E esfuersonan ku hende a hasi pa logra pas mundial a frakasá i lo sigui frakasá pa e siguiente motibunan:

•   “No ta keda na hende pa dirigí su pasonan.” (Yeremías 10:23, Beibel Santu) Dios no a krea hende ni ku e kapasidat ni ku e derecho pa goberná nan mes; pues nan lo no por logra pas duradero.

•   “No konfia den . . . yu di hende ku no por salba bo. Ora e muri e ta bolbe bira tera; a kaba ku su plannan e dia ei.” (Salmo 146:3, 4, Beibel na papiamentu koriente) Ni gobernantenan ku tin bon intenshon no por kaba ku e kousanan di guera.

•   ‘Den e último dianan lo bini tempunan krítiko, difísil pa trata kuné. Pasobra hende lo . . . ta feros, sin amor pa loke ta bon, traidor, kabesura, hinchá di orguyo.’ (2 Timoteo 3:1-4) Nos ta biba den “e último dianan” di e mundu malbado akí, un tempu den kua e mal aktitut ku ta reina ta pone ku ta difísil pa logra pas.

•   “Ai di tera i di laman, ya ku Diabel a baha bini serka boso yen di rabia, pasobra e sa ku a ked’é masha poko tempu.” (Revelashon 12:12) E enemigu di Dios, Diabel, a ser bentá riba tera i ta instigá hende pa nan tin e mesun aktitut malisioso kuné. Tanten ku e ta “e gobernante di e mundu akí,” nunka nos lo por biba na pas.—Huan 12:31.

•   “[E Reino di Dios] lo garna i pone un fin na tur e reinonan akí [ku ta oponé Dios], ma e mes lo dura pa semper.” (Daniel 2:44, Beibel Santu) Ta e Reino di Dios, i no gobièrnu humano, lo kumpli ku nos deseo pa pas mundial pa semper.—Salmo 145:16.