Huan Boutista tabata un profeta di Dios. (Lukas 1:76) El a nase na aña 2 P.K. i a muri na aña 32 D.K. Dios a mand’é prepará e kaminda pa yegada di e Mesías, esta, Kristu. Pues, Huan a prediká e mensahe di Dios na e otro hudiunan pa nan bolbe na Dios.—Marko 1:1-4; Lukas 1:13, 16, 17.

 E mensahe di Huan lo a yuda hende sinsero rekonosé Hesus di Názarèt komo e Mesías primintí. (Mateo 11:10) Huan a bisa su oyentenan pa nan arepentí di nan pikánan i batisá komo muestra di nan arepentimentu. (Lukas 3:3-6) Debí ku Huan a batisá hopi hende, el a ser yamá Huan Boutista. E boutismo di mas importante ku Huan a efektuá tabata esun di Hesus. a—Marko 1:9.

Den e artíkulo akí nos lo kontestá e siguiente preguntanan

•  Dikon Huan Boutista tabata un persona asina spesial?

•  Ken e mayornan di Huan Boutista tabata?

•  Ken a kousa morto di Huan Boutista?

•  Huan Boutista i Hesus tabata rival?

•  Kuantu hende ku yama Huan Beibel ta menshoná?

 Pasobra Beibel a profetisá e trabou ku lo el a hasi: Yehova a bisa den Beibel ku lo e manda un mensahero, i Huan a kumpli ku e profesia ei mediante su predikashon. (Malakías 3:1; Mateo 3:1-3) E ta esun ku a “prepará un pueblo pa Yehova,” esta, el a yuda e otro hudiunan pa nan ta prepará pa aseptá e mensahe di Hesus, e representante prinsipal di Yehova.—Lukas 1:17.

 Pa loke el a logra den su bida: Hesus a bisa ku “no a lanta ningun mas grandi ku Huan Boutista; ma esun ku ta mas chikitu den e Reino di shelu ta mas grandi kuné.” (Mateo 11:11) Ningun sirbidó di Dios ku a biba promé ku Huan por a ser konsiderá mas importante kuné, pasobra no solamente e tabata un profeta pero tambe e “mensahero” segun profesia di Beibel. Ademas, e palabranan di Hesus a demostrá ku Huan lo no a forma parti di e Reino selestial. b Dikon nò? Pasobra Huan a muri promé ku Kristu a habri e kaminda pa bida den shelu. (Hebreonan 10:19, 20) Sinembargo, Huan lo bolbe biba riba tera bou di e Reino di Dios i lo e tin e oportunidat di biba pa semper den Paradeis.—Salmo 37:29; Lukas 23:43.

 Huan su mayornan tabata Zakarías i Elisabèt. Zakarías tabata un saserdote hudiu. E nasementu di Huan tabata un milager, pasobra su mama tabata steril, esta, e no por a haña yu. Ademas, Elisabèt i Zakarías tabata “di edat avansá.”—Lukas 1:5-7, 13.

 Rei Heródes Antipas a laga kita kabes di Huan. El a hasi esei pasobra su kasá Herodías a preshon’é. Herodías tabata odia Huan pasobra Huan a bisa Heródes, kende tabata pretendé di ta hudiu, ku su matrimonio no tabata legal bou di lei hudiu.—Mateo 14:1-12; Marko 6:16-19.

 Beibel no ta bisa ku Huan Boutista i Hesus tabata rival. (Huan 3:25-30) De echo, Huan a rekonosé públikamente ku su trabou tabata pa prepará e kaminda pa e Mesías, no pa kompetí kuné. Huan a bisa: “Mi ta batisá hende den awa . . . pa Israel por mira ta ken e ta.” I el a agregá: “É ta e Yu di Dios.” (Huan 1:26-34) Pues, Huan tabata masha kontentu ku Hesus tabatin éksito den su sirbishi.