DIKON TIN HENDE TA DUDA: Di akuerdo ku estudionan hasí resientemente, nos galaksia so ta kontené por lo ménos 100 mil mion planeta. En bista di e inmenso tamaño di universo, un hende por puntra su mes: ‘Dikon e Kreador todopoderoso lo ke tin gana di mira loke hende insignifikante di e planeta chikititu akí ta hasi?’

LOKE BEIBEL TA SIÑA: Dios no a djis duna nos su Palabra skirbí i laga nos pa nos kuenta. Mas bien, Dios, kende su nòmber ta Yehova, ta sigurá nos: “Lo mi konsehá bo; mi wowo ta riba bo.”—Salmo 32:8.

Laga nos wak e ehèmpel di Hagar, un muhé egipsio di siglo 20 promé ku Kristu. Hagar, e kriá di Sarai, a falt’é rèspèt. P’esei Sarai a humi’é i Hagar a hui bai den desierto. Awor ku Hagar a faya, akaso Dios a pèrdè interes den dje? Beibel ta bisa: “E angel di SEÑOR a hañ’é.” E angel ei a sigurá Hagar: “SEÑOR a tende bo aflikshon.” E ora ei Hagar a bisa Yehova: “Bo ta un Dios ku ta mira.”—Génesis 16:4-13.

E “Dios ku ta mira” tin bista riba abo tambe. Por ehèmpel: Un mama amoroso ta spesialmente atento ku su yunan chikitu, ya ku mas chikí un yu ta, mas atenshon e mester haña di su mayornan. Meskos tambe, Dios tin bista riba nos spesialmente ora nos ta kibrá di kurason i débil. E ta bisa: “Mi ta biba den un lugá haltu i santu i tambe huntu ku esnan humilde i di spiritu kibrá, pa rebibá spiritu di e hende kibrá i pa rebibá kurason di e humilde.”—Isaías 57:15.

No opstante, bo por pensa: ‘Kon Dios ta wak mi? E ta husga mi a base di mi aparensia òf e ta wak mas ayá i ta komprondé realmente ken mi ta?’