“Abo, o SEÑOR, ta bindishoná e hende hustu; manera ku un eskudo bo ta rondon’é ku fabor.”​—SAL. 5:12.

1, 2. Kiko Elias a pidi e biuda na Sarepta, i kiko el a sigurá e biuda?

UN BIUDA ku su yu na Sarepta tabatin hamber, i e profeta di Dios tambe. Ora ku e señora akí tabata prepará pa sende kandela p’e kushiná, profeta Elias a pidié un poko awa i pida pan. E biuda tabata dispuesto pa dun’é un poko awa, pero tur loke e tabatin di kome tabata “un man di hariña den e kònchi i un tiki zeta den e butishi.” Pues, el a pensa ku e no tabatin sufisiente di kome pa kompartí ku e profeta, i el a bis’é esei.​—1 Rei. 17:​8-12.

² Ma Elias a insistí: “Traha un pan buskuchi chikitu for di dje pa mi promé, i tres’é pa mi; i despues bo por traha un pa bo mes i pa bo yu hòmber. Pasobra asina e SEÑOR Dios di Israel ta bisa: ‘E kònchi di hariña lo no bira bashí, ni e butishi di zeta lo no bira bashí.’”​—1 Rei. 17:​13, 14.

3. Ki desishon importante nos tin ku tuma?

³ E kuestion ku e biuda a hañ’é kuné tabata mas importante ku djis disidí si e ta kompartí e tiki kuminda ku el a sobra òf nò. E mester a disidí si e ta konfia ku Yehova lo salba e ku su yu òf si e ta pone su nesesidat material promé ku su esfuerso pa haña Dios su aprobashon i amistat. Nos tur tin ku tuma un desishon similar. Kiko nos lo hasi? Nos lo demostrá ku haña e aprobashon di Yehova ta mas importante ku buska siguridat material? Nos tin tur motibu pa konfia den Dios i sirbié. Ademas, tin algun kos ku nos por hasi pa buska su aprobashon i hañ’é.

‘Digno Bo Ta di Risibí Adorashon’

4. Dikon Yehova ta digno di risibí nos adorashon?

⁴ Yehova ta ferwagt ku hende ta sirbié manera e ta deseá, i e tin derecho riba esei. Un grupo di su sirbidónan selestial a konfirmá esaki unánimamente, bisando: “Digno bo ta, [Yehova] nos Señor i nos Dios, pa risibí  gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” (Rev. 4:11) Sí, Yehova meresé nos adorashon pasobra ta é a krea tur kos.

5. Dikon e amor di Dios mester motivá nos pa sirbié?

⁵ Un otro motibu pa sirbi Yehova ta su amor inkomparabel pa nos. Beibel ta bisa: “Dios a krea hende segun su mes imágen; segun e imágen di Dios el a krea hende; hòmber i muhé el a krea nan.” (Gén. 1:27) Hende tin boluntat liber, i Dios a krea nan ku kapasidat di pensa i di tuma desishon. Yehova a duna nos bida, i esei a hasié Tata di humanidat. (Luk. 3:38) Anto meskos ku tur bon tata, Yehova a sòru pa su yunan tin tur loke nan mester pa nan por disfrutá di bida. “E ta hasi su solo sali” i “ta laga awa yobe,” pa asina den un ambiente bunita planeta Tera por produsí kuminda na abundansia pa nos.​—Mat. 5:45.

6, 7. (a) Kon Adam a perhudiká tur su desendientenan? (b) Kon e sakrifisio di Kristu lo benefisiá esnan ku ta buska e aprobashon di Dios?

⁶ Ademas, Yehova a reskatá nos for di e konsekuensianan teribel di piká. Ora Adam a peka, el a bira manera un hungadó di wega di plaka ku ta hòrta su famia pa e por satisfasé su bisio. Adam a kita un bunita futuro for di su yunan, esta, e speransa di biba felis pa semper ora el a rebeldiá kontra Yehova. Su akto egoista a hasi hende katibu di imperfekshon. P’esei tur hende ta bira malu, ta haña nan ku tristesa i ku tempu ta muri. Pa libra un katibu, un persona mester paga un preis, i Yehova a paga e preis ku por libra nos di e konsekuensianan horibel di piká. (Lesa Romanonan 5:21.) Hesukristu, kumpliendo ku e boluntat di su Tata, a duna “su bida komo preis di reskate pa hopi.” (Mat. 20:28) Pronto, esnan ku haña e aprobashon di Dios lo risibí tur e benefisionan di e pago di e reskate ei.

