“E pueblo tabata biba den gran ekspektativa i tur hende tabata puntra su mes si ta Huan tabata e Mesias.”​—LUK. 3:15, BPK.

1. Ki notisia emoshonante e angel a duna e wardadónan?

ANOCHI a sera i algun wardadó tabata den kunuku ta kuida nan karnénan. Diripiente un angel di Yehova a aparesé na nan i e gloria di Dios tabata resplandesé tur rònt di nan. Nan a haña miedu, pero e angel a bisa nan: “No tene miedu; pasobra mira, mi ta trese bon nobo di gran goso pa boso ku lo ta pa henter e pueblo; pasobra awe . . . a nase pa boso un Salbador, kende ta Kristu e Señor.” E angel tabata referí aki na esun ku lo a bira Kristu, òf e Mesias. E angel a bisa e wardadónan ku nan lo a haña un yuchi den un pesebre den un stat den serkania. I diripiente un gran kantidat di angel a aparesé na nan i a kuminsá alabá Yehova, bisando: “Gloria na Dios den halturanan, i na tera pas meimei di hende ku ta agrad’é.”​—Luk. 2:​8-14.

2. Kiko e palabra Mesias ta nifiká, i kon hende por a saka afó ken realmente tabata e Mesias?

² E wardadónan tabata sa ku e Mesias, òf “Kristu,” tabata e Ungí di Dios, es desir, esun ku Dios a skohe pa un propósito spesial. (Eks. 29:​5-7) Pero kon e wardadónan ei i otro hende por a saka afó ku Yehova a skohe e yuchi akí pa bira e Mesias? Wèl, nan mester a analisá e profesianan den e Skritura Hebreo tokante e Mesias i wak si e profesianan akí a kumpli durante bida di e yuchi akí.

Dikon e Hendenan Tabata den Ekspektativa?

3, 4. Kon e profesia di Daniel 9:​24 i 25 a kumpli?

³ Hopi aña despues, Juan Boutista a kuminsá ku su trabou di prediká. I debí na loke e tabata bisa i hasi, algun hende a pensa ku kisas é tabata e Mesias.  (Lesa Lukas 3:15.) Pero den Beibel tin un profesia ku ta papia tokante 70 siman ku lo a yuda hende saka afó na ki tempu e Mesias lo a presentá. E profesia ta bisa: “Setenta siman a wòrdu stipulá pa bo pueblo . . . For di e momento ku e òrdu a wòrdu duná pa restorá i rekonstruí Yerusalèm te na e Mesias, e Prens, lo tin shete siman i sesent’i dos siman.” (Dan. 9:​24, 25) Vários eksperto riba tereno di Beibel ta di akuerdo ku esakinan no ta simannan literal sino ku kada un di e simannan akí ta shete aña. Den Beibel na papiamentu koriente, Daniel 9:24 tin un nota ku ta bisa: “Setenta siman; literalmente: setenta bia shete. Otro posibel tradukshon: setenta bia un periodo di shete aña.”

⁴ Awe, e pueblo di Yehova sa ku e 69 simannan ku Daniel 9:25 ta papia di dje ta 483 aña. E simannan akí a kuminsá kore desde aña 455 promé ku nos era ora Rei Artaherhes di Persia a duna Nehemias pèrmit pa restorá i rekonstruí Yerusalèm. (Neh. 2:​1-8) Pues, si nos kuminsá konta for di aña 455 promé ku nos era, 483 aña despues ta hiba na aña 29 di nos era ora Hesus a batisá. E aña ei, Yehova a ungié ku spiritu santu i el a bira e Mesias.​—Mat. 3:​13-17. *

5. Ki profesianan nos lo trata awor?

⁵ Den Beibel tin hopi profesia mas tokante e Mesias. Laga nos ban trata algun di e profesianan tokante su nasementu, infansia i sirbishi. Nos lo mira kon e profesianan akí a kumpli durante Hesus su bida. Esaki lo fortalesé nos fe den Beibel i duna nos prueba konvinsente ku Hesus tabata e Mesias primintí.

