Beibel ta deskribí algun suseso i situashon ku lo identifiká e “konklushon di e era [aktual],” loke algun tradukshon di Beibel ta referí na dje komo “e fin di tempu.” (Mateo 24:3, Beibel Santu) Beibel ta yama e tempu akí “e último dianan” i “e tempu stipulá di e fin.”—2 Timoteo 3:1; Daniel 8:​19, Beibel Santu.

 Beibel ta papia di vários suseso ku lo tuma lugá pareu i ku lo ta “e señal” di e último dianan. (Lukas 21:7) Wak algun ehèmpel:

 Guera na gran eskala. Hesus a profetisá: “Nashon lo lanta kontra nashon i reino kontra reino.” (Mateo 24:7) Revelashon 6:4 tambe a profetisá tokante un koredó di kabai simbóliko ku ta representá guera ku lo ta “kita pas for di riba tera.”

 Skarsedat di kuminda. Hesus a profetisá: “Lo tin skarsedat di kuminda.” (Mateo 24:7) E buki Revelashon ta papia di un otro koredó di kabai simbóliko ku ta kore pa kousa hamber na diferente parti di mundu.—Revelashon 6:5, 6.

 Temblor grandi. Hesus a bisa ku lo tin “temblor den un lugá tras di otro.” (Mateo 24:7; Lukas 21:11) E temblornan grandi akí rònt mundu ta kousa mas sufrimentu i morto ku nunka.

 Pèst, esta, pestilensia. Segun Hesus, lo tin pestilensia òf epidemia di malesa teribel.—Lukas 21:11.

 Krímen. Aunke hende ta kometé krímen ya pa vários siglo, Hesus a bisa ku den e último dianan lo tin “oumento di maldat.”—Mateo 24:12.

 Hende ta daña planeta Tera. Revelashon 11:18 a profetisá ku hende lo “kaba ku e tera.” Nan lo hasi esei no solamente ku nan aktonan violento i korupto pero tambe mediante e daño ku nan ta hasi na e medio ambiente.

 Aktitut di hende ku ta bai di malu pa pió. Na 2 Timoteo 3:1-4, Beibel a profetisá ku hende en general lo ta ‘malagradesí, desleal i nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, traidor, kabesura i hinchá di orguyo.’ Komportashon di hende lo bira asina malu ku Beibel ta deskribí e tempu ei komo “tempunan krítiko, difísil pa trata kuné.”

 Famia ta kibra. Na 2 Timoteo 3:2 i 3, Beibel a profetisá ku hopi hende lo ‘no tin kariño’ pa nan famia i ku mucha lo ta “desobediente na mayornan.”

 Amor pa Dios lo fria. Hesus a profetisá: “Amor di mayoria di hende lo fria.” (Mateo 24:12) Ku e palabranan ei, Hesus tabata ke men ku mayoria di hende lo stòp di stima Dios. 2 Timoteo 3:4 ta bisa ku den e último dianan hende asina lo “stima plaser en bes di stima Dios.”

 Hipokresia religioso. Na 2 Timoteo 3:5, Beibel a profetisá tokante hende ku lo bisa ku nan ta sirbi Dios, pero ku no ta biba di akuerdo ku Dios su normanan.

 Lo tin mihó komprondementu di profesia di Beibel. E buki Dánièl a profetisá ku durante “tempu di fin,” hopi hende lo haña mihó komprondementu di e bèrdatnan di Beibel, inkluso komprondementu eksakto tokante profesia di Beibel ku tin di haber ku e tempu di fin.—Dánièl 12:4.

 Un trabou di prediká ku lo tuma lugá rònt mundu. Hesus a profetisá: “E bon notisia akí di e Reino lo ser prediká den henter e tera habitá.”—Mateo 24:14.

 Hende lo ta indiferente, i nan lo hasi chèrchi. Hesus a profetisá ku hende en general lo no hasi kaso di e tantísimo evidensianan ku e fin ta aserkando. (Mateo 24:37-39) Ademas, 2 Pedro 3:3 i 4 a profetisá ku algun hende lo hasi chèrchi di e evidensianan bisando ku nan no ta proba ku e fin ta serka.

 Tur e profesianan akí ta kumpliendo pareu. Hesus a bisa ku den e último dianan tur e profesianan akí lo kumpli pareu, no djis algun di nan òf mayoria di nan.—Mateo 24:33.

 E kontesta ta sí. Situashon mundial i kalkulashon di tempu basá riba Beibel ta mustra ku e último dianan a kuminsá na aña 1914, e aña ku Promé Guera Mundial a kuminsá. Pa wak kon situashon mundial ta indiká ku nos ta bibando den e último dianan, wak e siguiente vidio:

 Na 1914, e Reino di Dios a kuminsá goberná den shelu, i un di e promé kosnan ku e reino ei a hasi ta saka Satanas e Diabel i su demoñonan for di shelu. Desde e tempu ei, Satanas i e demoñonan tin influensia riba tera so. (Revelashon 12:7-12) Satanas su influensia riba humanidat ta bisto ora nos wak e mal aktitut di hende i e kosnan malu ku nan ta hasi. P’esei, e último dianan ta “tempunan krítiko, difísil pa trata kuné.”—2 Timoteo 3:1.

 Hopi hende ta sufri durante e tempunan krítiko akí. Nan ta preokupá ora nan mira kon atras hende en general ta bayendo, esta, ku hende no sa mas kon pa biba ku otro. Algun hende tin asta miedu ku hende mes lo kaba ku otro.

 Pero na mes momento, tin hende ku, aunke nan ta preokupá pa situashon di mundu, ta wak futuro ku speransa. Nan tin konfiansa ku pronto e Reino di Dios lo tuma akshon pa kaba ku tur e problemanan ku tin na mundu. (Dánièl 2:44; Revelashon 21:3, 4) Ku pasenshi, nan ta warda pa Dios kumpli ku su promesanan, i nan ta haña konsuelo den e siguiente palabranan di Hesus: “Esun ku perseverá te na fin ta esun ku lo ser salbá.”—Mateo 24:13; Mikéas 7:7.