Bo a yega di hasi bo mes e preguntanan akí? Si ta asina, bo no ta e úniko. Hende rònt mundu ta pensa riba e preguntanan importante di bida. Bo ta kere ku bo por haña kontesta pa nan?

Miónes di hende lo bisa: “Sí!” Dikon? Pasobra nan a haña kontesta satisfaktorio pa nan preguntanan den Beibel. Abo lo ke sa kiko Beibel ta bisa? E ora ei, kisas lo bo tin gana di sigui un kurso di Beibel ku Testigunan di Yehova ta ofresé. *

Kisas no ta tur hende ta gusta e idea di analisá Beibel. Algun lo bisa: “Mi no tin tempu.” “E ta muchu kompliká.” “Mi no ke mara mi mes na nada.” Pero otronan tin un punto di bista diferente, i nan sí ke analisá kiko Beibel ta bisa. Laga nos wak algun ehèmpel:

• “Mi tabata bai misa katóliko i protestant, un tèmpel sikh i un monasterio budista, i mi a studia teologia na universidat. Tòg mi no tabata haña kontesta pa mi preguntanan. Ma un dia un Testigu di Yehova a yama na mi kas. Su kontestanan basá riba Beibel a impreshoná asina tantu ku mi a disidí di aseptá un kurso di Beibel.”—Gill, Inglatera.

• “Mi tabatin hopi pregunta tokante bida, pero e kontestanan ku mi pastor a duna mi no tabata konvensé mi. Pero, un Testigu di Yehova a usa Beibel so pa kontestá mi preguntanan. Ora el a puntra mi si mi ke siña mas, mi a aseptá gustosamente.”—Koffi, Benin.

• “Mi tabatin masha gana di sa kiko ta e kondishon di e mortonan. Mi tabata kere ku e mortonan por hasi hende daño, p’esei mi tabata ke sa kiko Beibel ta bisa tokante esei. Pues mi a kuminsá analisá Beibel ku un amigu ku ta Testigu di Yehova.”—José, Brazil.

• “Mi a kuminsá lesa Beibel, pero mi no por a komprond’é. Anto un dia Testigunan di Yehova a bini serka mi i a splika mi vários profesia di Beibel na plaka chikí. Mi kier a mira kiko mas mi por a siña.”—Dennize, México.

• “Mi tabata puntra mi mes si Dios di bèrdat ta interesá den mi. P’esei mi a disidí di resa na e Dios ku Beibel ta papia di dje. Su manisé, Testigunan di Yehova a yama na mi kas i mi a aseptá un kurso di Beibel.”—Anju, Nepal.

E eksperensianan ei ta pone nos kòrda riba e palabranan di Hesus: “Felis ta esnan ku ta konsiente di nan nesesidat spiritual.” (Mateo 5:3) Sí, di naturalesa hende tin e nesesidat di konosé Dios. I ta e so por satisfasé e nesesidat ei. E ta hasi esei pa medio di su Palabra, Beibel.

Pues, kiko un kurso di Beibel ta enserá? Kon e por yuda bo? E siguiente artíkulo lo kontestá e preguntanan akí.