KIKO ta bini na bo mente ora bo pensa riba un monton di sushi? Kasi sigur lo bo pensa riba algu desagradabel ku ta hole stinki. Pues lo bo no ferwagt di haña algu di balor ei den, foral no un hoya presioso.

Sinembargo, un shen aña pasá dos hòmber a haña un hoya asina meimei di hopi sushi. No tabata trata akí di un hoya literal, sino algu di muchu mas balor. Kiko e dos hòmbernan akí a haña? I dikon loke nan a haña ta asina importante pa nos awe?

Na komienso di siglo 20 Bernard P. Grenfell i Arthur S. Hunt, dos profesor di e Universidat di Oxford, a bishitá Egipto. Ei, nan a haña vários fragmento di papiro den un monton di sushi banda di e Vaye di Nilo. Mas despues, na aña 1920, miéntras ku e dos hòmbernan akí tabata traha riba un kompilashon di e fragmentonan, Grenfell a kumpra algun fragmento mas ku a ser deskubrí na Egipto. El a kumpra nan pa e Biblioteka John Rylands na Manchester, Inglatera. Pero tur e dos hòmbernan akí a fayesé promé ku nan por a kaba di kompilá e fragmentonan.

Colin H. Roberts, un otro profesor di e Universidat di Oxford, a kaba e trabou. Miéntras ku e tabata surti e fragmentonan, su bista a kai riba un pida papiro di nuebe pa seis centimeter. Pa su sorpresa, den e teksto griego e por a rekonosé algun palabra. Un di e bandanan tabatin e palabranan di Huan 18:31-33 i e otro banda tabatin parti di e versíkulonan 37 i 38. E ora ei, Roberts a realisá ku el a dal den algu di hopi balor.

Roberts a suponé ku e pida papiro akí tabata hopi bieu. Pero kon bieu e tabata? Pa haña sa esaki, el a kompará e papiro akí ku otro manuskritonan di antigwedat ku sí tabatin fecha. E téknika akí yama paleografia. * Ku e método akí e por a kalkulá mas o ménos kon bieu e papiro akí tabata. Pa e komprobá esaki, el a saka su potrèt, mand’é pa tres eksperto riba e tereno akí i pidi nan pa kalkulá kon bieu e tabata. Kiko nan a saka afó?

Ora e tres ekspertonan a studia e estilo di skirbi i e tipo di lèter di e papiro, nan tur tres a yega na e konklushon ku posiblemente el a ser skirbí alrededor di aña 125 despues di Kristu, apénas algun dékada despues di apòstel Huan su morto! Pero paleografia no ta e manera di mas konfiabel pa kalkulá kon bieu un manuskrito ta. Hopi eksperto ta di opinion ku e teksto di e fragmento lo por ta data di kualke aña di siglo 2. Sinembargo, e pida papiro akí tabata, i ta keda, e fragmento di manuskrito di mas bieu di e Skritura Griego Kristian ku hende a yega di haña.

Dikon e fragmento akí di e Evangelio di Huan ta asina importante pa hende ku ta stima Beibel den nos tempu? Tin por lo ménos dos motibu. Di promé, e formato di e fragmento ta yuda nos komprondé kuantu balor e Skritura tabatin pa e promé kristiannan.

Den siglo 2 despues di Kristu, hende tabata  kompilá teksto na dos manera: den forma di ròl òf den forma di kodèks. Un ròl tabata trahá di pidanan di papiro, òf pèrkamènt (algu manera papel di saku maron) di plak òf kosé na otro pa forma un blachi largu. Un hende por a habri un ròl òf ser’é ki ora e tabatin mester di dje. Mayoria di biaha hende tabata skirbí solamente un banda di e ròl.

Ma e fragmento chikitu ku Roberts a haña tabatin teksto na tur dos banda skirbí. Esaki ta indiká ku probablemente el a bini di un kodèks i no un ròl. Un kodèks tabata trahá di papel di pèrkamènt òf papiro ku nan tabata kose na otro i dobla manera un buki.

Dikon un kodèks tabata mas mihó ku un ròl? Wèl, e promé kristiannan tabata predikadó di e bon notisia. (Mateo 24:14; 28:19, 20) Nan a prediká tur kaminda na ken ku nan a topa, di kas pa kas, den plasa i riba kaya. (Echonan 5:42; 17:17; 20:20) Pues tabata hopi mas práktiko pa e kristiannan kana ku e Skritura den un formato chikí.

Ademas, tabata mas fásil pa tantu e kongregashonnan komo kada hende traha su mes kopia di e Skritura. Asina e Evangelionan a ser kopiá bes tras bes. Sin duda esaki a hasi posibel ku mas i mas hende por a bira kristian.

E di dos motibu pakiko e fragmento di Rylands ta asina importante pa nos awe ta pasobra e ta laga nos mira ku e tekstonan bíbliko a ser transmití na un manera konfiabel. Maske e fragmento akí ta kontené djis algun versíkulo di e Evangelio di Huan, e ta bisa kasi meskos ku loke nos por lesa den Beibelnan djawendia. Pues e fragmento di Rylands ta komprobá ku aunke Beibel a ser kopiá bes tras bes den transkurso di tempu, tòg e no a kambia.

Ta klaru ku e fragmento di Rylands di e Evangelio di Huan ta djis un di e tantísimo fragmento- i manuskritonan ku ta duna prueba ku e tekstonan di Beibel a ser transmití na un manera konfiabel. Werner Keller a skirbi den su buki The Bible as History ku “e manuskritonan akí di antigwedat ta kita tur duda di ku e Beibel ku nos tin awendia ta original i konfiabel.”

Ta bèrdat ku kristiannan no ta basa nan fe riba deskubrimentu arkeológiko. Nan ta kere ku “henter e Skritura ta inspirá di Dios.” (2 Timoteo 3:16) Tòg un hoya presioso asin’akí ta sigurá nos ku loke Beibel a bisa for di hopi tempu pasá ta bèrdat: “E palabra di Yehova ta dura pa semper”!—1 Pedro 1:25.