⁷ Nos Kreador, Yehova, a hasi mas ku kualke otro persona pa nos por tin un bida felis i ku propósito. Unabes nos tin su aprobashon, nos lo por mira kon e ta eliminá tur daño kousá na e rasa humano. Yehova lo mustra kada un di nos kon e ta bira “Esun ku ta rekompensá esnan ku ta busk’é.”​—Heb. 11:6.

“Bo Pueblo Lo Pone Su Mes Disponibel”

8. Kiko e eksperensia di Isaias ta siña nos tokante sirbi Dios?

⁸ Pa haña e aprobashon di Dios, nos tin ku usa nos boluntat liber na e manera korekto, ya ku e no ta fòrsa ningun hende pa sirbié. Den tempu di Isaias, Yehova tabata buska un hende pa kumpli ku un asignashon i a puntra: “Ken lo mi manda i ken lo bai pa nos?” Isaias a kontestá: “At’ami aki! Manda ami!” Sin duda el a bisa esei ku gran satisfakshon. E echo ku Yehova a permití Isaias disidí a mustra ku el a trata e profeta ku dignidat.​—Isa. 6:8.

9, 10. (a) Ku ki aktitut nos mester sirbi Dios? (b) Dikon ta na su lugá pa nos sirbi Yehova di henter nos alma?

⁹ Ta keda na kada hende si nan ta sirbi Dios. Yehova ke pa nos sirbié boluntariamente. (Lesa Josué 24:15.) Ken ku ta adorá Dios di mala gana, no por agrad’é; tampoko Dios no ta aseptá deboshon di personanan ku ta sirbié djis pa komplasé otro hende. (Kol. 3:22) Es mas, nos lo no haña e aprobashon di Dios si nos ta permití kosnan di mundu stroba nos di rindi sirbishi sagrado ‘ku henter nos kurason.’ (Sal. 119:2) Yehova sa ku pa bai nos bon, nos mester ador’é di henter nos alma. Moisés a urgi e israelitanan pa skohe bida ‘dor di stima Yehova nan Dios, dor di obedesé su bos i dor di tene duru na dje.’​—Deu. 30:​19, 20.

¹⁰ Rei David di Israel di antigwedat a kanta na Yehova: “Bo pueblo lo pone su mes disponibel den e dia di bo poder; den e splendor di  santidat, for di e matris di mardugá, bo hóbennan ta pa bo manera serena.” (Sal. 110:3) Pa hopi hende awe, siguridat finansiero i rekreo ta bini na promé lugá. Ma pa hende ku ta stima Yehova, nan sirbishi sagrado tin prioridat riba tur otro kos. Nan zelo den e trabou di prediká e bon notisia ta demostrá esei, i nan tin pleno konfiansa ku Yehova por satisfasé nan nesesidat di kada dia.​—Mat. 6:​33, 34.

Sakrifisionan Ku Dios Ta Aprobá

11. Ki benefisio e israelitanan tabata spera ora nan a ofresé sakrifisio na Yehova?

¹¹ Bou di Lei di Moisés, e pueblo di Dios a ofresé sakrifisio ku tabata aseptabel pa Dios pa haña su aprobashon. Levítiko 19:5 ta bisa: “Ora boso ta ofresé un sakrifisio di e ofrendanan di pas na SEÑOR, boso mester ofresé esaki di tal manera ku boso lo [wòrdu] aseptá.” Den e mesun buki di Levítiko, nos ta lesa: “Ora boso ta ofresé un sakrifisio di gradisimentu na SEÑOR, boso mester ofresé esaki di tal manera ku boso lo wòrdu aseptá.” (Lev. 22:29) Ora e israelitanan tabata ofresé sakrifisio di bestia na e manera korekto riba e altar di Yehova, e huma di esei tabata manera “un holó dushi” pa e Dios berdadero. (Lev. 1:​9, 13) El a keda kontentu esei i a aseptá e ekspreshonnan di amor ei di parti di su pueblo. (Gén. 8:21) E aspektonan akí di e Lei ta kontené un prinsipio ku ta konta pa nos awe tambe: Hende ku ofresé sakrifisio ku ta aseptabel pa Yehova ta risibí su aprobashon. Pero ki tipo di sakrifisio e ta aseptá? Ban konsiderá esaki riba dos tereno: nos kondukta i nos abla.

