M’a nase den un bario di klase media na Bilbao, parti nort di Spaña. Di mi kuater rumannan, ami tabata esun di dos. Nos famia tabata masha katóliko i mi tabata un fiel baidó di misa. Ku mi 23 aña m’a bira maestra di skol; un profeshon ku m’a stima i ehersé pa 40 aña. Aparte di vários materia ku mi tabata duna, mi tabata sinti mi orguyoso di por a duna lès di religion. Anochi mi tabata duna mucha muhé ku mester a bai ‘risibí’ lès di katisashi.

Despues di tabata 12 aña felismente kasá, m’a bira biuda ku kuater yu muhé pa kria. Mi tabatin apénas 33 aña. M’a buska konsuelo den mi fe katóliko, pero mi no por a haña kontesta pa mi preguntanan: ‘Dikon hende ta sigui muri si Kristu a libra nos? Dikon nos ta pidi den orashon pa e Reino di Dios bini si tur bon hende ta bai shelu?’ Pero esun ku mas tabata molestiá mi ta: ‘Si Dios ta husga nos ora nos muri, dikon despues nos mester bandoná shelu, purgatorio òf fièrnu pa e huisio final?’

M’a hasi algun pastor ku mi konosé e preguntanan ei. Un di nan a bisa mi: “Mi no sa. Bai puntra obispu. Pakiko bo ta preokupá bo kabes? Bo ta kere den Dios, tòg? Esei mes ta mas ku basta.” Pero mi no a entregá. Den mi afan pa haña kontesta, m’a asistí na konferensianan di hesuita, pentekostal i gnóstiko. Ma serka niun mi no a haña kontesta satisfaktorio.

Tempu mi tabatin 60 i piku aña di edat, un alumno di 7 aña a invitá mi pa asistí na un reunion di Testigunan di Yehova. M’a gusta loke m’a mira i tende pero, debí na mi bida drùk e tempu ei, mi no tabatin mas kontakto ku e Testigunan. Sinembargo, dos aña despues, un pareha Testigu ku yama Juan ku Maite a bati na mi porta. Tres luna largu, nan a kontestá delaster un pregunta ku mi tabatin i finalmente m’a kuminsá studia Beibel.

Tur siman mi tabata ansioso pa nan bishita. Mi tabata investigá tur kos kuidadosamente, hasiendo uso di tres tradukshon  di Beibel pa hasi sigur ku loke nan a siña mi tabata e bèrdat. No a dura hopi ku m’a bin realisá kon robes mi tabata, pa años, den sentido religioso. E gran diferensia entre loke mi tabata kere aden i loke m’a siña di Beibel a kasi tolondrá mi. M’a sinti ku tur mi kreensianan, manera un palu bon ankrá, a ser ranká ku rais ku tur.

Poko despues, mi di dos kasá a bira hopi malu i muri. Den e mesun temporada ei, m’a baha ku penshon i a bai for di Bilbao pa un tempu. Juan ku Maite tambe a bai biba otro kaminda. Ku doló na mi kurason, m’a stòp di studia Beibel. Ma, di paden mi tabata sa ku m’a haña un tesoro. Nunka m’a lubidá esei.

Un 20 aña despues, tempu mi tabatin 82 aña, Juan ku Maite a regresá Bilboa i nan a pasa bishitá mi. Esta kontentu mi tabata di mira nan atrobe. M’a realisá ku Yehova no a lubidá mi, i m’a bolbe kuminsá studia. Juan ku Maite tabatin hopi pasenshi ku mi, ya ku vários biaha mi tabata hasi nan e mesun preguntanan. Pero mi kier a tende bes tras bes e rasonamentu bíbliko pa asina mi por a kibra e kabuyanan ku tabatin mi mará na mi kreensianan anterior. Tambe mi tabata ke ta bon prepará pa splika e bèrdat di Beibel na mi famia i amigunan.

Por fin, na e edat di 87 aña m’a batisá na un asamblea di Testigunan di Yehova. Esei tabata e dia di mas felis di mi bida. Pa e okashon ei un ansiano kristian a duna un diskurso bíbliko ku tabata spesialmente dirigí pa nos ku tabata bai batisá. E diskurso a pone mi yora. M’a sinti manera kos ku ta Yehova mes tabata papia ku mi. Despues ku mi a batisá, yen di Testigu a bin felisitá mi, aunke mayoria di nan no tabata konosé mi.

Semper mi tabata sa ku Hesukristu ta “e kaminda.” (Huan 14:6) Pero mi estudio di Beibel a yuda mi siña konosé Yehova, esun ku Hesus ta dirigí nos na dje. Awor mi por resa na Dios komo mi Tata i Amigu stimá. E buki Hala Serka Yehova * a hasi un impreshon profundo riba mi. E promé biaha m’a les’é den un solo anochi. M’a keda konmoví di siña kon miserikòrdioso Yehova ta.

Ora mi pensa riba mi trayektoria largu di buskamentu di e bèrdat, mi ta kòrda e palabranan di Hesus: “Sigui pidi, i boso lo risibí; sigui buska, i boso lo haña; sigui bati na porta, i lo habri pa boso.” (Mateo 7:7) Awor ku m’a haña e kontestanan ku m’a anhelá asina tantu, mi ta felis di por kompartí nan ku otro hende.

Aunke mi tin 90 aña di edat, mi ta sinti ku den sentido spiritual mi ta pichon pichon. Kada reunion na Salòn di Reino ta un okashon spesial—tantu pa e balioso konosementu ku mi ta haña komo pa e kompania di mi rumannan stimá. Mi ke bolbe bira un maestra den e Paradeis ku Dios a primintí aki riba tera. (Revelashon 21:3, 4) Mi ta ansioso pa mira mi sernan kerí ku a fayesé bèk na bida pa mi por siña nan e bèrdat di Beibel i konta nan di e bunita regalo ku Yehova a duna mi den mi behes!—Echonan 24:15.