Beibel no ta bisa eksaktamente ki dia Hesukristu a nase, i e siguiente obranan di referensia ta konfirmá esaki:

•   “E fecha eksakto di Kristu su nasementu no ta konosí.”—New Catholic Encyclopedia.

•   “Ningun hende no sa eksaktamente ki dia Kristu a nase.”—Encyclopedia of Early Christianity.

 Pero si ta asina, ki dia Hesus a nase anto? Aunke Beibel no ta kontestá e pregunta ei direktamente, e ta menshoná sí dos suseso rònt di su nasementu ku ta laga hopi hende yega na e konklushon ku e no a nase dia 25 di desèmber.

Hesus no a nase den wenter

1.   E registrashon. Den e dianan promé ku Hesus a nase, Sésar Ougusto a saka un dekreto ku “tur hende mester a registrá nan mes.” Henter e pueblo tabata obligá pa bai registrá “kada un na su mes stat,” loke a nifiká ku Hose i Maria mester a biaha un siman òf mas pa yega Bètlehèm. (Lukas 2:1-3) E hendenan lo no a gusta e idea ku nan mester a kumpli ku e dekreto ei ku probablemente tabatin e meta pa kobra belasting i reklutá hende pa sirbishi militar. En bista di esei, no ta lógiko ku Ougusto lo a provoká hende di e nashon ei mas ainda, obligando nan pa hasi un biahe largu asina den pleno wenter.

2.   E karnénan. Tabatin wardadó di karné ku tabata ‘biba pafó den kunuku, vigilando nan tounan henter anochi.’ (Lukas 2:8) E buki Daily Life in the Time of Jesus a splika ku e karnénan tabata keda pafó na aire liber for di “e siman promé ku Pasku Hudiu [na kabamentu di mart] te meimei di novèmber.” E buki ta sigui bisa: “Durante wenter e karnénan tabata keda bou di dak pa haña protekshon kontra e friu di wenter.” Pues, esei so kaba ta un motibu pa konkluí ku e fecha tradishonal di Pasku di nasementu ku ta kai den wenter ku tur probabilidat no ta korekto, pasobra e Evangelio di Lukas ta bisa ku e wardadónan di karné tabata pafó den kunuku ku nan bestianan.

Na komienso di hèrfst

 Pa kalkulá mas o ménos na ki tempu Hesus a nase, nos mester konta for di e dia ku el a muri bai bèk den tempu. El a muri dia 14 di Nisan durante Pasku Hudiu den lènte di aña 33 di nos era. (Huan 19:14-16) Komo ku Hesus tabatin mas o ménos 30 aña di edat ora el a kuminsá su ministerio ku a dura tres aña i mei, nos por konkluí ku el a nase na komienso di hèrfst di aña 2 promé ku nos era.—Lukas 3:23.

 Siendo ku no tin prueba ku Hesus a nase dia 25 di desèmber, dikon hende ta selebrá Pasku riba e dia ei anto? E Encyclopædia Britannica ta bisa ku lidernan religioso probablemente a skohe e fecha ei, pasobra “e tabata kai pareu ku e fiesta romano relashoná ku ‘e renasementu di e solo invensibel,’” riba e dia di solstisio di wenter. Segun Encyclopedia Americana, hopi erudito ta di opinion ku lidernan religioso a hasi esei “pa asina hende pagano ku a kombertí por a aseptá kristianismo mas fásil.”