IMAGINÁ kon Abel ta wak su karnénan kome yerba trankil di nan riba un seritu. Pero kisas hopi mas leu for di kaminda su bestianan ta, su bista ta kai riba algu ku ta bria leu aya. E tabata sa ku einan tabatin un spada na kandela ku tabata drei kontinuamente, blòkiando asina e kaminda pa drenta e hòfi di Edén. Un tempu su mayornan tabata biba ei den, pero awor ni nan ni nan yunan no por drenta mas. Imaginá bo kon e bientu di atardi lat ta pasa den Abel su kabei, segun ku e ta hisa kara wak shelu i pensa riba su Kreador. E brecha ku tin entre hende i Dios lo por sera un dia? Esei tabata Abel su deseo di mas grandi.

Awe Abel ta papia ku bo. Bo por tend’é? Kisas bo ta bisa ku esei ta imposibel, ya ku e di dos yu di Adam akí a muri hopi tempu pasá. Despues di kasi 6.000 aña no a sobra nada mas di ni su restunan. Fuera di esei, Beibel ta siña nos ku “e mortonan no sa nada.” (Eklesiástes 9:5, 10) I ni un solo palabra ku Abel a papia a keda registrá den Beibel. Pues kon e por ta papia ku nos?

Bou di inspirashon, apòstel Pablo a bisa: “Maske Abel a muri, e ta papia ainda.” (Hebreonan 11:4) Pa medio di kiko Abel ta papia? E ta papia pa medio di su fe. Abel tabata e promé ser humano ku a desaroyá e ekselente kualidat ei. El a demostrá su fe na un manera asina ekstraordinario ku su ehèmpel ta un patronchi bibu i vibrante ku nos djawe por imitá. Si nos siña di su fe i hasi esfuerso pa imit’é, e ora ei e relato di Abel ta papia ku nos na un manera masha real i efektivo.

Pero kiko nos por siña di Abel i di su fe siendo ku Beibel ta bisa masha tiki di dje? Laga nos mira.

Abel a nase kasi na komienso di historia humano. Mas despues Hesus a papia di Abel komo si fuera e promé ku a nase “for di dia a funda mundu.” (Lukas 11:50, 51) Opviamente, aki Hesus tabata referí na e mundu di humanidat ku tin e speransa di ser reskatá for di piká. Aunke Abel tabata e di kuater ser humano na mundu e tempu ei, aparentemente e tabata e promé hende ku Dios a mira komo unu ku por haña salbashon. * Ta bisto ku Abel no a lanta den un bon ambiente familiar.

Pues aunke e mundu tabata yòn, un nubia di tristesa tabata kologá riba e famia humano. Abel su mayornan, Adam ku Eva, lo tabata bunita di aparensia i yen di energia. Pero nan a kometé e eror di mas grandi di nan bida, i nan tabata sa esei. Un tempu nan tabata perfekto i tabatin e chèns di biba pa semper. Komo ku nan a rebeldiá kontra Yehova Dios, nan a ser saká for di e hòfi di Edén, nan hogar den e Paradeis. Pa motibu ku nan a pone nan mes deseo promé ku tur otro kos—promé ku asta e nesesidatnan di nan desendientenan—nan a pèrdè perfekshon i bida eterno.—Génesis 2:15–3:24.

 Obligá na biba pafó di e hòfi di Edén, Adam ku Eva a ripará ku bida tabata duru. Pero ora nan promé yu a nase, nan a yam’é Kain, esta, “Algu Produsí,” i Eva a bisa: “Mi a haña [òf, produsí] un yu hòmber ku yudansa di SEÑOR.” Eva su palabranan ta indiká ku kisas e tabatin na mente e promesa ku Dios a hasi den e hòfi, esta, ku un sierto muhé lo a haña un “simia” ku lo kaba un dia ku e malbado ku a engañá Adam ku Eva. (Génesis 3:15; 4:1) Akaso Eva a kere ku ta é tabata e muhé menshoná den e profesia ei i ku Kain tabata e “simia” primintí?

Si ta asina, e tabata gran kiboká. Es mas, si Adam ku Eva a hinka e ideanan ei den Kain su kabes segun ku e tabata krese, esei sigur lo a lanta su orguyo. Ku tempu, Eva a haña su di dos yu hòmber, pero di e yu akí sí e no a bisa nada partikular. Nan a yam’é Abel, ku kisas ta nifiká “Suspiro,” òf “Banidat.” (Génesis 4:2) Akaso nan a dun’é e nòmber ei pasobra nan no tabatin muchu speransa den dje manera nan tabatin den Kain? Nos no ta sigur.

En todo kaso, mayornan djawe por siña hopi for di e promé mayornan ei. Puntra bo mes: Mi palabra- i akshonnan ta hinka orguyo, ambishon i egoismo den mi yunan? Òf mi ta siña nan stima Yehova i forma un amistat kuné? Lamentablemente, e promé mayornan a faya ku nan responsabilidat. Pero, pa nan desendientenan ainda sí tin speransa.

