Ademas di e relato bíbliko na Echonan 2:5-11, Filo, un eskritor hudiu di e tempu ei, tambe a konta di e multitut di hende ku a bai Herúsalèm na Pentekòste di aña 33.

Filo a skirbi di e hendenan ku tabata biaha bai Herúsalèm: “Gran kantidat di hende tabata bini for di hopi stat na parti ost, wèst, nort i zùit pa bai e fiestanan; tin tabata kana bai i otronan tabata yega via laman.” Tambe el a sita for di un karta ku Agripa I, ñetu di Heródes e Grandi, a manda pa e emperador romano Caligula. Den e karta ei, Agripa a skirbi tokante Herúsalèm: “E Stat Santu . . . ta no solamente e kapital di Hudea, sino di mayoria di otro pais tambe, ya ku den transkurso di tempu hopi hudiu a bai biba den e paisnan bisiña ei.”

Agripa a menshoná algun área kaminda kolonianan hudiu a ser establesé, asta na lugánan leu manera Mesopotamia, Nort Afrika, Asia Menor, Gresia i islanan Mediteráneo. E eksperto Joachim Jeremias a bisa ku “maske e lista akí no ta papia spesífikamente di e biahenan pa Herúsalèm, ta esei Agripa lo mester tabatin na mente sí ya ku tur hudiu tabata obligá pa biaha bai einan.”—Deuteronomio 16:16.

Tur aña, e hudiunan tabata tene tres fiesta na Herúsalèm: e Pasku Hudiu, Pentekòste i e Fiesta di Tabernakel. Den e promé siglo, sientos di míles di hende for di tur parti di Israel i di otro pais kaminda tabatin hudiu ta biba tabata biaha bai Herúsalèm pa e fiestanan ei. (Lukas 2:41, 42; Echonan 2:1, 5-11) Tur e hendenan akí mester a buska un lugá di keda.

Algun di nan tabata pasa anochi serka amigu i otronan tabata keda na kasnan di hospedahe. Hopi tabata keda den tènt parti paden òf pafó di e murayanan di e stat. Durante Hesus su último bishita na Herúsalèm, el a keda den e stat di Betania ku tabata den serkania.—Mateo 21:17.

Diferente edifisio ku tabatin lugánan di baña a ser deskubrí banda di e tèmpel. Aparentemente e edifisionan akí tabata kasnan di hospedahe kaminda e hudiunan por a keda i baña promé ku nan a drenta tèmpel. Un inskripshon ku a ser hañá den un di e edifisionan akí ta indiká ku Teodoto, un saserdote i lider di e sinagoga lokal, “a traha e sinagoga pa lesamentu di Torá i . . . a traha posada, inkluso kamber i lugá di baña pa e biaheronan pober por tabatin un lugá di keda.”