ABO tambe, meskos ku hopi otro hende, ta pensa ku no por evitá korupshon i ku no por kaba kuné kompletamente? Tal sintimentu ta komprendibel. Atraves di tempu, hende a purba tur tipo di gobièrnu ku bo por imaginá. Sinembargo, nunka nan no a logra eliminá korupshon. Lo yega e dia ku tur hende lo ta onesto?

Beibel ta bisa ku sí. E ta splika ku pronto Dios lo dal e pasonan nesesario pa eliminá korupshon for di riba tera. Lo e hasi esaki pa medio di su Reino, un gobièrnu selestial ku lo transformá nos planeta Tera kompletamente. Esaki ta e mesun Reino ku Hesus a siña su siguidónan pidi p’e. Den e orashon di ‘Nos Tata,’ Hesus a bisa: “Laga bo reino bini; bo boluntat sea hasí na tera.”—Mateo 6:10, BPK.

Enkuanto e Rei di e Reino ei, Hesukristu, Beibel ta profetisá lo siguiente: “E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia.” (Salmo 72:12-14) Tuma nota ku Hesus ta sinti pa e víktimanan di korupshon, i lo e tuma medida pa libra nan for di opreshon! Esaki no ta un konsuelo?

E Reino di Dios den man di e Rei kompasivo i poderoso ei lo kaba ku korupshon. Lo e eliminá e tres faktornan ku ta kousa korupshon.

Aktualmente nos tur tin inklinashonnan pekaminoso ku ta pone nos aktua na un manera egoista. (Romanonan 7:21-23) Pero, ainda tin bon hende ku ke hasi loke ta korekto. Nan ta pone fe den e sakrifisio di reskate di Hesus pa nan por risibí pordon di nan pikánan. * (1 Huan 1:7, 9) E personanan ei lo tin e oportunidat di benefisiá di e akto di mas grandi di amor ku Dios a efektuá, manera Huan 3:16 ta bisa: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”

Dios lo hasi algu berdaderamente maravioso pa hende ku ta keda fiel na dje. Den e binidero mundu nobo lo e kita tur rastro di piká i  perkurá pa gradualmente nan bira perfekto i haña un posishon aprobá su dilanti. (Isaías 26:9; 2 Pedro 3:13) Nunka mas hende lo bira korupto pa motibu di piká. Bou di gobernashon di e Reino di Dios, hende fiel lo ser librá di sklabitut na korupshon.

Lamentablemente, hopi hende ta perhudiká otronan pa malu. Nan ta probechá di e hòmber chikí i ta influensiá otro hende pa nan tambe bira korupto. Beibel ta spièrta e tipo di hendenan ei: “Laga e malbado bandoná su kaminda, i e hende inhustu su pensamentunan.” Si nan arepentí, Beibel ta primintí ku Dios “lo pordoná [nan] abundantemente.”—Isaías 55:7.

Pero no ta keda Dios nada otro di eliminá esnan ku keda kabesura i nenga di kambia. Pa medio di e Reino di Dios, loke Beibel ta primintí lo bira un realidat: ‘Spera riba Yehova i sigui su kaminda; ora ku e malbadonan wòrdu kòrta kitá afó, abo lo mira esaki.’ * (Salmo 37:34) Ora e malbadonan ku no ke kambia no t’ei mas, e adoradónan fiel di Dios lo no bira víktima mas di korupshon.

E pekadó di mas sin heful ku ta eksistí ta Satanas e Diabel. Nos por ta kontentu ku pronto Yehova lo kita poder for di Satanas pa e no influensiá hende mas. Na su debido tempu, Dios lo destruí Satanas kompletamente. Nunka mas e mònster malbado ei lo por influensiá hende pa bira korupto.

Ta bèrdat ku e idea di ku Dios lo kaba ku tur loke ta kousa korupshon por parse puru ilushon. Kisas bo ta puntra, ‘Dios realmente por trese tal kambio? I si ta asina, dikon e no a hasié for di masha tempu?’ E preguntanan ei ta na nan lugá, i Beibel ta kontestá nan na un manera satisfaktorio. * Nos ta animá bo pa abo mes haña sa kiko Beibel ta siña hende tokante e futuro serkano, ora tur sorto di korupshon lo disparsé pa semper.