“Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia.”​—2 TIMOTEO 3:16.

MUCHA tin ku siña e bèrdat tokante Dios. Unda nan por siña e bèrdat akí? For di e buki religioso mas respetá na mundu, Beibel.

Beibel ta manera un karta di Dios. Den e karta akí, Dios no solamente ta revelá su personalidat pero e ta duna guia moral tambe na tur su yunan, tantu hóben komo bieu. P’esei, laga nos wak algun di e siñansanan ku tin den Beibel i e lèsnan ku asta mucha chikitu por siña for di nan.

 Manera nos a siña for di e ehèmpelnan akí, konseho ku nos ta haña den Beibel ta yuda mucha bira adultonan gradisidu, respetuoso i kompasivo. Pero ken mester siña nan e lèsnan akí?

Kiko Dios ke pa nos sa tokante dje?

▪ Loke Beibel ta siña: “Bo, Quen Su nomber solamente ta Jehová, ta e Altísimo ariba tur tera.”​—Salmo 83:18, Salmonan y Proverbionan, Editorial Evangelica.

Lès: Dios no ta un forsa sino un Persona real ku un nòmber úniko.

▪ Loke Beibel ta siña: “SEÑOR ta skudriñá tur kurason i ta komprondé tur intenshon di e pensamentunan. Si bo busk’é, e lo laga bo hañ’é.”​—1 Krónikanan 28:9.

Lès: Yehova Dios ta stima nos tur, inkluso mucha chikitu. (Salmo 10:14; 146:9) P’esei e ke pa nos siña tokante di dje.

▪ Loke Beibel ta siña: “No afligí ningun . . . huérfano. Si di un òf otro manera bo afligié, i e sklama na mi, lo mi tende su sklamashon sigur.”​—Eksodo 22:​22-24.

Lès: Yehova ta skucha orashon di asta mucha chikitu. Nos por papia ku Dios tur ora i ekspresá nos pensamentu- i sintimentunan di mas profundo.

▪ Loke Beibel ta siña: “Bes tras bes nan a tenta Dios, i a provoká Esun Santu di Israel.”​—Salmo 78:41.

Lès: Loke nos ta bisa i loke nos ta hasi tin efekto riba Yehova su sintimentunan. P’esei, ta bon pa nos pensa promé ku nos papia i aktua.

Kon nos tin ku trata hende ku ta diferente for di nos?

▪ Loke Beibel ta siña: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”​—Echonan 10:​34, 35.

Lès: Si Dios ta aseptá hende di tur nashon, nos no mester deskriminá hende debí na nan koló òf aparensia.

▪ Loke Beibel ta siña: “Sea semper dispuesto pa duna kontesta na kada un ku pidi boso pa duna kuenta di e speransa ku tin den boso, sinembargo ku suavedat i reverensia.”​—1 Pedro 3:15.

Lès: Ora nos ta papia ku otro hende tokante religion, nos mester ekspresá nos punto di bista ku konvikshon pero na un manera bondadoso. Ademas, nos mester mustra rèspèt pa esnan ku tin un otro kreensia religioso.

Kon nos mester trata miembronan di famia?

▪ Loke Beibel ta siña: “Yunan, sea obedesidu na boso mayornan den tur kos, pasobra esaki ta agradabel na Señor.”​—Kolosensenan 3:20.

Lès: Ora mucha ta obediente, esaki ta mustra ku nan stima nan mayornan i ku nan ke agradá Dios.

▪ Loke Beibel ta siña: “Boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi.”​—Kolosensenan 3:13.

Lès: Tin biaha otro hende, inkluso miembro di nos famia, por desilushoná nos. Pero, si nos ke pa Dios pordoná nos, nos mester siña pordoná otronan.​—Mateo 6:​14, 15.

Dikon nos mester ta onesto i kompasivo?

▪ Loke Beibel ta siña: “[Pone] mentira un banda, kada un di boso papia bèrdat ku su próhimo.”​—Efesionan 4:25.

Lès: Ora nos ta papia bèrdat, nos ta imitá Dios i ta alegrá su kurason. Pero si nos desaroyá e mal kustumber di papia mentira, nos ta bira meskos ku e enemigu di Dios, Diabel, kende ta “e tata di mentira.”​—Juan 8:44; Tito 1:2.

▪ Loke Beibel ta siña: “Trata otro hende . . . meskos ku bo ke pa nan trata bo.”​—Mateo 7:12, BPK.

Lès: Nos mester tene konsiderashon ku sintimentu-, pensamentu- i nesesidatnan di miembronan di nos famia i tambe di otronan den nos komunidat. Ora nos ‘tene kompashon ku otro hende,’ nan ta mas inkliná pa trata nos na un manera kompasivo.​—1 Pedro 3:8; Lukas 6:38.

Manera nos a siña for di e ehèmpelnan akí, konseho ku nos ta haña den Beibel ta yuda mucha bira adultonan gradisidu, respetuoso i kompasivo. Pero ken mester siña nan e lèsnan akí?