Mi a nase den un pueblito na Polonia, no muchu leu for di e frontera aleman. Rònt di e pueblito tabatin hopi selva i boerderij, i mi tabata hiba un bida trankil. Mi mayornan tabata amoroso i a animá mi pa mi hiba un bida sano, pa mi hasi mi bèst na skol i buska un karera prestigioso.

Mi problemanan a kuminsá ora m’a bai studia lei na universidat den e stat di Wrocław. Komo ku mi tabata leu for di mi mayornan, mi a kuminsá anda ku hende ku no tabata bon kompania. Semper mi tabata gusta futbòl, pero bou di influensia di e hendenan ei m’a bira fanátiko di futbòl. Mi ekipo faborito tabata di Varsovia, i den wikènt mi tabata bai wak nan hunga, sin importá na unda. Durante e biahenan ei tabatin bebementu pisá, uso di droga i tin biaha asta peleanan violento ku e fanátikonan di e otro ekipo. Pa mi, tur esaki tabata un manera pa skapa di e strès di tur dia, maske mi tabata sa ku si polis a arestá mi, esei lo por a kaba ku mi karera.

Ami ku mi amigunan tabata gusta bai klup i diskoteka. Einan, hopi biaha nos tabata haña nos enbolbí den peleanan di kaya. Polis a arestá mi diferente biaha, pero semper mi a logra skapa di problema ku outoridat; tin biaha mi tabata duna nan plaka bou di mesa. M’a ègt kere ku mi tabata disfrutá di bida. Tòg mi tabatin e sintimentu ku loke mi tabata hasi no ta bon. Pa mi kalma mi konsenshi, mi tabata bai misa tur djadumingu.

Na 2004, dos Testigu di Yehova a yama na mi kas, i mi a aseptá un kurso di Beibel. Segun ku mi a siña kiko realmente ta nifiká ser un kristian, mi konsenshi a kuminsá molestiá mi mes mes. Mi tabata sa ku mi mester a stòp di bebe di mas, usa droga i anda ku hende ku no tabata biba ­segun e normanan di Beibel. Mi a mira tambe ku mi mester a kambia mi karakter agresivo i violento. Maske mi tabata sa ku mi mester a kambia, tòg mi tabata sigui den mal kaminda.

Un momento desisivo den mi bida tabata un anochi ku mi a bringa ku ocho hòmber. Mi ta kòrda kon mi a keda bentá riba kaya miéntras nan tabata bati mi i skòp mi den mi kabes. M’a  sinti ku mi tabata serka di muri i m’a roga Dios: “Pordoná mi Yehova ku mi no a hasi kaso di bo Palabra. Si mi keda na bida, mi ta primintí bo ku lo mi studia Beibel ku e Testigunan i drecha mi bida.” Pa mi sorpresa, mi a keda na bida. Mi a tene mi na mi palabra i a kuminsá studia Beibel.

Na 2006, mi a muda bai Inglatera. Mi meta tabata pa gana sufisiente plaka pa mi por bai Polonia bèk pa mi haña un nivel mas haltu den lei. Segun ku mi tabata studia Beibel, un teksto a hasi un impakto grandi riba mi. Apòstel Pablo a skirbi: “Di bèrdat mi ta konsiderá tur kos komo pèrdida pa motibu di e konosementu tokante Kristu Hesus, mi Señor, ku ta di muchu mas balor. Pa motibu di dje mi a aseptá pèrdida di tur kos i ta konsiderá nan komo kos di benta afó, a fin ku mi por gana Kristu.” ( Filipensenan 3:8) Meskos ku mi, apòstel Pablo tambe a siña lei i e tambe tabata un hòmber masha violento. (Echonan 8:3) Pero, el a mira ku tin un mihó forma di biba, esta, sirbi Dios i hasi su bèst pa imitá Hesus. Segun ku mi a meditá riba e ehèmpel di Pablo, mi a bin realisá ku un karera lukrativo i un karakter violento no ta hiba na felisidat. Mi tabata konvensí ku si Pablo por a kambia, mi tambe por. P’esei mi a disidí di keda na Inglatera i legumai e idea di bai sigui studia lei.

Mas mi a siña tokante Yehova, mas mi a hala serka dje. Mi a siña di su promesa di pordoná tur hende ku di kurason ke hasi kambio, i esei a konmové mi mashá. (Echonan 2:38) I ora mi a meditá riba 1 Huan 4:16, ku ta bisa ku “Dios ta amor,” mi a bin komprondé ta dikon Dios ta odia violensia.

E kondukta di e Testigunan tambe a impreshoná mi. Mi por a mira kon nan ta hasi nan bèst pa biba di akuerdo ku e normanan moral haltu di Beibel, i mi tambe kier a bira parti di e famia felis ei. Mi mester a hasi kambio grandi den mi bida, i na 2008 m’a batisá komo Testigu di Yehova.

Mi tabata un hende ambisioso, violento, usadó di droga, bebedó pisá i fanátiko ferviente di futbòl, pero Beibel a kambia mi, i awor mi ta un sirbidó di Dios ku ta gusta siña otro hende tokante Beibel. Ainda mi gusta wak futbòl, pero djis komo pasatempu.

Awor mi ta felismente kasá ku Esther, un bunita sirbidó di Yehova. Nos gusta yuda hende di abla polako siña tokante Beibel na parti nortwèst di ­Inglatera. Pa promé biaha den mi bida mi ta sinti ku mi ta satisfecho. Mi tin un konsenshi limpi i awor mi bida tin propósito.