Segun ku Kain i Abel tabata krese, Adam lo a siña nan e trabounan ku nan tabatin ku hasi pa perkurá p’e famia. Kain a bira kunukero i Abel a bira wardadó di karné.

Ma Abel a hasi algu hopi mas importante. Durante e añanan ku a pasa, el a desaroyá fe; esei ta e bunita kualidat ku Pablo a skirbi di dje despues. Awor, pensa un ratu: Kiko a yuda Abel haña fe den Yehova Dios siendo ku no tabatin ningun ser humano ku e por a mira riba dje? Laga nos konsiderá tres kos ku por a yuda Abel haña un fe fuerte den Dios.

Yehova su kreashon.

Ta bèrdat ku Yehova a maldishoná e tera ku mata di sumpiña i mal yerba ku a stroba kultivamentu di tera. Pero asina mes, e tera tabata produsí sufisiente kuminda pa Abel i su famia. Di otro banda, Dios no a maldishoná e animalnan—inkluso para i piská—ni seru, lago, riu i laman; ni tampoko shelu, nubia, solo, luna i strea. Pues tur kaminda ku Abel a wak, e por a mira prueba di e gran amor, sabiduria i bondat di esun ku a krea tur kos, Yehova Dios. (Romanonan 1:20) Segun ku Abel a meditá riba e kreashon i tambe riba Dios su kualidatnan, su fe a bira mas fuerte.

Abel sigur a tuma su tempu pa meditá riba su relashon ku Dios. Imaginá kon Abel tabata kuida su karnénan. Un wardadó di karné tabatin ku kana hopi. E tabata guia e bestianan mansu akí pa subi  seru, krusa vaye i riu, tur esaki pa nan haña e yerba di mas bèrdè, e mihó fuente di awa i e mihó lugá pa sosegá. Di tur animal ku Dios a krea, karné ta parse esun di mas indefenso, komo si fuera kreá ku e nesesidat pa hende protehá nan i guia nan. Akaso Abel tambe lo a sinti ku e tabatin mester di guia, protekshon i kuido di un ser mas sabí i mas poderoso ku kualke ser humano? Sin duda el a ekspresá hopi di e sintimentunan akí den su orashonnan i komo resultado su fe lo a sigui krese.

Yehova su promesanan.

Adam ku Eva lo mester a konta nan yunan kiko nan a hasi ku a pone Dios saka nan for di e hòfi di Edén. Pues, Abel tabatin hopi kos pa meditá ariba.

Yehova a bisa ku e tera lo a keda maldishoná. Na e matanan di sumpiña i mal yerba ku tera a produsí Abel por a mira bon kla ku e palabranan ei a kumpli. Yehova a bisa tambe ku Eva lo a sufri di doló durante su embaraso i ku lo el a duna lus ku doló di parto. Ora Abel su rumannan a nase, sin duda e por a mira e palabranan ei tambe kumpli. Yehova a premirá ku Eva lo a sinti un nesesidat desbalansá di e amor i atenshon di su kasá, i ku Adam na su turno lo a domin’é. Abel por a mira e tristu realidat ei ku su mes wowo. Den kada un di e kasonan akí, Abel por a mira ku Yehova su palabra ta kompletamente konfiabel. P’esei, Abel tabatin bon motibu pa pone fe den Dios su promesa tokante un “simia” ku un dia lo drecha tur loke a bai robes for di den Edén.—Génesis 3:15-19.

Yehova su sirbidónan.

Abel su famia no tabata un bon ehèmpel p’e, pero nan no tabata e úniko sernan inteligente na mundu e tempu ei. Ora Yehova a saka Adam ku Eva for di e hòfi, el a hasi sigur ku ni nan ni nan desendientenan no por a drenta den e Paradeis ei. Pa protehá e entrada, Yehova a pone kerubin—angel di alto rango—einan huntu ku un spada na kandela ku tabata drei rònt sin stòp.—Génesis 3:24.

Imaginá kon Abel komo mucha lo tabata wak e kerubinnan ei. Komo ku nan tabatin forma di hende, Abel por a mira ku nan tabata sumamente poderoso. I e “spada,” semper na kandela i semper den moveshon, tambe lo mester a impreshoná Abel. Segun ku Abel tabata krese, akaso el a yega di mira e angelnan akí fada i kita bai for di nan puesto? Nò. E kriaturanan inteligente i poderoso ei a keda na nan puesto, di dia i anochi, aña aden aña afó, siglo aden siglo afó. Pues Abel por a siña ku Yehova Dios tabatin sirbidónan hustu i fiel. Den e kerubinnan ei Abel a mira un klase di lealtat i obedensia na Yehova ku e no por a mira den su mes famia. E ehèmpel di e angelnan akí sigur a fortalesé su fe.

Segun ku Abel a meditá riba tur loke Yehova a revelá di su mes mediante e kreashon, su promesanan i e ehèmpel di su angelnan, su fe a bira mas fuerte. Pues, nos por siña hopi for di Abel su ehèmpel. E ta laga foral e hóbennan mira ku maske kiko otro miembro di nan famia hasi, nan por desaroyá un berdadero fe den Yehova Dios. Ku tur e maravianan di kreashon rònt di nos, Beibel kompleto na nos disposishon i tambe e tantísimo ehèmpelnan humano di fe, awe nos tin un base sólido pa edifiká nos fe.

