E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Pakiko Dios a hasi e israelitanan un nashon organisá?

Dios a hasi e desendientenan di e patriarka Abraham un nashon organisá i a duna nan un kódigo di lei. El a yama e nashon ei Israel. Nan responsabilidat tabata di protehá adorashon berdadero i e Palabra di Dios, esta, e Skritura Santu. (Salmo 147:​19, 20) Esaki a benefisiá hende di tur nashon.​—⁠Lesa Génesis 22:⁠18.

Sí, Dios a skohe e israelitanan pa nan ta su testigunan. Anto ora nan a obedesé su leinan, nan a risibí hopi bendishon. (Deuteronomio 4:⁠6) Pues, si nos analisá e historia di e israelitanan, nos lo siña konosé e Dios berdadero mihó.​—⁠Lesa Isaías 43:10 i 12.

2. Dikon kristiannan berdadero ta forma parti di un organisashon?

Despues di tempu, e nashon di Israel a pèrdè e aprobashon di Dios, i Yehova a remplasá e nashon akí ku e kongregashon kristian. (Mateo 21:43; 23:​37, 38) P’esei awendia, ta kristiannan berdadero ta Testigunan di Yehova i no e israelitanan.​—⁠Lesa Echonan 15:14 i 17.

Hesus a instruí su siguidónan kon pa duna testimonio tokante Yehova komo un grupo organisá i tambe kon pa hasi hende di tur nashon disipel. (Mateo 10:​7, 11; 24:14; 28:​19, 20) E trabou di prediká akí ta yegando su kulminashon. Awe tin miónes di hende, prosedente di tur nashon, uní den adorashon berdadero. (Revelashon 7:​9, 10) Komo ku kristiannan berdadero ta forma parti di un organisashon, nan por enkurashá otro i yuda otro. I rònt mundu, nan ta haña e mesun instrukshonnan bíbliko na nan reunionnan.​—⁠Lesa Hebreonan 10:24 i 25.

  3. Kon Testigunan di Yehova a kuminsá den tempu moderno?

E organisashon di Testigunan di Yehova di tempu moderno a kuminsá funshoná desde 1870. E tempu ei, un grupo chikitu di studiante di Beibel a redeskubrí vários bèrdat bíbliko ku tabata pèrdí pa hopi tempu. Nan a haña sa ku Hesus a organisá e kongregashon kristian pa prediká e bon notisia. P’esei nan a kuminsá ku un kampaña internashonal di prediká e mensahe di Reino. Na 1931, nan a kuminsá yama nan mes Testigunan di Yehova.​—⁠Lesa Echonan 1:8; 2:​1, 4; 5:⁠42.

4. Kon e organisashon di Testigunan di Yehova ta funshoná awe?

Den promé siglo, tur kongregashon kristian tabata benefisiá di e guia di un grupo di hende, esta e kuerpo gobernante, kendenan tabata rekonosé Hesus komo Kabes di e kongregashon kristian. (Echonan 16:​4, 5) Awe tambe Testigunan di Yehova ta rekonosé Hesus komo nan Lider. (Mateo 23:​9, 10) Nan ta benefisiá di e guia di un Kuerpo Gobernante, ku ta konsistí di ansianonan eksperensiá, kendenan ta usa e Skritura pa duna instrukshon i enkurashamentu na mas ku 100.000 kongregashon. Anto den kada kongregashon tin un grupo di hòmber kualifiká ku ta sirbi komo ansiano, òf superintendente. E hòmbernan akí ta stima e tou di Dios i ta perkurá bon pa nan.​—⁠Lesa 1 Pedro 5:2 i 3.

E propósito di e organisashon di Testigunan di Yehova ta pa prediká e bon notisia i hasi disipel. Anto pa alkansá hende rònt mundu ku e bon notisia di Reino, nan ta tradusí, imprimí i distribuí literatura basá riba Beibel den mas ku 500 idioma. Nan ta prediká di kas pa kas, meskos ku e apòstelnan di Hesus a hasi. (Echonan 20:20) I nan ta ofresé tur hende ku ke haña sa e bèrdat un estudio di Beibel. Sí, Testigunan di Yehova ta hasi esfuerso pa agradá Dios i pa yuda hende, i p’esei nan ta un organisashon di hende felis.​—⁠Lesa Salmo 33:⁠12; Echonan 20:⁠35.

Pa mas informashon, wak kapítulo 19 di e buki akí, Kiko Beibel Ta Siña Realmente?, publiká pa Testigunan di Yehova.