Algun hende ta bebe di mas ora nan tin strès, ora nan ta sinti nan nan so òf ora nan ta sinti nan laf. Kiko di abo? Bo ta bebiendo mas alkohòl ku kustumber? Si esei ta e kaso, kiko bo por hasi pa tene bo bebementu bou di kontrol i asina evitá ku bo ta kuminsá dependé di alkohòl. Ata aki algun informashon ku por yuda bo.

•  Kiko ta nifiká bebe alkohòl na un manera moderá?

•  Kon mi por sa si mi ta bebiendo di mas?

•  Sinku idea pa yuda bo tene bo bebementu di alkohòl bou di kontrol

 Loke Beibel ta bisa: “No anda ku esnan ku ta gusta dal nan biña.”—Proverbionan 23:20.

 Pensa riba esaki: Beibel no ta kontra bebementu di alkohòl na un manera moderá. (Eklesiástes 9:7) Pero e ta mustra ku tin un diferensia entre bebementu moderá, bebementu di mas i buracheria. (Lukas 21:34; Efesionan 5:18; Tito 2:3) Asta si bo bebementu no hiba na buracheria, bebementu di mas ta malu pa bo salú. Ademas, bebementu di mas por daña nos relashon ku otro hende i por pone nos tuma mal desishon.—Proverbionan 23:29, 30.

 Hopi eksperto ta hasi un distinshon entre bebementu ku riesgo abou i bebementu ku riesgo haltu. Kon nan ta kalkulá e nivel di riesgo? Nan ta konta kuantu glas di alkohòl un persona ta bebe pa dia i kuantu biaha pa siman e ta bebe alkohòl. a Klaru, tur hende ta reakshoná diferente na alkohòl, i tin biaha ta mihó un hende no bebe mes. E Organisashon Mundial di Salú ta splika lo siguiente:

 “Den algun kaso, asta un òf dos glas di alkohòl por ta di mas—por ehèmpel:

•   Si bo tin ku stür òf traha ku [un òf otro] mashin [di koriente].

•   Si bo ta na estado òf ta duna yu lechi di pechu.

•   Si bo ta bebe sierto remedi.

•   Si bo tin problema médiko.

•   Si bo no por kontrolá bo bebementu.”

 Loke Beibel ta bisa: “Laga nos saminá i investigá nos kamindanan.”—Lamentashonnan 3:40.

 Pensa riba esaki: Bo por protehá bo mes kontra e konsekuensianan malu ku bebementu di mas ta trese kuné si regularmente bo analisá kuantu bo ta bebe i hasi e kambionan nesesario. E siguiente señalnan por indiká ku bo bebementu di alkohòl ta saliendo for di man.

•   Bo mester bebe pa sinti bo bon. Bo ta sinti ku bo tin ku bebe pa bo por relahá, sosialisá òf pasa bon. Bo ta bebe alkohòl pa trata ku bo problemanan.

•   Bo ta bebe mas ku bo tin kustumber di bebe. Bo ta bebe mas regular i bo ta bebe bibida mas stèrki. Bo mester bebe kada bes mas alkohòl pa bo sinti e mesun efekto ku ántes.

•   Bo bebementu a pone ku bo a haña bo ku problema na kas i na trabou. Por ehèmpel, bo ta gasta mas sèn na alkohòl ku bo tin.

•   Ora bo bebe bo ta tuma mal desishon òf bo ta hasi kos peligroso. Podisé bo ta disidí di stür, landa òf traha ku un sierto mashin.

•   Tin hende a bisa bo ku nan ta preokupá pasobra bo ta bebe di mas? Ora nan papia ku bo tokante bo bebementu, bo ta rabia. Bo ta purba di skonde bo bebementu for di otro hende òf bo ta gaña tokante e kantidat di alkohòl ku bo ta bebe.

•   Bo tin problema pa stòp di bebe. Bo a purba di stòp di bebe òf di bebe ménos, pero bo no por stòp.

 1. Traha un plan.

 Loke Beibel ta bisa: “E plannan di hende balente siguramente ta kondusí na abundansia.”—Proverbionan 21:5.

 Purba esaki: Skohe ki dia den siman lo bo bebe. Pone un límite rasonabel na e kantidat di alkohòl ku lo bo bebe e dianan ei. Anto skohe por lo ménos dos dia den siman ku lo bo no bebe nada mes.

 Un organisashon na Reino Uní ku ta promové konsumo responsabel di alkohòl ta bisa: “E mihó manera pa baha bo riesgo di bira dependiente di alkohòl ta di programá periodo regular ku lo bo no bebe alkohòl.”

 2. Kumpli ku bo plan.

 Loke Beibel ta bisa: “Kaba loke boso a kuminsá kuné.”—2 Korintionan 8:11.

 Purba esaki: Buska pa sa kuantu alkohòl lei ta permití pa un hende bebe pa asina bo por kalkulá i konta bo konsumo di alkohòl korektamente. Kumpra bibida saludabel i sin alkohòl ku bo ta gusta.

 E Instituto Nashonal di Abusu di Alkohòl i Alkoholismo na Merka ta bisa: “Kambio chikitu por hasi un diferensia grandi. E kambionan ei por baha e chèns ku lo bo tin di haña problema ku ta bini debí na abusu di alkohòl.”

 3. Pega na bo desishonnan.

 Loke Beibel ta bisa: “Laga boso Sí nifiká Sí, i boso Nò, Nò.”—Santiago 5:12.

 Purba esaki: Si un hende ofresé bo algu di bebe ku ta bai kontra bo plan, sea prepará pa bisa “Nò” na un manera amabel pero firme.

 E Instituto Nashonal di Abusu di Alkohòl i Alkoholismo na Merka ta bisa: “Mas lihé bo bisa ‘nò,’ mas fásil lo ta pa bo pega na bo desishon.”

 4. Pensa riba e benefisionan.

 Loke Beibel ta bisa: “Fin di un asuntu ta mihó ku su prinsipio.”—Eklesiástes 7:8.

 Purba esaki: Traha un lista di e kosnan ku ta motivá bo pa tene bo bebementu di alkohòl bou di kontrol. Por ehèmpel, lo bo drumi mihó, kuida bo salú, spar plaka òf tin un mihó relashon ku otro hende. Si bo papia ku otro hende tokante bo meta, papia tokante e benefisionan i no kon difísil e ta.

 5. Pidi Dios yuda bo.

 Loke Beibel ta bisa: “Pa tur kos mi tin forsa pa medio di esun ku ta duna mi poder.”—Filipensenan 4:13.

 Purba esaki: Si bo ta pensa ku lo bo tin problema ku bebementu di alkohòl, pidi Dios yuda bo. Pidi Dios forsa i dominio propio. b Tuma tempu pa buska e konsehonan sabí ku tin den su Palabra, Beibel. Ku Dios na bo banda, bo por tene bo bebementu di alkohòl bou di kontrol.