Profesianan Tokante e Mesias Su Infansia

6. Splika kon Génesis 49:10 a kumpli.

⁶ E Mesias mester a bini for di e tribu di Huda. Djis promé ku Jakòb a muri, el a bendishoná su yu hòmbernan, anto el a bisa Huda: “E sèpter lo no kita for di Huda, ni e bara di gobernador for di meimei di su pia, te ora Silo bini, i nashonnan lo obedes’é.” (Gén. 49:10) Hopi erudito hudiu di pasado a kere firmemente ku Jakòb tabata papia tokante e Mesias. Sí, e tabata papiando di un rei. Dikon nos sa esei? Pasobra el a menshoná ku e hòmber tabatin un sèpter i un bara di gobernador, loke ta indiká ku e tin derecho di goberná i duna òrdu. I segun e profesia akí, e rei ei lo mester a bini for di e tribu di Huda. David tabata e promé rei di Huda, i Sedekias tabata e último rei di Huda. Pero e profesia di Jakòb a papia di un otro rei, un rei ku lo a bini despues di Sedekias i ku lo a keda pa semper. E ta ser yamá Silo, loke ta nifiká “Esun na Ken [e Sèpter Real] Ta Pertenesé.” Dios a bisa Sedekias ku e rei akí ta esun ku realmente tin e derecho di goberná. (Eze. 21:​26, 27) De echo, promé ku Hesus su nasementu, angel Gabriel a bisa Maria: “Señor Dios lo dun’é e trono di su tata David; i e lo reina riba e kas di Jakòb pa semper, i su reino lo no tin fin.” (Luk. 1:​32, 33) Hesukristu tabata un desendiente di Huda i David. I despues di Sedekias, Hesus tabata e úniko desendiente di David kende Yehova a primintí e derecho di ta rei. Pues Silo mester ta Hesukristu.​—Mat. 1:​1-3, 6; Luk. 3:​23, 31-34.

7. Unda e Mesias a nase, i dikon esei ta remarkabel?

⁷ E Mesias lo a nase na Bètlehèm. Profeta Mikeas a skirbi: “Abo, Bètlehèm Efrata, muchu chikitu pa ta entre e famianan di Huda, for di bo lo sali unu pa mi pa ta gobernante na Israel. Su orígen ta for di hopi tempu pasá, for di e dianan di eternidat.” (Mik. 5:2) E profesia ta bisa ku e Mesias lo a nase na Bètlehèm, un stat na Huda ku un tempu tabata yama Efrata. Maria, mama di Hesus, i Hosé, su kasá, tabata biba den un otro stat, Názarèt. Pero debí na un dekreto di e  romanonan, Hosé ku Maria mester a bai Bètlehèm pa registrá nan mes. I pa e motibu ei, Hesus a nase einan na aña 2 promé ku nos era. (Mat. 2:​1, 5, 6) Pues, e profesia tokante e nasementu di Hesus a kumpli presis!

8, 9. Kiko a ser profetisá tokante e nasementu di e Mesias, i kiko lo a sosodé despues di su nasementu?

⁸ E Mesias lo a nase di un bírgen. (Lesa Isaias 7:14.) E teksto akí ta bisa ku un “bírgen” lo duna lus na un yu hòmber. Bou di inspirashon, Mateo a indiká ku Isaias 7:14 a kumpli ora ku Hesus a nase. Tantu Mateo komo Lukas a bisa ku Maria tabata un bírgen i ku el a sali na estado pa medio di Dios su spiritu santu.​—Mat. 1:​18-25; Luk. 1:​26-35.

⁹ Despues di nasementu di e Mesias, nan lo a laga mata hopi mucha. Siglonan promé ku e Mesias a nase, Fárao di Egipto a bisa henter e pueblo pa tira tur yu hòmber hebreo ku nase den Riu Neil. (Eks. 1:22) E profesia na Jeremias 31:​15 i 16 ta indiká ku algu similar lo a bolbe sosodé. E profesia akí ta bisa den un forma simbóliko ku “Raquel ta yora su yunan” pasobra enemigunan a bai ku nan. Hende por a tend’é yora te na Rama, ku ta keda den e teritorio di Benjamin, nort di Yerusalèm. Mateo ta indiká ku e profesia akí di Jeremias a kumpli ora Rei Herodes a laga mata tur mucha hòmber na Bètlehèm i den henter e bisindario ei. (Lesa Mateo 2:​16-18.) Imaginá bo kon tristu e hendenan tabata!

