•   Ku kua di bo mayornan bo sa klèsh mas tantu?

  •  Ku bo tata

  •  Ku bo mama

•   Kuantu biaha esaki sa sosodé?

  •  Kasi nunka

  •  De bes en kuando

  •  Hopi

•   E diskushonnan sa ta fuerte?

  •  Nò. Nos ta resolvé nan lihé i na un manera trankil.

  •  Tin biaha sí. Ta despues di basta diskushon nos sa resolvé nan.

  •  Sí. Nos no sa sali afó, ni despues di hopi diskushon.

 Si bo no ta sali bon ku bo mayornan, kisas bo ta pensa ku ta nan lo tin ku hasi algu pa drecha e situashon. Sinembargo, pensa riba e pasonan ku abo por dal pa baha e diskushonnan un poko i pa nan no ta muchu fuerte. Puntra bo mes . . .

•   Propio opinion. Mas bo ta krese, mas bo ta pensa riba sierto kosnan ku tempu bo tabata mucha. Tambe bo ta kuminsá forma bo propio opinionnan, i tin biaha esakinan no ta kuadra ku esnan di bo mayornan. No opstante, Beibel ta bisa: “Onra bo tata i bo mama.”—Éksodo 20:12, Beibel Santu.

   E realidat: Pa bo por splika un hende bo pensamentunan sin rabia kuné, bo mester a madurá un poko i haña eksperensia den bida.

•   Independensia. Segun ku bo ta krese, bo mayornan probablemente lo duna bo mas libertat. Pero kisas pa bo e libertat ei no ta sufisiente, òf bo no ta hañ’é na e momento ku bo kier e, i esei por trese pleitu. Ma Beibel ta bisa: ‘Obedesé bo mayornan.’—Efesionan 6:1.

   E realidat: Si bo usa e libertat ku bo tin kaba bon, bo mayornan lo duna bo mas libertat.

•   Hasi bo parti. En bes di kulpa bo mayornan so pa loke pasa, pensa riba loke abo por hasi pa mantené pas. Un hóben ku yama Jeffrey ta bisa: “No ta semper loke bo mayornan ta bisa ta kousa un klèsh, sino e manera ku abo ta reakshoná òf respondé nan. Pa bo kalma kos, papia na un manera trankil.”

   Beibel ta bisa: ‘Te asina leu ku ta dependé di bo, sea na pas ku tur hende.’—Romanonan 12:18.

•   Skucha. Samantha di 17 aña ta atmití: “Ami ta haña ku esei ta un di e kosnan di mas difísil pa hasi. Pero mi a ripará ku ora bo mayornan mira ku bo ta skucha nan, e chèns ta grandi ku nan tambe lo skucha bo.

   Beibel ta bisa: “Hende mester ta kla pa skucha, slo pa papia.”—Santiago 1:19.

•   Bo ta parti di un tim. Mira e diskushon manera un wega di tènis. Pone e problema, i no bo mayornan, na otro banda di e kancha. Un hóben ku yama Adam ta bisa: “Ora tin un desakuerdo, e mayornan ke loke nán ta kere ta mihó pa e yu, i e yu ke loke é ta kere ta mihó pa e mes. Pues, bon mirá, nan tin e mesun meta.”

   Beibel ta bisa: “Hasi esfuerso pa buska e kosnan ku ta promové pas.”—Romanonan 14:19.

•   Hinka bo mes den nan sapatu. Un hóben ku yama Sarah ta komentá: “Loke ta yuda mi ta di kòrda ku mi mayornan ta lucha ku nan propio problemanan, ku hopi bes ta mes difísil ku esnan di nos.” Carla, un otro hóben, ta bisa: “Mi ta purba di pone mi mes den lugá di mi mayornan. Kon ami lo a sinti mi si mi tabatin ku kria un yu den e mesun situashon? Kiko lo tabata mihó pa mi yu?”

   Beibel ta bisa: “No buska boso interes personal so, ma buska tambe interes di otronan.”—Filipensenan 2:4.

•   Sea obediente. Al fin i al kabo, esei ta loke Beibel ta manda bo hasi. (Kolosensenan 3:20) Si bo obedesé bo mayornan, kosnan lo bai hopi mas mihó. Karen ta bisa: “Mi bida tin ménos strès ora mi ta djis hasi loke mi mayornan pidi mi. Nan a hasi hopi sakrifisio pa mi, pues, lo mínimo ku mi por hasi ta di obedesé nan.” Ku obedensia bo ta evitá hopi desakuerdo.

   Beibel ta bisa: “Sin palu kandela ta paga.”—Proverbionan 26:20, Beibel Papiamentu Koriente.

 Tep. Si bo ta haña ta difísil pa ekspresá loke bo ta pensa, purba skirbié den un nota òf manda un mensahe. Un tiner ku yama Alyssa ta bisa: “Mi ta hasi esei ora mi no tin masha smak di papia. Esei ta yuda mi ekspresá mi mes sin grita òf bisa algu ku despues por duel mi.”