Hopi hende ku ta kere den Dios ta haña ku religion mester ta enbolbí den polítika. Segun nan, religion por yuda solushoná e problemanan di humanidat. Pero tin otro kreyente sinsero ku ta di opinion ku religion mester ta separá for di polítika. Kiko abo ta pensa? E dos forsanan poderoso ei mester traha huntu?

HESUKRISTU a ser deskribí komo e personahe “ku mas a influensiá e historia religioso di humanidat.” Pues, imaginá si nos por a puntr’é si religion mester ta enbolbí den polítika, kiko lo el a kontestá? Wèl, loke el a papia i hasi ora e tabata riba tera ta kontestá e pregunta ei. Por ehèmpel, den su famoso Sermon Riba Seru, el a duna instrukshon ku a yuda su siguidónan komprondé ki papel nan mester a hunga den nan komunidat. Laga nos analisá algun punto for di e sermon famoso ei.

Nan Mester Hasi un Impakto den Bida di Otro Hende

Hesus a deskribí e aktitut ku su siguidónan mester tin pa ku mundu. El a deklará: “Boso ta e salu di tera, pero si salu pèrdè su smak, kiko lo dun’é su smak bèk? E no ta sirbi pa nada mas ku pa tira afó i pa hende pasa trapa riba dje. Boso ta e lus di mundu. . . . Laga boso lus bria dilanti di hende, pa asina nan por mira boso obranan ekselente i duna gloria na boso Tata ku ta den shelu.” (Mateo 5:13-16) Dikon Hesus a kompará su disipelnan ku salu i ku lus?

Hesus kier a enfatisá e impakto positivo ku su siguidónan mester tin riba komunidat, p’esei el a kompará nan ku salu i ku lus. Salu no por konserbá un kuminda si bo no meskl’é den dje. Un lampi no por lusa un kamber si bo ten’é pafó di e kamber. Pues, ta bon pa nota ku e palabranan di Hesus ta indiká ku su siguidónan lo ta manera salu, no pa un grupo chikitu so sino pa henter humanidat, i nan lo ta manera lus, no pa un kantidat limitá di hende sino pa tur ku sinseramente ta buska pa konosé Dios. Hesus no tabata ke pa su disipelnan isolá nan mes for di sosiedat. E no a duna òrdu tampoko pa nan bai biba na lugánan aislá i forma komunidat di hende kreyente einan òf pa nan evitá tur kontakto ku hende ku no tabata kompartí nan kreensia. Mas bien, meskos ku salu mester ta den e kuminda pa konserb’é i un lampi mester ta den e kamber pa trese klaridat, asina kristiannan mester ta enbolbí den nan komunidat pa nan por tin un impakto den bida di otro hende.

“Nan No Ta Parti di Mundu”

Pues anto, Hesus a manda su siguidónan pa nan tin trato ku nan próhimo. Pero esaki ta lanta un pregunta importante tokante ki aktitut kristiannan mester tin pa ku polítika. Dikon? Pasobra djis promé ku su morto, el a hasi e siguiente petishon na Dios relashoná ku su siguidónan: “Mi no ta pidi bo pa saka nan for di mundu, ma pa bo protehá nan pa motibu di e Malbado. Nan no ta parti di mundu, meskos ku ami no ta parti di mundu.” (Huan 17:15, 16) Awor bon, kon ta posibel pa kristiannan no ta parti di mundu pero tòg keda enbolbí den nan komunidat lokal? Pa haña e kontesta, laga nos analisá dos pregunta mas:

• Kiko Hesus a pensa di polítika?

• Kristiannan djawe mester ta den polítika?