Beibel no ta hasi menshon di Halloween. Halloween ta un fiesta ku hopi hende ta selebrá tur aña dia 31 di òktober. Sinembargo, orígen di Halloween i e kustumbernan ku hende ta sigui durante e fiesta ei no ta na armonia ku siñansa di Beibel.

Den e artíkulo akí

•  Orígen di Halloween i e kustumbernan ku hende ta sigui

•  Ta importante pa nos sa orígen di Halloween?

•  Di unda e nòmber Halloween a bini?

•   Samhain: Samhain tabata un fiesta ku e keltanan (hende di un sierto pueblo) tabata selebrá hopi tempu pasá, mas ku un 2.000 aña pasá. Ta parse ku Halloween tin hopi di haber ku e fiesta ei. Segun The World Book Encyclopedia, “e keltanan tabata kere ku, durante Samhain, spiritu di e mortonan tabata kana rònt entre hende bibu, i e hendenan bibu por a bishitá e mortonan.”—Wak “ Di unda e nòmber Halloween a bini?”

•   Trahe di Halloween, mangel i algun kustumber: Segun un fuente, algun kelta tabata bisti trahe straño i spantoso pa konfundí e mal spiritunan. Nan tabata bisti trahe ku tabata laga nan parse spiritu ya asina e spiritunan tabata kere ku nan tambe ta spiritu i laga nan na pas. Otro hende tabata ofresé e spiritunan mangel pa kalma nan. a

   Hopi tempu pasá (durante aña 500 despues di Kristu pa aña 1500 despues di Kristu), algun klero na Europa di iglesia katóliko a adoptá vários kustumber pagano ku tabata komun na Europa. Nan tabata laga nan miembronan disfrasá nan mes i kana di kas pa kas pa pidi hende regalo.

•   Zumbi, vampiro, hòmber lobo i hèks: Pa hopi tempu kaba, hende ta asosiá e personahenan ei ku mal spiritu. E buki Halloween Trivia ta yama nan “mònster sobrenatural.” Segun e buki, e mònsternan sobrenatural ta estrechamente ligá ku “morto i hende morto,” i nan ta hinka miedu den hende, miedu di muri.

•   Lampi trahá di pampuna (jack-o’-lantern): Hopi tempu pasá, na Gran Bretaña, hende tabatin e kustumber di bai di kas pa kas pa pidi kuminda a kambio di un orashon na fabor di e mortonan. Nan tabata kana ku lampi di bela, ku nan a traha ku kolrabi [koolraap]. E lampinan tabata sendí. E belanan ku tabatin den e lampinan a representá e almanan ku tabata atrapá den purgatorio. (Halloween—From Pagan Ritual to Party Night) Algun otro fuente ta bisa ku e hendenan tabata usa e lampinan ei pa kore ku mal spiritu. Durante siglo 19, e hendenan na Merka a kuminsá usa pampuna en bes di kolrabi pasobra tabata fásil pa haña pampuna. Tabata mas fásil tambe pa saka kontenido di un pampuna i traha dibuho den dje.

 Sí. Algun hende ta kere ku Halloween ta djis un fiesta inofensivo ku no ta perhudiká ningun hende. Pero e kosnan ku hende ta hasi durante Halloween no ta na armonia ku siñansa di Beibel. Halloween tin di haber ku kreensia falsu tokante demoño (esta, spiritu malbado) i hende morto.

 E siguiente versíkulonan di Beibel ta mustra Dios su punto di bista tokante un fiesta manera Halloween:

•   “Entre boso no mag wòrdu hañá ningun hende ku ta . . . montadó òf spiritista, òf ku ta konsultá ku e mortonan.”—Deuteronomio 18:10-12.

   Nifikashon: Dios no ke pa hende buska kontakto ku hende morto. E no ke pa hende ni sikiera hasi algu ku ta duna e impreshon ku nan ta purba di drenta den kontakto ku hende morto.

•   “E mortonan no sa nada.”—Eklesiástes 9:5.

   Nifikashon: E mortonan no ta konsiente di nada; pues, nan no por komuniká ku hende bibu.

•   “Mi no ke pa boso tin komunion ku demoño. Boso no por bebe e kopa di Señor i e kopa di demoñonan.”—1 Korintionan 10:20, 21, Beibel Santu.

   Nifikashon: Hende ku ke tin aprobashon di Dios mester evitá tur kos ku tin di haber ku demoño.

•   “Para firme kontra e trampanan di Diabel; pasobra nos [tin un] lucha . . . kontra forsanan spiritual di maldat.”—Efesionan 6:11, 12.

   Nifikashon: Un kristian no mester tin nada di haber ku e demoñonan; e no mester hasi tampoko manera e ta gosa huntu ku nan.