10. Kon e profesia di Oseas 11:1 a kumpli?

¹⁰ E Mesias lo a ser yamá for di Egipto. (Ose. 11:1) Pa salba Hesus for di man di Rei Herodes, un angel a bisa Hosé ku Maria pa hui bai Egipto ku Hesus. Nan a keda ei “te ora ku Herodes a muri, pa loke a wòrdu papiá dor di Señor [Yehova] pa medio di e profeta [Oseas] por a keda kumplí, ora ku el a bisa: ‘For di Egipto mi a yama mi yu hòmber.’” (Mat. 2:​13-15) Ta klaru ku Hesus mes no tabatin ningun influensia riba e susesonan relashoná ku su nasementu i su infansia.

E Mesias Ta Kuminsá Su Sirbishi

11. Kon e kaminda pa e Mesias a ser prepará?

¹¹ Un mensahero lo a prepará e kaminda pa e Mesias. Malakias a profetisá ku “profeta Elias” lo a prepará e kaminda pa e Mesias. Lo el a yuda hende pa nan por a aseptá e Mesias ora e presentá. (Lesa Malakias 4:​5 i 6.) Hesus mes a identifiká e “Elias” akí komo Juan Boutista. (Mat. 11:​12-14) I Marko a indiká ku Juan a prepará e kaminda. Esaki ta eksaktamente loke Isaias a profetisá. (Isa. 40:3; Mar. 1:​1-4) No ta Hesus a bisa Juan pa prepará e kaminda p’e. Ta Dios tabata ke pa hende haña sa ta ken ta e Mesias i p’esei el a skohe Juan pa hasi un trabou manera esun di “Elias” i prepará e hendenan pa nan por a identifiká e Mesias.

12. Ki trabou spesial Dios a duna e Mesias?

¹² Dios lo a duna e Mesias un trabou spesial. Un dia Hesus tabata den e snoa na Názarèt, e stat kaminda el a lanta. El a habri e ròl di Isaias i a lesa lo siguiente: “E spiritu di SEÑOR ta riba mi, pasobra el a ungi mi pa prediká evangelio na e pobernan; el a manda mi pa proklamá libertat na e prezunan, i restorashon di bista na e siegunan, pa duna libertat na esnan ku ta wòrdu oprimí, pa proklamá e aña agradabel di SEÑOR.” I debí ku e tabata e Mesias e por a apliká e palabranan akí na su mes, bisando: “Awe e skritura akí a keda kumplí boso dilanti.”​—Luk. 4:​16-21.

13. Kiko Isaias a profetisá tokante Hesus su predikashon na Galilea?

¹³ E Mesias lo a kuminsá su predikashon na Galilea. Tokante e “tera di Zabulon i tera di Nèftalí” i “Galilea di e paganonan,” Isaias a profetisá: “E pueblo ku ta kana den skuridat lo mira un gran lus; esnan ku ta biba den un tera skur, un lus lo lusa riba nan.” (Isa. 9:​1, 2)  Hesus a kuminsá prediká den e stat di Kapernaum na Galilea, kaminda el a biba pa un tempu. El a prediká tambe den e áreanan di Zabulon i Nèftalí. El a siña e hendenan e bèrdat ku a resplandesé manera un lus grandi. (Mat. 4:​12-16) Ta na Galilea Hesus a duna su Sermon Riba Seru, a skohe su apòstelnan, a hasi su promé milager i a aparesé na mas ku 500 disipel despues di su resurekshon. (Mat. 5:​1–7:27; 28:​16-20; Mar. 3:​13, 14; Juan 2:​8-11; 1 Kor. 15:6) Pues, e profesia di Isaias a kumpli ora Hesus a prediká den e “tera di Zabulon i tera di Nèftalí.” Ta klaru ku Hesus a prediká e bon notisia na otro lugánan den Israel tambe.

