“Boso lo konosé e bèrdat, i e bèrdat lo hasi boso liber.”​—HUAN 8:32.

BEIBEL ta siña nos e bèrdat tokante Hesus, i e bèrdat ei ta hasi nos liber di kreensianan falsu ku ta konfundí hende. Pero ta importante loke nos ta kere tokante Hesus? Sí, sigur ku sí. E ta importante pa Yehova i pa Hesus, pues e mester ta importante pa nos tambe.

● Dikon e ta importante pa Yehova? Simplemente, pasobra “Dios ta amor.” (1 Huan 4:8) Yehova ke pa nos ta felis i disfrutá di bida pa semper. Hesus a bisa: “Dios a stima mundu [humanidat] asina tantu ku el a duna su Yu unigénito, pa tur ku pone fe den dje . . . haña bida eterno.” (Huan 3:16) Sí, Yehova a manda su Yu unigénito komo nos Redentor pa habri kaminda pa nos por biba pa semper den un paradeis aki riba tera, loke semper tabata Dios su propósito. (Génesis 1:28) P’esei, Dios ta ansioso pa duna e regalo di bida eterno na tur hende ku siña e bèrdat tokante su Yu i ku ta biba na armonia ku esei.​—Romanonan 6:23.

● Dikon e ta importante pa Hesus? Hesus tambe stima humanidat. El a entregá su bida pa nos, demostrando asina ku e stima nos. (Huan 15:13) E tabata sa ku esei ta e úniko manera pa hende haña salbashon. (Huan 14:6) Pues, no ta nada straño ku Hesus ke pa mas tantu hende posibel benefisiá di su sakrifisio di reskate. Ta p’esei mes el a duna su berdadero siguidónan e mandato pa siña hende rònt mundu e boluntat di Dios i Su propósito.​—Mateo 24:14; 28:​19, 20.

● Dikon e ta importante pa nos? Pensa un ratu riba e kosnan ku sigur ta importante pa bo​—bo salú i bo famia. Awor, bo no ta deseá un mihó salú i un mihó bida, pa bo i pa bo sernan kerí? Pa medio di Hesus, Yehova ta ofresé abo i bo sernan kerí e speransa di biba pa semper ku salú perfekto den un mundu nobo, liber di doló i sufrimentu. (Salmo 37:​11, 29; Revelashon 21:​3, 4) Bo no ta deseá di biba den un mundu asina? Si ta asina, tin algu ku bo mester hasi.

Laga nos lesa e teksto di Beibel ku tin sitá te ariba huntu ku e título un biaha mas: “Boso lo konosé e bèrdat, i e bèrdat lo hasi boso liber.” E bèrdat tokante Hesus i e papel ku e ta hunga den kumplimentu di Dios su propósito por libra nos di e pió sklabitut—sklabitut na piká i morto. Pero pa bo por ser librá di esaki, bo mester “konosé e bèrdat.” Bo no ta deseá di siña mas tokante e bèrdat akí i haña sa kon esaki por benefisiá abo i bo sernan kerí? Testigunan di Yehova lo ta kontentu pa yuda bo.