12. Ki práktikanan ta hasi e ‘presentashon di nos kurpa’ un sakrifisio desagradabel pa Dios?

¹² Den e karta ku apòstel Pablo a skirbi e romanonan, el a bisa: “Presentá boso kurpanan komo sakrifisionan bibu i santu, aseptabel pa Dios, kual ta boso sirbishi spiritual di adorashon.” (Rom. 12:1) Pues, pa un persona haña e aprobashon di Dios, e mester sòru pa su kurpa ta aseptabel pa Dios. Si e kontaminá su kurpa ku tabako, betelnoot (un nechi popular na Asia), droga òf demasiado alkohòl, e ofrenda ei lo no tin ningun balor. (2 Kor. 7:1) Es mas, siendo ku un “hende inmoral ta peka kontra su mes kurpa,” kualke kondukta inmoral ta hasi su sakrifisio un kos desagradabel pa Yehova. (1 Kor. 6:18) Pues, pa un persona agradá Yehova, e mester ta ‘santu den tur su kondukta.’​—1 Ped. 1:​14-16.

13. Dikon ta na su lugá pa nos alabá Yehova?

¹³ Un otro sakrifisio ku Yehova ta gusta tin di aber ku nos abla. Hende ku ta stima Yehova semper a papia bon di dje, tantu den públiko komo den e privasidat di nan kas. (Lesa Salmo 34:​1-3.) Lesa Salmo 148-150, i wak kuantu biaha e  tres salmonan akí ta animá nos pa alabá Yehova. No tin duda, “alabansa ta pas pa esnan ku ta rekto.” (Sal. 33:1) Ademas, nos Gran Ehèmpel, Hesukristu, a enfatisá e importansia di alabá Dios pa medio di e predikashon di e bon notisia.​—Luk. 4:​18, 43, 44.

14, 15. Oseas a urgi e israelitanan pa ofresé ki tipo di sakrifisio, i kon Yehova a reakshoná?

¹⁴ Ora nos ta prediká ku zelo, nos ta demostrá ku nos ta stima Yehova i ku nos ke su aprobashon. Por ehèmpel, wak ki konseho profeta Oseas a duna e israelitanan ku a bai tras di adorashon falsu i ku a pèrdè e aprobashon di Dios. (Ose. 13:​1-3) Oseas a bisa nan pa roga Yehova: “Pordoná eror; i aseptá loke ta bon, i nos lo ofresé en kambio e toronan hóben di nos lepnan.”​—Ose. 14:​1, 2, NW.

¹⁵ Un toro tabata e bestia di mas kostoso ku un israelita por a ofresé Yehova. Pues, “e toronan hóben di nos lepnan” ta referí na palabranan sinsero i bon pensá ekspresá komo alabansa na e Dios berdadero. Kon Yehova a reakshoná riba e sakrifisionan ei? El a bisa di esnan ku a ofresé nan: “Lo mi stima nan abundantemente.” (Ose. 14:4) Sí, hende ku a ofresé e tipo di sakrifisionan di alabansa ei a risibí Yehova su pordon i aprobashon i a la bes a disfrutá di su amistat.

16, 17. Ora fe den Dios ta motivá un persona pa prediká e bon notisia, kon Yehova ta risibí e persona akí su alabansa?

¹⁶ Un aspekto importante di adorashon berdadero ta ku semper Yehova su sirbidónan a alab’é públikamente. Dunamentu di gloria na Dios tabata asina importante pa e salmista ku el a roga Dios: “Aseptá, o SEÑOR, e ofrendanan boluntario di mi boka.” (Sal. 119:108) Kiko di nos tempu? Papiando di un multitut grandi di hende den nos tempu, Isaias a profetisá: “[Nan] lo trese bon nobo di e alabansanan di SEÑOR. . . . Nan [regalonan] lo wòrdu aseptá komo ofrenda riba [Dios su] altar.” (Isa. 60:​6, 7) Kumpliendo ku e profesia akí, miónes di hende awe ta ofresé Dios “un sakrifisio di alabansa, esta, e fruta di lepnan ku ta hasi deklarashon públiko di su nòmber.”​—Heb. 13:15, NW.

¹⁷ Kiko di abo? Bo ta ofresiendo Dios sakrifisio ku e ta aseptá? Si no ta asina, lo bo hasi e kambionan nesesario i kuminsá alabá Yehova públikamente? Ora bo fe ta motivá bo pa kuminsá prediká e bon notisia, bo ofrendanan “lo agradá SEÑOR mas ku un bue” òf toro. (Lesa Salmo 69:​30 i 31.) Bo por tin sigur ku e “holó dushi” di bo sakrifisio lo yega serka Yehova i ku lo e duna bo su aprobashon. (Eze. 20:41) E ora ei lo bo tin un goso sin igual.

