Tabata rasonabel pa David spera ku Dios ta kòrda riba dje? Dios ta kòrda riba bo? Hopi hende tin difikultat pa kere ku un Dios todopoderoso tin interes den nan. Dikon?

Un motibu ta ku Dios ta un ser muchu mas grandi i supremo ku un simpel ser humano. For di su posishon superior tur e nashonnan “ta manera un gota for di un hèmber, . . . manera stòf riba balansa.” (Isaías 40:15) Un eskritor di nos tempu, ku no ta kere den Dios, a yega asina leu di konkluí ku “pa un hende kere ku ta eksistí un ser supremo ku tin interes den nos i den loke nos ta hasi, e mester ta basta ingenuo.”

Di otro banda, tin hende ta sinti ku pa motibu di nan komportashon, nan no meresé Dios su atenshon. Por ehèmpel, un hòmber ku yama Jim ta relatá: “Konstantemente mi tabata pidi Dios p’e duna mi pas i dominio propio. Pero tòg semper mi rabia tabata bini bèk. Finalmente, mi a konkluí ku mi tabata asina mal hende ku ni Dios no por a yuda mi.”

Ta asina leu for di hende Dios ta ku e no ta aster nos mes? Kiko Dios ta pensa di su kriaturanan imperfekto? Si Dios lo no a laga nos sa ken e ta, niun ser humano lo no por kontestá e preguntanan akí p’e. Pero Beibel, Dios su palabra inspirá pa humanidat, ta sigurá nos ku e no ta un ser misterioso ku no tin kunes ku nos. Beibel ta bisa: “E no ta masha leu for di kada un di nos.” (Echonan 17:27) Den e siguiente kuater artíkulonan nos lo konsiderá kiko Dios ta bisa tokante su interes den kada un di nos i kon e ta demostrá esaki.