra ku den e posishon ei su alanan ta apsorbá mas tantu kalor posibel, pasobra e ora ei energia di solo ta bai dirèkt na e múskulonan di su kurpa i ta keinta nan mas lihé p’e kuminsá bula.

 Un grupo di eksperto di Universidat di Exeter (Inglatera) a hasi investigashon pa mira si e posishon den forma di “V” di e barbulètè ei lo por yuda nan traha pènel solar ku ta mas efisiente. Ora nan a hasi e investigashon, nan a deskubrí ku e produkshon di energia a subi ku kasi 50 porshento.

 E investigadónan a ripará tambe ku e superfisie di ala di e barbulètè akí tin e kapasidat di reflehá lus. Nan a kopia e posishon den forma di “V” di e ala di e barbulètè i e superfisie di su ala ku ta reflehá lus pa asina nan logra traha pènel solar ku ta mas efisiente i mas liviano. E resultadonan akí a motivá Profèser Richard ffrench-Constant, un miembro di e tim di investigashon, pa yama e barbulètè blanku di kolo un “eksperto den kosechá energia di solo.”

 Kiko bo ta pensa? E abilidat di tuma e posishon den forma di “V” di e barbulètè blanku di kolo ta kasualidat òf diseño?