Segun ku Abel su fe den Yehova tabata krese, e tabata buska manera pa ekspresá su fe ku akshon. Pero kiko un simpel hende por a duna e Kreador di universo? De echo, Dios no tin mester di regalo òf yudansa di ningun ser humano. Sinembargo ku tempu, Abel a bin komprondé un bèrdat fundamental: si e simplemente ofresé Yehova lo mihó ku e tabatin, ku e motivashon korekto, su Tata selestial amoroso lo a keda kontentu ku esei.

Di manera ku Abel a prepará pa ofresé Dios algun karné di su tou. El a skohe esnan di mas mihó, di entre e proménan ku a nase, i a ofresé loke é a konsiderá e mihó partinan di e lamchinan komo sakrifisio. Mientrastantu, Kain tambe a buska e bendishon i fabor di Dios, i p’esei el a prepará un ofrenda di su kultivo. Pero Kain no tabatin e mesun motivashon ku Abel tabatin. E diferensia  akí a bira bisto ora e rumannan a presentá nan ofrenda.

Kada un di e dos yunan di Adam lo a usa altar i kandela pa ofresé nan ofrenda, podisé na bista di e kerubinnan, kendenan p’e tempu ei tabata e úniko representantenan di Dios aki riba tera. Kiko Yehova a pensa di e ofrendanan akí? Na Génesis 4:4, nos ta lesa: “SEÑOR a apresiá Abel i su ofrenda.” E relato no ta bisa kon Yehova a laga Abel sa ku el a apresiá su ofrenda. Pero dikon Dios a apresiá Abel su ofrenda?

Ta e ofrenda riba su mes ku Abel a ofresé? Abel a ofresé un animal bibu i a drama su sanger; e sanger a representá e bida di e animal. Abel a komprondé kon balioso un sakrifisio asina lo tabata? Siglonan mas despues, Dios a usa e sakrifisio di un lamchi sano pa representá e sakrifisio di su mes yu perfekto, “e lamchi di Dios,” kende su sanger inosente lo a ser dramá. (Huan 1:29; Éksodo 12:5-7) Ma esakinan ta kosnan ku Abel lo no por a komprondé kompletamente.

Loke sí nos ta sigur di dje ta ku Abel a ofresé lo mihó ku e tabatin. Yehova a apresiá tantu Abel su ofrenda komo Abel mes, pasobra Abel a aktua motivá pa berdadero amor i fe den Yehova.

Na kontraste ku Abel, Yehova ‘no a apresiá Kain i su ofrenda.’ (Génesis 4:5) No ku Kain su ofrenda tabata malu riba su mes, ya ku mas despues e Lei di Dios a permití hende ofresé produkto di tera. (Levítiko 6:14, 15) Pero Beibel ta bisa di Kain ku “su obranan tabata malu.” (1 Huan 3:12) Kain lo a pensa, manera hopi hende ta pensa te awe, ku djis pretendé di sirbi Dios lo ta sufisiente. No a tarda mashá pa su akshonnan revelá su falta di berdadero fe i amor pa Yehova.

Ora Kain a mira ku e no a haña Yehova su aprobashon, e no a purba di siña for di e ehèmpel di Abel. Al kontrario, el a haña hopi rabia riba su ruman. Yehova a mira loke tabata pasando den Kain su kurason, i p’esei ku pasenshi el a rasoná kuné. Yehova a spièrta Kain ku su proseder lo por a hiba na piká serio, i tambe el a sigurá Kain ku lo el a bolbe asept’é, basta Kain a kambia su proseder.—Génesis 4:6, 7.

Ignorando Dios su spièrtamentu, Kain a invitá su ruman hòmber mas yòn pa bai dal un buèlta kuné den kunuku. Einan Kain a ataká Abel i a mat’é. (Génesis 4:8) Den un sentido, Abel a bira e promé víktima di persekushon religioso, e promé mártir. Aunke el a muri, su relato no a kaba einan.

Den un sentido figurativo, Abel su sanger a sklama na Yehova pa vengansa òf hustisia. Dios a kastigá Kain pa su krímen pa asina hustisia prevalesé. (Génesis 4:9-12) Mas importante ainda, e registro di Abel su fe ta papia ku nos awe. Aunke Abel a biba masha poko—kisas un siglo—na komparashon ku e hendenan di su époka, el a biba pa agradá su Kreador. El a muri sabiendo ku e tabatin e amor i aprobashon di su Tata selestial, Yehova. (Hebreonan 11:4) Nos por ta sigur ku e ta safe den Yehova su memoria ilimitá, wardando e resurekshon pa biba den e Paradeis riba tera. (Huan 5:28, 29) Abo lo top’é einan? Lo bo por top’é basta bo ta determiná pa skuch’é ora e ta papia i pa imitá su fe ekstraordinario.