•  Dikon mi tin ku hasi ehersisio?

•  Kiko ta stroba mi di hasi ehersisio?

•  Kon mi por haña motivashon pa hasi ehersisio?

•  Sea Balansá

•  Loke otro hóben ta bisa

 Den algun pais, e hóbennan ta dediká masha poko tempu na ehersisio i esei ta pone ku nan salú ta bai atras. Ku bon motibu Beibel ta konfirmá ku “entrenamentu físiko ta yuda ku algu.” (1 Timoteo 4:8) Pensa riba lo siguiente:

•   Ehersisio por laga bo sinti mihó. Ehersisio ta produsí endorfina—kímiko den bo selebro ku ta laga bo sinti trankil i kontentu. Algun hóben ta bisa ku ehersisio ta un antidepresivo natural.

   “Ora mi bai kore mainta trempan, mi dia lo ta mas produktivo i agradabel. Korementu ta laga mi sinti bon.”—Regina.

•   Ehersisio ta mehorá bo aparensia. Ehersisio balansá por hasi bo fuerte, mehorá bo salú i por yuda bo sinti mas sigur di bo mes.

   “Mi ta kontentu ku awor mi por dep dies biaha—un aña pasá mi no tabata por ni sikiera un biaha! Loke ta hasi mi mas kontentu, ta ku mi ta kuidando mi kurpa.”—Olivia.

•   Ehersisio por yuda bo biba mas largu. Moveshon ta bon pa bo kurason i halamentu di rosea. Hasimentu di aerobic tambe por yuda prevení malesa di ader di kurason—algu ku ta kousa di morto di tantu hende hòmber komo hende muhé.

   “Ora nos ta hasi ehersisio ku regularidat, nos ta demostrá nos Kreador ku nos ta kontentu ku e kurpa ku el a duna nos.”—Jessica.

 Konklushon: Ehersisio ta masha benefisioso pa bo salú den futuro, i for di awor e por yuda bo. Un mucha muhé ku yama Tonya a bisa: “Lo bo no bisa nunka, ‘mihó mi no a bai kana òf bai kore. Ora mi a pone tur èksküs un banda i a hasi ehersisio, mi no a lamentá esei nunka.’”

 Tin vários punto ku kisas por forma un opstákulo:

•  Mi no tin mester. “Ora hende ta yòn nan no ta mira pakiko ta bon pa hasi ehersisio. Ta difísil pa imaginá ku lo bo haña problema ku salú un dia. Bo ta pensa ku esei ta problema di hende grandi.”—Sophia.

•  Mi no tin tempu. “Komo ku mi tin asina tantu kos di hasi, mi tin ku traha tempu pa kome bon i sosegá bon. Pero mi tin difikultat pa traha tempu pa hasi ehersisio.”—Clarissa.

•  Mi no ta miembro di un gym. “Pa keda den kondishon ta karu—bo tin ku paga si bo ke bai gym!”—Gina.

 Pensa riba esaki:

 Kiko ta e opstákulo di mas grandi pa bo? Lo no ta fásil pa vense e opstákulo ei, pero e resultado lo ta rekompensador.

 At’akí algun sugerensia:

•   Sea konsiente di bo salú. —Galationan 6:5.

•   No buska èksküs. (Eklesiástes 11:4) Por ehèmpel, bo no mester ta inskribí na un gym pa bo hasi ehersisio. Buska un aktividat ku bo ta gusta i praktiká esei ku regularidat.

•   Puntra otro hende kiko nan ta hasi komo ehersisio pa bo haña idea di kiko abo por hasi.—Proverbionan 20:18.

•   Traha un programa fiho. Pone meta i skirbi bo progreso pa bo keda motivá.—Proverbionan 21:5.

•   Buska un hende pa hasi ehersisio ku bo. Si bo ta hasi ehersisio ku otro hende, esei por animá bo i yuda bo mantené bo rutina.—Eklesiástes 4:9, 10

•   Ferwagt opstákulo, pero no entregá ora nan presentá.—Proverbionan 24:10.

 Beibel ta animá tantu hende hòmber komo hende muhé pa ta “moderá den nan kustumbernan.” (1 Timoteo 3:2, 11) Pues, sea balansá enkuanto ehersisio. Hende ku ta hasi demasiado ehersisio hopi biaha ta ripará ku esei ta enbano. Un mucha muhé ku yama Julia a bisa: “Si un hòmber su múskulonan ta mas grandi ku su inteligensia, esei no ta hasié atraktivo.”

 Ademas, bo mester tene kuidou ku lema riba poster di entrenamentu ku ta bisa: “Ora bo ta sinti ku bo no por mas, bai 10 mas.” E konsehonan ei por ta malu pa bo kurpa i por stroba bo di keda enfoká riba “e kosnan mas importante” den bida.—Filipensenan 1:10.

 Mester bisa tambe ku tal inspirashon pa entrenamentu por traha nèt kontrario. Un mucha muhé ku yama Vera a remarká: “Vários mucha muhé ta warda un potrèt di un persona ku nan ke imitá, i ta wak esei ora nan falta ánimo. Pero finalmente nan ta desanimá pasobra nan ta kompará nan mes ku e persona ei. Ta bon pa pone meta pa mehorá bo salú i no bo aparensia so.”