Mas Profesia Tokante e Mesias

14. Kon Salmo 78:2 a kumpli den kaso di Hesus?

¹⁴ E Mesias lo a usa parábola, òf ilustrashon, pa siña hende. Asaf a kanta den un di e salmonan: “Lo mi habri mi boka i papia den parábola.” (Sal. 78:2) Kon nos por sa ku e profesia akí a kumpli den kaso di Hesus? Wèl, Hesus semper a usa ilustrashon pa siña hende. Ora Mateo a relatá algun ilustrashon tokante simia di mòster i zürdeg ku Hesus a usa pa siña hende tokante e Reino di Dios, el a bisa: “[Hesus] no a papia nada ku nan sin usa parábola, pa por a keda kumplí loke a wòrdu anunsiá dor di e profeta, kende a bisa: ‘Lo mi habri mi boka den parábola; lo mi konta kosnan ku a keda skondí desde e fundashon di mundu.’” (Mat. 13:​31-35) Asina Mateo a mustra kon e profesia di Salmo a kumpli den kaso di Hesus. Sí, Hesus a usa parábola òf komparashon pa siña hende e bèrdat tokante Yehova.

15. Kon e profesia na Isaias 53:4 a kumpli?

¹⁵ E Mesias lo a kura hende. Isaias a profetisá: “Siguramente e mes a karga nos enfermedatnan, i el a karga nos tristesa.” (Isa. 53:4) Ora e suegra di Pedro tabata malu, Hesus a kur’é. I despues, hopi otro hende a bini na kas di Pedro, i Hesus a kura nan tambe. Pues, “loke a wòrdu papiá dor di profeta Isaias, kende a bisa: ‘E mes a tuma nos enfermedatnan riba dje i a karga nos malesanan’” a keda kumplí. (Mat. 8:​14-17) Esaki tabata djis ún di e tantísimo biahanan ku Hesus a kura hende.

16. Kon apòstel Juan a mustra ku Hesus a kumpli ku Isaias 53:1?

¹⁶ Hopi hende lo no a kere ku Hesus ta e Mesias aunke el a hasi kosnan bon. (Lesa Isaias 53:1.) Pa mustra ku e profesia akí a kumpli, apòstel Juan a skirbi: “Apesar ku [Hesus] a hasi asina tantu milager nan dilanti, tòg nan no tabata kere den dje, pa e palabra di profeta Isaias por a keda kumplí, ku el a papia: ‘SEÑOR, ken a kere nos mensahe? I na ken e brasa di SEÑOR a wòrdu revelá?’” (Juan 12:​37, 38) Asta algun aña despues, ora apòstel Pablo a prediká e bon notisia, hopi hende no a kere ku Hesus tabata e Mesias.​—Rom. 10:​16, 17.

17. Kon e profesia na Salmo 69:4 a kumpli?

¹⁷ Hende lo a odia e Mesias sin ningun motibu. (Sal. 69:4) Hesus mes a bisa: “Si mi no a hasi [entre e pueblo] e obranan ku ningun otro hende a hasi, nan lo no tabatin piká; ma awor nan a mira i a odia tantu ami komo mi Tata. Ma nan a hasi esaki, pa e palabra ku ta pará skirbí den nan Lei keda kumplí: ‘Sin motibu nan a odia mi.’” (Juan 15:​24, 25) E “Lei” menshoná akí ta referí na tur e bukinan di Beibel ku a eksistí e tempu ei. (Juan 10:34; 12:34) E Evangelionan ta mustra ku hopi hende tabata odia Hesus, spesialmente e lidernan religioso hudiu. Ademas, Kristu mes a bisa: “Mundu . . . ta odia [mi], pasobra mi ta testiguá di dje, ku su obranan ta malu.”​—Juan 7:7.

18. Kiko nos lo siña den e siguiente artíkulo?

¹⁸ Hesus su siguidónan di promé siglo tabatin sigur ku Hesus tabata e Mesias ya ku el a kumpli ku tur e profesianan ku tin den e  Skritura Hebreo tokante e Mesias. (Mat. 16:16) Manera nos a mira den e artíkulo akí, tur e profesianan ku nos a trata tokante Hesus su infansia i su sirbishi a kumpli. Den e siguiente artíkulo nos lo trata mas profesia ku ta proba ken e Mesias ta. Si nos pensa profundamente riba e profesianan akí, nunka nos lo duda ku Hesukristu ta esun ku Yehova a skohe komo e Mesias.

[Nota]

Kon Lo Bo Kontestá?

• Menshoná algun profesia tokante Hesus su nasementu.

• Kon e kaminda pa e Mesias a ser prepará?

• Kon e profesianan di Isaias kapítulo 53 a kumpli den kaso di Hesus?

[Preguntanan di Estudio]