NOS tur a yega di mira hende rabia, i sin duda nos mes tambe a yega di bira furioso. Maske nos ta konsiderá rabiamentu komo un emoshon ku nos tin ku dominá, tòg nos tin e tendensia di hustifik’é, spesialmente ora un hende hasi algu ku segun nos ta inhustu. Un artíkulo di e Asosiashon Merikano di Sikologia ta asta bisa ku “rabiamentu ta un emoshon humano kompletamente normal i, por lo general, saludabel.”

E punto di bista ei por parse rasonabel si kompar’é ku loke apòstel Pablo a bisa bou di inspirashon divino. El a aseptá ku tin biaha hende por rabia i a bisa: “Boso por rabia sí, pero no peka; no laga solo baha miéntras ku ainda boso ta rabiá.” (Efesionan 4:26) Pues, esaki ke men ku nos mester ekspresá nos rabia? Òf yùist nos mester hasi nos bèst pa kontrol’é?

Ora ku Pablo a duna e konseho tokante rabiamentu, kisas e tabata pensa riba Salmo 4:4 ku ta bisa: “Rabia, ma no hasi piká.” Akaso Pablo tabata animá e kristiannan pa ekspresá nan rabia? Nò, al kontrario. El a sigui bisa: “Kita tur tipo di amargura malisioso, rabia, furia, gritamentu i papiamentu di kos ofensivo for di boso, i tambe tur loke ta perhudisial.” (Efesionan 4:31) Ta bon pa nota ku e artíkulo di e Asosiashon Merikano di Sikologia a sigui bisa: “Investigashonnan ta mustra ku, bon mirá, ora bo ekspresá bo rabia, bo ta bira mas rabiá i agresivo i esei no ta yuda bo . . . solushoná e problema.”

Kon anto nos por “kita tur tipo di” rabia i evitá su mal efektonan? E rei sabí Sálomon di Israel di antigwedat a skirbi: “Prudensia [òf, “perspikasia,” NW] di un hende ta hasi ku e no ta rabia lihé, i pa laga un ofensa pasa ta su gloria.” (Proverbionan 19:11) Kon “perspikasia” por yuda un persona ora e ta sinti rabia lanta den dje?

Perspikasia, òf inzicht, ta e abilidat di mira mas ayá di e superfisie; mira kiko tin tras di  un situashon òf komprondé un situashon maske sierto detaye no ta kompletamente opvio. Kon esaki por yuda nos ora nos rabia òf ser ofendí?

Ora nos mira un inhustisia tuma lugá, nos por bira furioso. Pero si nos keda sin dominá nos emoshon i reakshoná na un manera violento, nos lo por hasi daño na nos mes i asta na otronan. Meskos ku un kandela for di kontrol por kima henter un kas, asina tambe rabia deskontrolá por daña nos reputashon, nos amistat ku otronan i asta ku Dios. Pues, ora nos ta sinti rabia lanta den nos, ta momento pa nos para ketu i analisá e situashon. Si nos tin un bista kompleto di e situashon, esei por yuda nos kontrolá nos emoshonnan.

E tata di Sálomon, Rei David, a hera di asesiná un hòmber ku yama Nabal. Si David no a haña yudansa pa wak mas aleu den e situashon akí, lo e por a bira kulpabel di sanger. Wak kiko a pasa. David ku su hòmbernan a protehá e karnénan di Nabal den e desierto di Hudea. Ora tabata tempu pa pela e karnénan, David a pidi Nabal dun’é algu di kome pa e ku su hòmbernan. Nabal a kontest’é: “Mi mester kohe mi pan, mi awa i mi karni ku mi a mata pa mi peladónan di karné, i duna esaki na hòmbernan ku mi no sa for di unda nan ta bin?” Ki un insulto esaki tabata! Ora David a tende e palabranan ei, e ku su 400 hòmbernan a sali mesora pa bai mata Nabal i tur e hòmbernan di su kas.—1 Samuel 25:4-13.

Abigail, e kasá di Nabal, a tende kiko a pasa i a bai pa kontra David. Ora Abigail a top’é, el a kai na rudia i a bis’é: “Laga bo sirbiente papia ku bo, i skucha e palabranan di bo sirbiente.” E ora ei Abigail a splika David kon bobo Nabal tabata. Tambe el a bisa David ku lo e lamentá si e tuma vengansa i drama sanger.—1 Samuel 25:24-31.

Abigail a yuda David komprondé algu ku e no a mira promé, i asina el a logra kalma e situashon tenso. Di promé, David a mira ku Nabal tabata bobo i brutu di naturalesa. Na di dos lugá, David a mira ku lo e por a bira kulpabel di sanger si e tuma vengansa. Meskos ku David, bo tambe por tin motibu pa bira furioso. Kiko bo mester hasi? “Hala rosea profundo i konta te 10,” segun un artíkulo tokante téknikanan pa kontrolá rabia di Mayo Clinic. Pues, para ketu i pensa un ratu kiko a kousa e problema, i kiko lo ta e konsekuensianan di loke bo tin pensá di hasi. Laga perspikasia kalma bo rabia i asta kit’é kompletamente.—1 Samuel 25:32-35.

Awe tambe hopi hende a haña yudansa pa kontrolá nan rabia. Por ehèmpel, Sebastian a siña kontrolá su mal karakter i emoshonnan fuerte pa medio di un estudio di Beibel tempu ku e tabatin 23 aña i tabata prezu na Polonia. El a splika: “Promé, mi ta pensa tokante e problema. Despues, mi ta trata di sigui e konseho di Beibel. I m’a ripará ku Beibel ta e mihó guia.”

Setsuo a siña e mesun kos. El a bisa: “Mi tabata grita mi koleganan di trabou ora ku mi tabata fadá ku nan. Awor ku mi sa kiko Beibel ta bisa, mi no ta grita mas, ma mi ta puntra mi mes: ‘Ta ken su falta eigenlijk? Kisas ta mi mes ta e problema?’” E tipo di preguntanan ei a yud’é trankilisá su mes i kontrolá su emoshonnan.

Rabia por ta un emoshon hopi fuerte, pero e konseho ku tin den e Palabra di Dios ta mas fuerte ainda. Si bo apliká e konseho sabí di Beibel i pidi Dios yuda bo, bo tambe lo por haña e perspikasia nesesario pa bo no rabia lihé.