Ki Aparensia Hesus Tabatin?

TOKA NA

E kontesta ku Beibel ta duna

Beibel no ta deskribí e aparensia di Hesus, pues niun hende no sa eksaktamente ki aparensia e tabatin. Esaki ta mustra ku e aparensia di Hesus no ta importante. Sin embargo, Beibel ta duna nos un idea sí di kon Hesus su aparensia tabata.

Karakterístika: Hesus tabata un hudiu i probablemente a heredá karakterístikanan semítiko di su mama. (Hebreonan 7:14) Kasi sigur e no tabatin karakterístikanan hopi notabel. Na un okashon e tabata por a biaha for di Galilea te Herúsalèm sin ku niun hende a rekonos’é. (Huan 7:10, 11) I aparentemente e no a hala atenshon ni ora e tabata meimei di e disipelnan ku e tabata mas será kuné. Kòrda ku Hudas Iskariot mester a identifiká Hesus ora e grupo armá a bini pa arest’é.—Mateo 26:47-49.
Largura di su kabei: No ta probabel ku Hesus tabatin kabei largu, pasobra Beibel ta bisa ku ‘kabei largu ta un desonor pa un hòmber’.—1 Korintionan 11:14.
Barba: Hesus tabatin barba. El a obedesé lei hudiu ku a prohibí hòmber adulto di ‘daña e rantnan di nan barba.’ (Levítiko 19:27, Beibel Santu; Galationan 4:4) Ademas, Beibel ta menshoná e barba di Hesus den un profesia tokante su sufrimentu.—Isaías 50:6.
Kurpa: Tur kos ta indiká ku Hesus tabata un hòmber fuerte i salú. Durante su ministerio el a kana masha hopi mes. (Mateo 9:35) Dos biaha el a saka hende ku tabata hasi negoshi for di e tèmpel, bòltu mesa di kambia plaka i ku zuip el a kore ku e bestianan for di e tèmpel. (Lukas 19:45, 46; Huan 2:14, 15) E Encyclopaedia di McClintock and Strong’s ta bisa: “Henter e relato di evangelio ta mustra ku [Hesus] tabata fuerte i bon di salú.”—Tomo IV, página 884.
Ekspreshon di kara: Hesus tabata kariñoso i kompasivo i no tin duda ku su ekspreshon di kara a reflehá esei. (Mateo 11:28, 29) Tur tipo di hende tabata busk’é pa haña konsuelo i yudansa. (Lukas 5:12, 13; 7:37, 38) Te asta mucha tabata sinti nan bon serka dje.—Mateo 19:13-15; Marko 9:35-37.

Ideanan robes tokante e aparensia di Hesus

Idea robes: Tin hende ta pensa ku Hesus tabata di orígen afrikano pasobra e buki di Revelashon ta kompará su kabei ku lana i su pia ku “koper puru ku ta bria den fòrnu di dirti metal.”—Revelashon 1:14, 15.

E bèrdat: E buki di Revelashon ta konsistí “di símbolo.” (Revelashon 1:1) E deskripshon di Hesus su kabei i pia ta skirbí na idioma simbóliko pa ilustrá e kualidatnan di Hesus despues ku el a resusitá, i no pa deskribí su aparensia físiko ora e tabata riba tera. Revelashon 1:14 ta bisa ku Hesus su “kabei riba su kabes tabata blanku blanku, blanku manera sneu.” Revelashon ta usa koló, no tekstura, komo punto di komparashon. Esaki ta representá su sabiduria debí na su edat. (Revelashon 3:14)

Hesus su pianan tabata “manera koper puru ku ta bria den fòrnu di dirti metal.” (Revelashon 1:15) Tambe, su kara tabata “manera ora solo ta na su punto di mas briante.” (Revelashon 1:16) Ya ku niun rasa no tin kueru ku un aparensia asina, e vishon akí mester ta simbóliko, mustrando Hesus resusitá komo esun “ku ta biba den un lus inaserkabel.”—1 Timoteo 6:16.

Idea robes: Hesus tabata débil i delikado.

E bèrdat: Hesus a komport’é manera un berdadero hòmber. Por ehèmpel, ku kurashi el a identifiká su mes ora e grupo armá a bin pa arest’é. (Huan 18:4-8) Hesus lo mester tabata fuerte físikamente tambe pasobra komo karpinté e mester a usa hèrmènt di man.—Marko 6:3.

Pero pakiko Hesus tabatin mester pa hende yud’é karga su staka di tormento anto? I kon bin el a muri promé ku e otronan ku tambe a wòrdu ehekutá? (Lukas 23:26; Huan 19:31-33) Djis promé ku Hesus a muri, nan a maltrat’é asina tantu ku el a bira suak suak. E no a drumi henter anochi. Un motibu pa esei ta ku e tabatin un doló emoshonal inmenso. (Lukas 22:42-44) E anochi ei, e hudiunan a maltrat’é, i e siguiente mainta e romanonan a tortur’é. (Mateo 26:67, 68; Huan 19:1-3) Esakinan ta faktornan ku a pone ku el a muri lihé.

Idea robes: Semper Hesus tabata tristu i melankóliko.

E bèrdat: Hesus a reflehá e kualidatnan di su Tata selestial, Yehova, na un manera perfekto. Beibel ta deskribí Yehova komo “e Dios felis.” (1 Timoteo 1:11; Huan 14:9) De echo, Hesus a siña otro hende kon pa ser felis. (Mateo 5:3-9; Lukas 11:28) E informashonnan akí ta indiká ku hopi bes Hesus su ekspreshon di kara a reflehá felisidat.