Beibel mes ta splika kiko bo tin ku hasi pa bo komprondé su mensahe. Loke Dios ta bisa den su Palabra “no ta muchu difísil pa bo, ni e no ta fuera di [bo] alkanse.”—Deuteronomio 30:11, Beibel Santu.

Loke por yuda bo komprondé Beibel

1.   Un aktitut korekto. Bo mester aseptá Beibel komo e Palabra di Dios. Sea humilde, pasobra Dios no ta gusta hende orguyoso. (1 Tesalonisensenan 2:13; Santiago 4:6) Sinembargo, no kere tur loke bo ta lesa òf tende; Dios ke pa bo usa bo “kapasidat di pensa.”—Romanonan 12:1, 2.

2.   Pidi Dios duna bo sabiduria. Beibel ta bisa na Proverbionan 3:5: “No dependé riba bo mes komprondementu.” (Beibel Santu) En bes di esei “sigui pidi Dios” pa sabiduria pa komprondé Beibel.—Santiago 1:5.

3.   Studia regularmente. Lo bo saka muchu mas benefisio si bo ta studia Beibel riba un base regular i no de bes en kuando.—Hosue 1:8.

4.   Studi’é a base di tópiko. Un estudio a base di tópiko, den kua bo ta analisá loke Beibel ta bisa tokante un sierto tema, ta un método efikas pa komprondé loke Beibel ta siña. Kuminsá “siña e kosnan fundamental” pa despues sigui ku siñansa mas avansá. (Hebreonan 6:1, 2) Lo bo ripará ku ora bo kompará un teksto ku otro, vários parti di Beibel ta splika su mes i asta klarifiká loke “ta difísil pa komprondé.”—2 Pedro 3:16.

5.   Buska yudansa di otro hende. Beibel ta animá nos pa buska yudansa di otro hende ku ta komprondé Beibel mihó. (Echonan 8:30, 31) Testigunan di Yehova ta ofresé un kurso di Beibel grátis. Meskos ku e kristiannan den e promé siglo, nan ta analisá vários teksto di Beibel pa yuda hende komprondé loke Beibel ta siña realmente.—Echonan 17:2, 3.

Loke bo no tin mester

1.   Siñansa avansá òf hopi inteligensia. E 12 apòstelnan di Hesus a komprondé e Skritura i a siña otronan, maske algun hende tabata pensa ku nan “no tabatin muchu edukashon.”—Echonan 4:13.

2.   Plaka. Bo por haña sa kiko Beibel ta siña sin ku e ta kosta bo nada. Hesus a bisa su disipelnan: “Boso a risibí pòrnada, duna pòrnada.”—Mateo 10:8.