“Graba tur e mandamentunan ku Mi ta duna boso awe den boso kurason. Keda papia di nan ku boso yunan. Papia di nan ora boso ta na kas i ora boso ta na kaminda, ora boso ta bai drumi i ora boso lanta.”​—DEUTERONOMIO 6:​6, 7, BPK.

TIN biaha mayornan por haña ku e responsabilidat di entrená nan yunan ta muchu pisá. Ma ora nan buska konseho, nan ta keda tur konfundí debí na e tantísimo sugerensianan ku nan ta haña. Por ehèmpel, famianan i amigunan ta kla pa duna tur sorto di sugerensia. Ademas, mayornan ta haña un avalancha di konseho ku por ta kontradiktorio for di buki-, artíkulonan di revista i riba Internet.

Di otro banda, Beibel no solamente ta duna mayornan konseho konfiabel ku ta yuda nan sa kiko nan mester siña nan yunan sino tambe guia práktiko riba kon nan tin ku hasi esei. Manera e teksto di Beibel ku nos a sita ariba ta indiká, tur dia mayornan mester buska oportunidat pa papia ku nan yunan tokante Dios. Aki bou ta sigui kuater sugerensia basá riba Beibel ku a yuda míles di mayornan pa siña nan yunan tokante Dios.

1. Siña for di kreashon. Apòstel Pablo a skirbi: “Desde kreashon di mundu [Dios] su atributonan invisibel, su poder eterno i naturalesa divino, a wòrdu mirá klaramente, siendo komprendí dor di loke a wòrdu trahá.” (Romanonan 1:20) Ora mayornan hasi esfuerso pa laga nan yunan komprondé i apresiá e obranan di kreashon i ta yuda nan diserní e bunita kualidatnan di Dios ku esakinan ta manifestá, e muchanan lo hala mas serka Dios.

Hesus a usa e método akí ora el a siña su disipelnan. Por ehèmpel, el a bisa: “Mira e paranan di shelu ku no ta sembra ni kosechá, ni ta warda den mangasina, i tòg boso Tata selestial ta alimentá nan. Boso no tin muchu mas balor ku nan?” (Mateo 6:26) Aki, Hesus a enfatisá Yehova su kualidatnan di amor i kompashon. Ademas di esei, el a yuda su disipelnan mira kon Dios a demostrá e kualidatnan akí pa ku Su yunan.

Salomon, e rei sabí, a referí na e sabiduria instintivo ku Dios a duna vruminga, i el a usa e kriaturanan chikitu akí pa siña nos un lès balioso. El a skirbi: “Bai wak vruminga, abo floho, opservá su maneranan, i sea sabí! E no  tin hefe, ni kapitan, ni gobernante, tòg e ta prepará su kuminda den zomer, i ta rekohé su provishonnan den tempu di kosecha.” (Proverbionan 6:​6-8) Ki un manera ekselente pa siña hende e balor di pone metanan ku ta bale la pena i usa e fortalesa ku Dios ta duna nos pa kumpli ku nan!

Mayornan por imitá e manera efikas ku Hesus i Salomon a siña hende hasiendo lo siguiente: (1) Puntra nan yunan kua mata i bestia nan gusta. (2) Siña mas tokante e matanan i bestianan ei. (3) Splika nan kiko esakinan ta siña nan tokante Dios.

2. Imitá e manera ku Hesus a trata e hendenan ku el a siña. Di tur e hendenan ku a biba riba tera, Hesus ta esun ku tabatin e kosnan di mas importante pa bisa. Tòg el a usa gran parti di su tempu pa hasi pregunta. E tabata masha interesá den e pensamentu- i sintimentunan di e hendenan ku el a siña. (Mateo 17:​24, 25; Marko 8:​27-29) Di mes manera, mayornan tin hopi lès importante pa siña nan yunan. Pero, pa nan haña bon resultado nan mester imitá Hesus i animá nan yunan pa ekspresá nan mes libremente.

Awor, kiko si un yu tin un aktitut rebelde òf ta slow pa kapta e lès balioso ku su mayornan ta siñ’é? Wak e manera ku Hesus a trata ku su apòstelnan. Hopi biaha nan tabatin diskushon fuerte entre nan i no a komprondé mesora dikon nan mester tabata humilde. Pero, Hesus a keda mustra pasenshi ku nan i bes tras bes a papia ku nan tokante e balor di ta humilde. (Marko 9:​33, 34; Lukas 9:​46-48; 22:​24, 25) Mayornan ku ta imitá Hesus lo korigí nan yunan ku pasenshi i, si ta nesesario, lo keda ripití e mesun punto te ora e yunan kapta e sentido plenamente.

3. Siña nan ku bo ehèmpel. Ta bon pa mayornan skucha e konseho ku apòstel Pablo a duna e kristiannan ku a biba na Roma. El a bisa: “Anto abo, ku ta siña un otro, bo no ta siña bo mes? Abo ku ta prediká ku hende no mester hòrta, bo mes ta hòrta?”​—Romanonan 2:21.

E konseho akí ta masha importante pasobra loke mayornan ta hasi tin mas efekto riba nan yu ku loke nan ta bisa. De echo, tin mas probabilidat ku yu ta skucha na loke mayornan ta bisa ora mayornan mes ta aktua na armonia ku loke nan bisa.

4. Kuminsá for di ora e yu ta chikitu. Timoteo, kende tabata apòstel Pablo su kompañero den e trabou di misionero, tabatin un reputashon ekselente den su komunidat. (Echonan 16:​1, 2) Un motibu tabata ku for “di infansia” su mama i wela a siñ’é for di “e skrituranan santu.” Nan no solamente a lesa for di e Skritura pa Timoteo, sino a yud’é tambe pa rasoná riba e bèrdatnan bíbliko.​—2 Timoteo 1:5; 3:​14, 15.

Unda Bo Por Haña Yudansa?

Testigunan di Yehova ta produsí hopi publikashon ku ta diseñá spesífikamente pa yuda mayornan siña nan yunan e bèrdat tokante Dios. Algun ta skirbí spesífikamente pa yuda mucha chikitu. Otronan ta pa yuda mayornan i nan yu tiner tene e kanal di komunikashon habrí. *

Ta klaru ku promé ku mayornan siña nan yunan tokante Dios, nan mes mester sa e kontesta riba algun pregunta difísil ku nan yunan por hasi nan. Por ehèmpel, ki kontesta lo bo duna riba e pregunta: Dikon Dios ta permití sufrimentu? Kiko ta Dios su propósito pa e tera? Unda e mortonan ta? Gustosamente, Testigunan di Yehova lo yuda bo haña kontesta riba e preguntanan akí i kualke otro pregunta pa asina abo i bo famia por hala serka Dios.​—Santiago 4:8.

[Nota]