“Si bo mester di algu, laga mi sa. Kiko ku bo pidi mi, lo mi hasié ku mil amor.” Probablemente lo bo no bisa e palabranan akí na un hende ku bo no konosé òf na djis kualke konosí. Di otro banda, lo bo no tin ningun problema pa bisa esei na un amigu stimá. Bon amigunan semper ta dispuesto pa yuda otro i hasi loke e otro pidi.

Beibel ta mustra ku Yehova tin kustumber di hasi kosnan ku e sa lo laga su sirbidónan disfrutá mas di bida. Por ehèmpel, Rei David, ku tabata un bon amigu di Dios, a bisa: ‘O Yehova mi Dios, hopi ta e maravianan ku bo a hasi i bo pensamentunan pa ku nos; nan ta muchu hopi pa konta.’ (Salmo 40:5) I no esei so, Yehova ta asta hasi kos bon pa hende ku ni sikiera konos’é. E ta ‘laga nan haña kuminda na abundansia i ta yena nan kurason ku alegria.’—Echonan 14:17.

Yehova gusta hasi otro hende kontentu. P’esei, ta lógiko ku esnan ku ke bira amigu di Dios tambe lo ke hasi kosnan ku ta hasi su “kurason kontentu.” (Proverbionan 27:11) Pero kiko presis bo por hasi pa agradá Dios? Beibel ta kontestá: “No lubidá di hasi bon i di kompartí loke boso tin ku otro hende, pasobra e tipo di sakrifisionan ei ta agradá Dios.” (Hebreonan 13:16) Pero, esei ke men ku e úniko kos ku nos tin ku hasi pa agradá Yehova ta di hasi bon i ser generoso ku otro hende?

Nò, esei no ta sufisiente. Beibel ta bisa: “Sin fe ta imposibel pa agradá Dios.” (Hebreonan 11:6) Tuma nota ku ta despues ku “Abraham a pone fe den Yehova,” el a ser yamá “amigu di Yehova.” (Santiago 2:23) Hesukristu tambe a mustra bon kla ku ta importante pa “pone fe den Dios” si nos ke risibí Dios su bendishon. (Huan 14:1) Kon anto bo por desaroyá e fe ku Dios ta buska den su amigunan? Bo por kuminsá ku studia Beibel, e Palabra di Dios, ku regularidat. Asina lo bo gana “konosementu eksakto di su boluntat” i lo bo haña sa kon pa agrad’é den tur loke bo ta hasi. Segun ku bo ta haña mas konosementu eksakto di Yehova i ta siña tokante su normanan hustu, bo fe den dje lo krese i lo e hala mas serka bo.—Kolosensenan 1:9, 10.