Kiko Beibel Ta Bisa Tokante Tatuahe?

TOKA NA

E kontesta ku Beibel ta duna

E úniko kaminda ku Beibel ta papia di tatuahe ta na Levítiko 19:28. Einan e ta bisa: ‘No tatua ningun marka na boso kurpa.’ (Beibel Santu) Dios a duna e nashon di Israel e mandamentu akí pa asina separá nan for di e nashonnan rònt di nan, kuanan tabata pone tatuahe di nòmber òf símbolo di nan diosnan riba nan kurpa. (Deuteronomio 14:2) Aunke kristiannan no ta bou di e Lei ku Dios a duna e pueblo di Israel, e prinsipio tras di e lei akí meresé nos atenshon.

Un kristian por pone tatuahe na su kurpa?

E siguiente tekstonan di Beibel por yuda bo rasoná riba e asuntu akí:

Hende muhé mester “dòrna nan mes ku . . . modestia.” (1 Timoteo 2:9, Testament Nobo Di Nos Senjor Hesu-Cristo) E prinsipio ei ta apliká tantu na hende muhé komo hende hòmber. Un kristian no mester hala muchu atenshon na su mes ni laga otro hende sinti nan inkómodo pa motibu di su aparensia.
Algun hende ke pone tatuahe pa laga sa ki tipo di hende nan ta, miéntras ku otronan ta hasi esei pa mustra ku ta nan ta manda riba nan kurpa. Sinembargo, Beibel ta animá kristiannan: “Presentá boso kurpa komo un sakrifisio bibu, santu, agradabel pa Dios, esta, un sirbishi sagrado ku boso ta rindi ku boso kapasidat di pensa.” (Romanonan 12:1) Usa bo “kapasidat di pensa” pa bo sa dikon bo ke pone tatuahe. Si e motibu ta pa bo bai tras di moda òf pa mustra ku bo ta pertenesé na sierto grupo, kòrda ku bo por kambia di idea despues, pero un tatuahe sí ta permanente. Ora bo analisá bo motibunan, lo bo por tuma un desishon sabí.—Proverbionan 4:7.
“E plannan di hende balente siguramente ta kondusí na abundansia, ma tur esnan ku tin purá, siguramente ta resultá den pobresa.” (Proverbionan 21:5, Beibel Santu) Hopi biaha hende no ta para pensa mashá promé ku nan pone un tatuahe, pero e desishon ei por tin konsekuensia di largu alkanse riba nan relashon ku otro hende i nan trabou. Ademas, un tatuahe por ta kostoso i doloroso pa kita. Investigashonnan hasí i tambe e negoshi lukrativo di kita tatuahe ta duna prueba ku mayoria di hende ku a pone tatuahe a bin lamentá esei despues.