Hopi hende ta pensa ku nos no por sa sigur ta ken a skirbi Beibel. Pero Beibel mes no ta laga duda riba e punto akí. Na vários kaminda e ta laga nos komprondé bon kla ken ta su outor. Tin sierto parti di Beibel ta kuminsá ku frase manera “e palabranan di Nehemias,” ‘e vishon ku Isaías a mira’ i “e palabra di SEÑOR ku a yega na Joel.”—Nehemías 1:1; Isaías 1:1; Yoël 1:1, Beibel Santu.

 Mayoria eskritor di Beibel ta rekonosé ku nan a skirbi den nòmber di Yehova, e Dios berdadero, i ku ta é a guia nan. E profetanan ku a skirbi e Skritura Hebreo a bisa mas ku 300 biaha: “Asina SEÑOR ta bisa.” (Ámos 1:3; Mikéas 2:3; Nahum 1:12, Beibel Santu) Otro eskritornan di Beibel a haña e mensahe di Dios pa medio di angel.—Zakarías 1:7, 9.

 Mas o ménos 40 hòmber a skirbí Beibel durante un periodo di 1.600 aña. Tin di nan a skirbi mas ku un buki di Beibel. De echo, Beibel ta un biblioteka chikitu ku ta konsistí di 66 buki. E tin 39 buki di e Skritura Hebreo, ku hopi ta yama e Tèstamènt Bieu, i 27 buki di e Skritura Griego Kristian, e Tèstamènt Nobo.