‘Yehova Mes Lo Bindishoná Tur Hende Hustu’

18, 19. (a) Kon hopi hende awe ta mira sirbimentu di Dios? (b) Kiko ta pasa ora un hende pèrdè e aprobashon di Dios?

¹⁸ Awendia, hopi hende ta yega na e mesun konklushon ku algun persona den tempu di Malakias: “Ta enbano nos ta sirbi Dios; i di ki probecho esaki ta ku nos a warda su ordenansanan?” (Mal. 3:14) Nan ta laga nan deseonan materialista guia nan i ta kere ku Dios no por logra su propósito i ku su leinan no ta konta mas pa nos tempu. Segun nan, e  trabou di prediká e bon notisia ta pèrdèmentu di tempu i un molèster.

¹⁹ E aktitutnan ei a originá den hòfi di Edén. Ta Satanas a konvensé Eva pa menospresiá e berdadero balor di e bida maravioso ku Yehova a dun’é i pa despresiá e aprobashon di Yehova. Awe tambe Satanas konstantemente ta trata di konvensé hende ku nan no ta gana nada si nan hasi e boluntat di Dios. Sinembargo, Eva ku su kasá a deskubrí ku pèrdè e aprobashon di Dios a nifiká pèrdè nan bida. Pronto esnan ku awe ta sigui nan mal ehèmpel tambe lo realisá e mesun bèrdat amargo akí.​—Gén. 3:​1-7, 17-19.

20, 21. (a) Kiko e biuda di Sarepta a hasi, i ki resultado esaki tabatin p’e? (b) Kon nos por imitá e biuda di Sarepta, i dikon nos tin ku hasi esei?

²⁰ Awor, kompará e final tristu di Adam ku Eva ku e resultado di e susesonan relashoná ku Elias i e biuda di Sarepta menshoná na kuminsamentu di e artíkulo akí. Despues ku e biuda a tende e palabranan alentador di Elias, el a kuminsá kushiná i a sirbi e profeta promé aunke e tabatin masha poko di kome. Anto Yehova a kumpli ku e promesa ku el a hasi e señora pa medio di Elias. E relato ta bisa: “É ku Elias i e hendenan di su kas a kome pa hopi dia. E kònchi di hariña no a bira bashí ni e butishi di zeta no a bira bashí, konforme e palabra di SEÑOR ku el a papia pa medio di Elias.”​—1 Rei. 17:​15, 16.

²¹ E biuda di Sarepta a hasi algu ku masha poko di e míles di miónes di hendenan ku ta na bida awe ta dispuesto pa hasi. El a pone pleno konfiansa den e Dios di salbashon, i Yehova no a lag’é na kaya. E suseso akí i otro relatonan bíbliko ta konfirmá ku Yehova meresé nos konfiansa. (Lesa Josué 21:​43-45; 23:14.) E bida di Testigunan di Yehova den nos tempu ta un prueba mas ku Yehova nunka lo bandoná esnan ku tin su aprobashon.​—Sal. 34:​6, 7, 17-19. *

22. Dikon ta urgente pa buska e aprobashon di Dios awor?

²² Dios su dia di huisio “riba tur esnan ku ta biba riba superfisie di henter mundu” ta serka. (Luk. 21:​34, 35) Niun hende lo skapa di esei. Ni rikesa ni komodidat material lo no tin balor e tempu ei. Loke sí lo ta di gran balor ta pa tende e Hues ku Dios a nombra bisa: “Bini, boso ku ta bindishoná di mi Tata, heredá e reino ku ta prepará pa boso.” (Mat. 25:34) Sí, Yehova mes lo ‘bindishoná tur hende hustu; manera ku un eskudo lo e rondoná nan ku su fabor,’ òf aprobashon. (Sal. 5:12) Esaki no ta animá bo pa buska e aprobashon di Dios?

[Nota]

Bo Ta Kòrda?

• Dikon Yehova ta meresé pa nos ador’é di kurason?

• Ki tipo di sakrifisio Yehova ta aseptá awe?

• Na kiko e ekspreshon “e toronan hóben di nos lepnan” ta referí, i dikon nos mester ofresé Yehova esei?

• Dikon nos mester buska e aprobashon di Dios?

[Preguntanan di Estudio]

[Plachi na página 19]

E profeta di Dios a pidi un mama den nesesidat pa tuma ki desishon?

[Plachi na página 21]

Ki benefisio nos ta risibí ora nos ta ofresé sakrifisio di alabansa na Yehova?

[Plachi na página 23]

Si bo konfia plenamente den Yehova, nunka lo bo keda desapuntá